Nehemiah 8

Chinese TTVR (現代台語譯本羅馬字版)

← Chapter 7 Jump to: Chapter 9 →

1Hit-sî, jîn-bîn lóng tâng-sim chi̍t-ì chū-chi̍p tī Chúi-mn̂g chêng ê kóng-tiûⁿ; in chhiáⁿ keng-ha̍k-kàu-su Í-su-la, chiong Siōng Chú thong-kè Mô͘-se pan-pò͘ hō͘ Í-sek-lia̍t ê lu̍t-hoat ê chheh tòa--lâi.

2Chhit-ge̍h chhoe-it, chè-si Í-su-la tòa lu̍t-hoat ê chheh lâi kàu hōe-chiòng bīn-chêng, kî-tiong ū lâm ū lú, kap só͘-ū thiaⁿ-liáu ōe bêng-pe̍k ê gín-á.

3Í-su-la tī Chúi-mn̂g chêng ê kóng-tiûⁿ, tùi thiⁿ-kng kàu tiong-tàu, tī hōe-chiòng, chiū-sī hiah-ê lâm-lú kap thiaⁿ-liáu ōe bêng-pe̍k ê gín-á bīn-chêng tha̍k hit-kńg lu̍t-hoat ê chheh; jîn-bîn lóng chù-ì teh thiaⁿ.

4Keng-ha̍k-kàu-su Í-su-la khiā tī in ūi-tio̍h chit-ê tāi-chì ēng chhâ te̍k-pia̍t chòe ê tâi-á téng; khiā tī i chiàⁿ-pêng--ê ū Má-tha-thê-ngá, Sī-má, A-nāi-ngá, O͘-lī-a, Hi-le̍k-ka, kap Má-se-ngá; khiā tī i tò-pêng--ê ū Pí-tāi-ngá, Bí-sa-lī, Má-ki-ngá, Hap-sūn, Hap-poa̍t-tāi-ná, Sat-ka-lī-a, kap Bí-su-lân.

5Í-su-la khiā tī tâi-téng, tī jîn-bîn ê bīn-chêng thí-khui chit-kńg chheh; i chi̍t-ē thí-khui, tāi-ke chiū lóng khiā--khí-lâi.

6Í-su-la chheng-chàn Siōng Chú — chì-tōa ê Siōng-tè; chèng jîn-bîn lóng gia̍h-chhiú, hôe-èng kóng, “Amen! Amen!” In lóng àⁿ-thâu phak tī thô͘-kha kèng-pài Siōng Chú.

7Jîn-bîn lóng khiā--teh; Lī-bī -lâng Iâ-su-a, Pa-nî, Sī-lī-pí, Ngá-bín, A-kok, Sa-pí-thài, Hô-tē-ngá, Má-se-ngá, Ki-lī-tha, A-sat-lī-ngá, Iok-sat-poa̍t, Hap-lân, kap Pí-lâi-ngá, pang-chān jîn-bîn bêng-pe̍k lu̍t-hoat.

8In tha̍k Siōng-tè lu̍t-hoat ê chheh, hoan-e̍k koh kóe-seh lāi-bīn ê ì-sù, jîn-bîn chiū bêng-pe̍k só͘ tha̍k--ê.

9Séng-tiúⁿ Nî-hi-bí, kap chè-si mā-sī keng-ha̍k-kàu-su ê Í-su-la, í-ki̍p kàu-tō jîn-bîn ê Lī-bī -lâng, tùi jîn-bîn kóng, “Kin-á-ji̍t sī Siōng Chú — lín ê Siōng-tè ê sèng-ji̍t; m̄-thang pi-ai thî-khàu.” In-ūi choân-thé jîn-bîn thiaⁿ-tio̍h lu̍t-hoat ê ōe lóng thî-khàu.

10Nî-hi-bí koh kā in kóng, “Lín khì chia̍h siōng-hó ê mi̍h, lim tiⁿ ê chiú; bô chún-pī chia̍h-mi̍h ê lâng, tio̍h pun hō͘ in. Kin-á-ji̍t sī lán ê Chú ê sèng-ji̍t, lín m̄-thang iu-siong, in-ūi tùi Siōng Chú tit--tio̍h ê hoaⁿ-hí sī lín ê khùi-la̍t.”

11Tùi án-ni, Lī-bī -lâng hō͘ choân-thé jîn-bîn pêng-chēng--lo̍h-lâi, kóng, “Tio̍h an-chēng, m̄-thang iu-siong, in-ūi kin-á-ji̍t sī sèng-ji̍t.”

12Jîn-bîn chiū khì lim-chia̍h, mā pun mi̍h-kiāⁿ hō͘ lâng; tāi-ke lóng chin hoaⁿ-hí, in-ūi in bêng-pe̍k kàu-tō in ê ōe.

13Keh-ji̍t, jîn-bîn ê cho̍k-tiúⁿ, chè-si, kap Lī-bī -lâng lóng chū-chi̍p lâi keng-ha̍k-kàu-su Í-su-la hia, beh ha̍k-si̍p lu̍t-hoat ê ōe.

14In hoat-kiàn, lu̍t-hoat tiong ū kì-chài Siōng Chú thong-kè Mô͘-se bēng-lēng Í-sek-lia̍t -lâng, tio̍h tī chhit-ge̍h ê choeh-kî tòa tī chháu-liâu;

15koh tio̍h tī ta̍k-ê siâⁿ kap Iâ-lō͘-sat-léng soan-thoân pò-kò, kóng, “Lín tio̍h chhut-khì soaⁿ--ni̍h, chhú kaⁿ-ná-chhiū, iá kaⁿ-ná-chhiū, tiông-chheng-chhiū, chang-chhiū, kap chhiū-hio̍h chin ām ê chhiū-ki, chiàu só͘ kì-chài--ê tah chháu-liâu-á.”

16Jîn-bîn chiū chhut--khì, tòa chhiū-ki tńg--lâi, ta̍k-ê lâng tī ka-kī ê chhù-téng kap tiâⁿ, tī Siōng-tè sèng-tiān ê tiâⁿ, tī Chúi-mn̂g kap Í-hoat-liân-mn̂g ê kóng-tiûⁿ, tah chháu-liâu-á.

17Hiah-ê siū-lia̍h koh tò--lâi ê hōe-chiòng chiū tah chháu-liâu-á, tòa tī hit lāi-bīn; tùi Lūn ê kiáⁿ Iok-su-a ê sî kàu chit-ji̍t, Í-sek-lia̍t -lâng m̄-bat án-ni chòe. In lóng hui-siông hoaⁿ-hí khoài-lo̍k.

18Tùi thâu chi̍t ji̍t kàu lō͘-bé ji̍t, Í-su-la ta̍k-ji̍t soan-tho̍k Siōng-tè ê lu̍t-hoat. Chèng-lâng siú-choeh chhit ji̍t, tē-poeh ji̍t, chiàu kui-lē kú-hêng giâm-siok-hōe.

← Chapter 7 Jump to: Chapter 9 →