Nehemiah 9

Chinese TTVR (現代台語譯本羅馬字版)

← Chapter 8 Jump to: Chapter 10 →

1Kâng hit-ge̍h jī-sì ji̍t, Í-sek-lia̍t -lâng chū-chi̍p kìm-chia̍h, chhēng môa-saⁿ, sám thô͘-hún.

2Í-sek-lia̍t ê hō͘-tāi kap só͘-ū ê gōa-cho̍k-lâng toān-choa̍t koan-hē; in lóng khiā-teh jīn ka-kī ê chōe, kap in lia̍t-chó͘ ê chōe-kò.

3In khiā--teh, ēng saⁿ tiám-cheng tha̍k Siōng Chú — in ê Siōng-tè lu̍t-hoat ê chheh, koh ēng saⁿ tiám-cheng jīn-chōe, kèng-pài Siōng Chú — in ê Siōng-tè.

4Lī-bī -lâng Iâ-su-a, Pa-nî, Kah-bia̍t, Sī-pa-nî, Pò͘-nî, Sī-lī-pí, Pa-nî, kap Ki-ná-nî khiā tī tâi-téng, tōa-siaⁿ ai-kiû Siōng Chú — in ê Siōng-tè.

5Lī-bī -lâng Iâ-su-a, Kah-bia̍t, Pa-nî, Hap-sa-nî, Sī-lī-pí, Hô-tē-ngá, Sī-pa-nî, Pí-tha-hi-ngá kóng, “Tio̍h khí--lâi, chheng-chàn Siōng Chú — lín ê Siōng-tè, ti̍t-kàu éng-éng-oán-oán! Siōng Chú ah, goān lí êng-kng ê miâ tit-tio̍h o-ló, chhiau-kè it-chhè ê siōng-chàn kap o-ló.

6“Siōng Chú ah, chí-ū lí sī Siōng Chú! Lí chhòng-chō thiⁿ, thiⁿ-téng ê thiⁿ, kap thiⁿ-téng ê bān-siōng, koh chhòng-chō tōe kap tōe-chiūⁿ ê bān-mi̍h, hái kap hái-tiong só͘-ū--ê; lí siúⁿ-sù sìⁿ-miā hō͘ bān-mi̍h; thian-kun mā kèng-pài lí.

7Lí sī Chú Siōng-tè, ū kéng-soán A-pek-lân, chhōa i chhut Pa-pí-lûn ê Ngô͘-ní, kā i kái-miâ chòe A-pek-la-hán.

8Lí chai i tùi lí tiong-si̍t, kap i li̍p-iok, èng-ún chiong Ka-lâm -lâng, Hek -lâng, A-mô͘-lī -lâng, Pí-lī-sé -lâng, Iâ-pò͘-su -lâng, Kek-ka-sat -lâng ê thó͘-tōe hō͘ i ê hō͘-tāi, koh si̍t-hiān lí ê ōe; in-ūi lí sī kong-gī--ê.

9“Lí ū khòaⁿ-kìⁿ goán ê lia̍t-chó͘ tī Ai-ki̍p siū-khó͘, thiaⁿ-kìⁿ in tī Âng-hái hái-piⁿ ê ai-kiû;

10lí chai Ai-ki̍p -lâng ap-pek goán ê lia̍t-chó͘; lí kiâⁿ sîn-jiah kî-sū, kong-kek Hoat-ló, i ê jîn-sîn, kap i kok-lāi ê jîn-bîn; lí chiū tit-tio̍h miâ-siaⁿ, chhin-chhiūⁿ kin-á-ji̍t án-ni.

11Lí tī goán ê lia̍t-chó͘ bīn-chêng kā hái pun-khui, hō͘ in tùi hái-tiong kiâⁿ ta-tōe kè--khì; lí chiong tui-jip in--ê, hiat tī chhim-hái, chhin-chhiūⁿ kā chio̍h-thâu hiat-lo̍h tōa-éng.

12Ji̍t--sî lí ēng hûn-thiāu chhōa in, mî--sî lí ēng hé-thiāu chiò-kng in tio̍h kiâⁿ ê lō͘.

13Lí kàng-lîm tī Se-nāi-soaⁿ, tùi thiⁿ-téng kap in kóng-ōe, siúⁿ-sù in chèng-ti̍t ê bēng-lēng, chin-si̍t ê lu̍t-hoat, hó ê kui-lē kap kài-bēng;

14lí hō͘ in chai lí an-hioh ê sèng-ji̍t, thong-kè lí ê po̍k-jîn Mô͘-se ēng kài-bēng, kui-lē, kap lu̍t-hoat kà-sī in.

15“In iau ê sî, lí tùi thiⁿ siúⁿ-sù bí-niû; in chhùi-ta ê sî, lí hō͘ chio̍h-pôaⁿ chhut-chúi; koh kiò in tio̍h khì sêng-chiap lí li̍p-sè beh hō͘ in ê thó͘-tōe.

16Tān-sī, goán ê lia̍t-chó͘ kiau-ngō͘ chū-tāi, ngī-sim m̄-khéng hóe-kái, bô thiaⁿ-thàn lí ê kài-bēng;

17in m̄-khéng sūn-thàn, bô kì-liām lí tī in tiong-kan só͘ chòe ê kî-sū, kèng-jiân ngī-sim m̄-khéng hóe-kái, ka-kī siat-li̍p léng-siù, chûn-sim pōe-ge̍k, siūⁿ-beh oa̍t tò-khì in chòe lô͘-châi ê tōe. Chóng-sī, lí sī hoaⁿ-hí sià-bián lâng, ū un-tián, ū lîn-bín, bô khoài siū-khì, ū móa-móa chû-ài ê Siōng-tè; mā bô pàng-sak in.

18In sui-jiân chù chi̍t chiah gû-á, kóng ‘Che sī chhōa lín chhut Ai-ki̍p ê Siōng-tè’, án-ni tōa-tōa siat-to̍k lí;

19m̄-kú lí ū ke̍k-tōa ê lîn-bín, bô pàng-sak in tī khòng-iá; ji̍t--sî, hûn-thiāu bô lī-khui in, chhōa in kiâⁿ lō͘; mî--sî, hé-thiāu mā bô lī-khui in, chiò-kng in tio̍h kiâⁿ ê lō͘.

20Lí siúⁿ-sù lí liông-siān ê sîn lâi kà-sī in, bô siu-hôe lí ê má-ná hō͘ in bô mi̍h-kiāⁿ thang chia̍h; in chhùi-ta ê sî, iû-goân siúⁿ-sù in ū chúi thang lim.

21Tī khòng-iá sì-cha̍p nî kú lí iúⁿ-chhī in, hō͘ in bô khiàm pòaⁿ-hāng; in ê saⁿ bô phòa, in ê kha bô phòng-phā.

22“Lí chiong lia̍t-pang kap hiah-ê jîn-bîn kau hō͘ in, chiong chiu-ûi ê thó͘-tōe pun hō͘ in; in tit-tio̍h Hi-si̍t-pún -ông Se-hông ê tōe kap Pa-san -ông Go̍k ê tōe.

23Lí hō͘ in ê kiáⁿ-sun chhin-chhiūⁿ thiⁿ-téng ê chhiⁿ hiah-ni̍h chōe, chhōa in kàu lí èng-ún in lia̍t-chó͘ beh hō͘ in sêng-chiap ê tōe.

24In ê kiáⁿ-sun ji̍p-khì sêng-chiap hit-ê tōe, lí tī in ê bīn-chêng chè-ho̍k hit só͘-chāi ê chū-bîn Ka-lâm -lâng, chiong hit-ê tōe ê kun-ông kap chū-bîn lóng kau tī in ê chhiú, chhut-chāi in ê ì-sù tùi-thāi hiah-ê lâng.

25In kong-chhú kian-kò͘ ê siâⁿ, pûi ê thó͘-tōe, tit-tio̍h khǹg-móa ta̍k-khoán hó-mi̍h ê chhù-the̍h, kap khui piān-piān ê chúi-chíⁿ, phû-tô-hn̂g, kaⁿ-ná-hn̂g, kap chin chōe ké-chí-chhiū. In tit-tio̍h chia̍h-pá, seng-khu pûi; in-ūi lí ê tōa-un sim-lāi khoài-lo̍k.

26“M̄-kú in kèng-jiân m̄ sūn-thàn, pōe-ge̍k lí, chiong lí ê lu̍t-hoat hiat tī ka-chiah-āu; in thâi-sí khó͘-khǹg in kui-ǹg lí ê sian-ti, tōa-tōa siat-to̍k lí.

27Só͘-í lí chiong in kau tī tùi-te̍k ê chhiú, hō͘ in siū khó͘-chhó͘; in tú-tio̍h khó͘-lān ê sî ai-kiû lí, lí chiū tùi thiⁿ-téng àⁿ-lo̍h thiaⁿ, chiàu lí ke̍k-tōa ê lîn-bín, hō͘ in ū chín-kiù-chiá, kiù in thoat-lī tùi-te̍k ê chhiú.

28In hióng-siū thài-pêng, soah koh tī lí ê bīn-chêng chòe pháiⁿ; lí khì-sak in, kā in kau tī tùi-te̍k ê chhiú, siū tùi-te̍k koán-hat; in oa̍t tò-tńg kiû-kiò lí ê sî, lí iû-goân tùi thiⁿ-téng àⁿ-lo̍h thiaⁿ, chiàu lí ê lîn-bín chi̍t-piàn koh chi̍t-piàn kái-kiù in.

29Lí khoàn-kài in, ài in oa̍t-tńg sūn-thàn lí ê lu̍t-hoat; m̄-kú in kiau-ngō͘ chū-tāi, m̄ thiaⁿ-thàn lí ê kài-bēng, ûi-pōe lí ê bēng-lēng — lâng nā chun-hêng, chiū ōe tit-tio̍h oa̍h-miā — keng-thâu oa̍t-cháu, ngī-sim kò͘-chip, m̄-khéng thiaⁿ-thàn.

30Lí khoan-iông in chin chōe nî, lí ê sîn thong-kè lí ê sian-ti khoàn-kài in, in iû-goân m̄ thiaⁿ-thàn; só͘-í lí chiong in kau tī lia̍t-kok jîn-bîn ê chhiú.

31M̄-kú chiàu lí ke̍k-tōa ê lîn-bín, lí bô siau-bia̍t in, bô khì-sak in; in-ūi lí sī ū un-tián, ū lîn-bín ê Siōng-tè.

32“Taⁿ, goán ê Siōng-tè ah, lí sī chì-tōa, ū koân-lêng, thang kiaⁿ-ùi, siú-iok si jîn-ài ê Siōng-tè; goán ê kun-ông, léng-siù, chè-si, sian-ti, lia̍t-chó͘, kap lí ê chú-bîn, tùi A-su̍t lia̍t-ông ê sî kàu kin-á-ji̍t só͘ siū it-chhè ê khó͘-lān, kiû lí m̄-thang khòaⁿ-chòe sió-khóa.

33Lí sī kong-gī, lí ê só͘-chòe sìn-si̍t; goán só͘ chòe--ê lóng sī pháiⁿ, só͘ tú--tio̍h-ê sī chōe-kai-èng-tit.

34Goán ê kun-ông, léng-siù, chè-si, lia̍t-chó͘ lóng bô chun-siú lí ê lu̍t-hoat, m̄ thiaⁿ-thàn lí ê kài-bēng í-ki̍p lí khoàn-kài ê ōe.

35In tī in ka-kī ê kok-ka, hióng-siū lí sù hō͘ in ê hok-khì, tòa tī lí só͘ siúⁿ-sù khoan-khoah pûi-súi ê tōe, in kèng-jiân bô ho̍k-sāi lí, mā bô oa̍t-tńg lī-khui ka-kī ê pháiⁿ só͘-kiâⁿ.

36Goán kin-á-ji̍t chòe lô͘-lē! Lí siúⁿ-sù goán lia̍t-chó͘ chit-tè thó͘-tōe, hō͘ in thang hióng-siū ké-chí kap hó-mi̍h; goán kèng-jiân tī chia chòe lô͘-lē.

37In-ūi goán ê chōe, chit-ê tōe chhut-sán ê mi̍h lóng kui tī lia̍t-ông; lí siat-li̍p in koán-hat goán, chhut-chāi in ê ì-sù koán-hat goán ê seng-khu kap goán ê cheng-siⁿ. Goán tī hoān-lān tiong chin kan-khó͘!”

38Chiah-ê tāi-chì liáu-āu, goán sīn-tiōng li̍p-iok, siá-chòe bûn-su; goán ê léng-siù, Lī-bī -lâng kap chè-si, lóng chhiam-miâ khàm-ìn.

← Chapter 8 Jump to: Chapter 10 →