Zechariah 1

Chinese TTVR (現代台語譯本羅馬字版)

Jump to: Chapter 2 →

1Tāi-liû-sū chē-ūi tē-jī nî poeh--ge̍h, Siōng Chú tùi E̍k-to ê sun, Pí-lī-ka ê kiáⁿ sian-ti Sat-ka-lī-a kóng,

2“Siōng Chú tùi lín ê chó͘-sian hoat tōa siū-khì.

3Só͘-í lí tio̍h kā jîn-bîn kóng, ‘Siōng Chú — Bān-kun ê Thóng-sòe án-ni hoan-hù: Lín tio̍h kui-ǹg góa, góa chiū choán-ǹg lín.’ Siōng Chú — Bān-kun ê Thóng-sòe án-ni soan-pò͘.

4M̄-thang o̍h lín ê chó͘-sian. Í-chêng ê sian-ti bat tùi in soan-pò͘: Siōng Chú — Bān-kun ê Thóng-sòe án-ni kóng, ‘Tio̍h hôe-thâu lī-khui lín ê pháiⁿ-lō͘ kap pháiⁿ hêng-ûi.’ M̄-kú in m̄ thiaⁿ, m̄ sūn-chiông góa. Che sī Siōng Chú kóng--ê.

5Taⁿ lín ê chó͘-sian tī tó-ūi? Hiah-ê sian-ti kiám ōe éng-oán oa̍h--teh?

6M̄-kú góa hoan-hù góa ê po̍k-jîn chèng sian-ti só͘ kóng ê ōe kap kui-lē, í-keng tī lín chó͘-sian ê sin-chiūⁿ si̍t-hiān. Āu-lâi in hôe-thâu, kóng, ‘Siōng Chú — Bān-kun ê Thóng-sòe koat-tēng beh chiàu lán ê só͘-kiâⁿ-só͘-chòe tùi-thāi lán. I í-keng chiàu án-ni chòe lah.’”

7Tāi-liû-sū chē-ūi tē-jī nî cha̍p-it--ge̍h, chiū-sī Sè-pā-te̍k-ge̍h jī-cha̍p-sì ji̍t, Siōng Chú tùi E̍k-to ê sun, Pí-lī-ka ê kiáⁿ sian-ti Sat-ka-lī-a kóng-ōe.

8Góa tī mî--sî khòaⁿ-kìⁿ chi̍t ê lâng khiâ chi̍t chiah âng-bé, khiā tī soaⁿ-kok tiông-chheng-chhiū ê tiong-kan; tī i ê āu-bīn ū âng-sek, chang-sek, pe̍h-sek ê bé.

9Góa mn̄g i, “Sian-siⁿ, chiah-ê bé teh piáu-sī sím-mi̍h?” Lēng-gōa chi̍t ê kap góa kóng-ōe ê sù-chiá kā góa kóng, “Góa beh chí-sī lí chiah-ê sī sím-mi̍h ì-sù.”

10Hit-ê khiā tī tiông-chheng-chhiū tiong-kan ê lâng ìn kóng, “Chiah-ê sī Siōng Chú chhe-phài lâi tī tōe-chiūⁿ sûn-lô--ê.”

11In chiū kā hit-ê khiā tī tiông-chheng-chhiū tiong-kan Siōng Chú ê sù-chiá pò-kò kóng, “Goán ū tī tōe-chiūⁿ sûn-lô, khòaⁿ-tio̍h choân-tōe lóng pêng-chēng bô-sū.”

12Jiân-āu Siōng Chú ê sù-chiá kóng, “Siōng Chú — Bān-kun ê Thóng-sòe, lí tùi Iâ-lō͘-sat-léng kap Iû-tāi chiah-ê siâⁿ siū-khì í-keng chhit-cha̍p nî; lí bô thiàⁿ-sioh in beh koh jōa kú?”

13Siōng Chú chiū ēng jîn-chû an-ùi ê ōe, ìn kap góa kóng-ōe hit-ê sù-chiá.

14Kap góa kóng-ōe ê sù-chiá kiò góa soan-kò Siōng Chú — Bān-kun ê Thóng-sòe só͘ kóng ê ōe, “Góa chhim-chhim thiàⁿ-sioh Iâ-lō͘-sat-léng, jia̍t-ài Sek-an.

15M̄-kú góa tùi an-ún chū-boán ê lia̍t-kok hui-siông siū-khì; in-ūi góa bat tùi góa ê chú-bîn sió-khóa siū-khì, lia̍t-kok soah thàn ki-hōe ke-thiⁿ in ê khó͘-lān.

16Taⁿ, góa beh tò-tńg-lâi thiàⁿ-sioh Iâ-lō͘-sat-léng; tī chia góa ê tiān beh tiông-kiàn, siâⁿ beh têng-khí.” Siōng Chú — Bān-kun ê Thóng-sòe án-ni soan-pò͘.

17Siōng Chú ê sù-chiá koh kiò góa soan-pò͘, “Siōng Chú — Bān-kun ê Thóng-sòe kóng, ‘Góa chiah-ê siâⁿ beh koh hoân-êng hoat-ta̍t; Siōng Chú beh koh an-ùi Sek-an, beh koh kéng Iâ-lō͘-sat-léng chòe góa ka-kī ê siâⁿ.’”

18Góa gia̍h-thâu khòaⁿ, khòaⁿ-kìⁿ sì ki kak.

19Góa mn̄g kap góa kóng-ōe ê sù-chiá, “Chiah-ê kak teh piáu-sī sím-mi̍h?” I ìn góa kóng, “Chiah-ê sī kóaⁿ-sòaⁿ Iû-tāi, Í-sek-lia̍t, Iâ-lō͘-sat-léng ê kak.”

20Siōng Chú koh hō͘ góa khòaⁿ-kìⁿ sì ê sai-hū.

21Góa mn̄g, “Chiah-ê sai-hū lâi beh chòe sím-mi̍h?” Sù-chiá ìn kóng, “Chiah-ê sai-hū lâi, sī beh heh-kiaⁿ lia̍t-kok, phah-tn̄g in ê kak, in-ūi in bat ēng in ê kak kóaⁿ-sòaⁿ Iû-tāi, hō͘ lâng m̄-káⁿ gia̍h-thâu.”

Jump to: Chapter 2 →