Zechariah 10

Chinese TTVR (現代台語譯本羅馬字版)

← Chapter 9 Jump to: Chapter 11 →

1Tio̍h tī chhun-thiⁿ ú-kî ê sî tùi Siōng Chú kiû hō͘; chō o͘-hûn kap lûi-tiān ê Siōng Chú ōe lo̍h kam-lîm hō͘ só͘-ū ê lâng, hō͘ ta̍k-ê lâng ê chhân-hn̂g seng-sán.

2Lín tī ke-lāi ho̍k-sāi ê sîn-bêng o͘-pe̍h chí-sī, pok-kòa--ê lām-sám pò; in o͘-pe̍h kái-bāng, bōe-tàng an-ùi lâng. Góa ê chú-bîn lóng chhin-chhiūⁿ iûⁿ bê-lō͘, in in-ūi bô bo̍k-chiá siū khi-ap.

3Góa Siōng Chú — Bān-kun ê Thóng-sòe tùi hiah-ê bo̍k-chiá hoat tōa siū-khì, beh hêng-hoa̍t chhōa-thâu--ê. Góa beh khòaⁿ-kò͘ góa ê iûⁿ-kûn Iû-tāi -ke, hō͘ in pìⁿ-chòe kiông-béng ê chiàn-bé.

4Só͘-ū ê léng-siù lóng ōe tùi Iû-tāi -ke chhut; in ióng-chòng khó-khò chhin-chhiūⁿ chhù-kak-chio̍h, chhin-chhiūⁿ pò͘-phâng ê khi̍t-á, chhin-chhiūⁿ kau-chiàn ê keng.

5In chhin-chhiūⁿ teh kau-chiàn ê ióng-sū, thún-ta̍h tùi-te̍k chhin-chhiūⁿ teh ta̍h koe-lō͘ ê thô͘-bê, in-ūi góa Siōng Chú kap in tông-chāi, in ōe ióng-kám kau-chiàn, phah-pāi bé-peng, hō͘ tùi-te̍k kiàn-siàu.

6Góa beh hō͘ Iû-tāi kiông-sēng, hō͘ Í-sek-lia̍t sèng-lī. Góa beh lîn-bín in, chhōa in tńg--lâi, hō͘ in kám-kak ná-chhin-chhiūⁿ góa m̄-bat kā in khì-sak. Góa sī Siōng Chú — in ê Siōng-tè, góa beh thiaⁿ in ê kî-tó.

7Í-sek-lia̍t ōe chhin-chhiūⁿ ióng-sū; in ōe chhin-chhiūⁿ lim-chiú sim khoài-lo̍k. In ê kiáⁿ-sun ōe khòaⁿ--kìⁿ lâi khoài-lo̍k; in ê sim ōe in-ūi Siōng Chú hoaⁿ-hí.

8Góa beh kā in kho͘ óa--lâi, in-ūi góa ū koat-tēng beh kiù-sio̍k in. In ê jîn-kháu ōe ke-thiⁿ, chhin-chhiūⁿ í-chêng hiah-ni̍h chōe.

9Góa sui-jiân ū kā in hun-sòaⁿ khì lia̍t-kok, in ōe tī hn̄g-hn̄g ê só͘-chāi siàu-liām góa; in kap in ê kiáⁿ-sun lóng ōe oa̍h--teh koh tò-tńg--lâi.

10Góa beh chhōa in tùi Ai-ki̍p tò-tńg--lâi, mā beh tùi A-su̍t chhōa in chhut--lâi, chhōa in lâi Ki-lia̍t kap Lê-pa-lūn, kàu hiah-ê tōe-khu bô-kàu só͘-chāi thang tòa.

11Siōng Chú keng-kè hiong-ok ê hái, chè-ho̍k hái-tiong ê pho-lōng, hō͘ Nî-lô-hô chhim ê só͘-chāi ta--khì, A-su̍t ê kiau-ngō͘ kàng-chòe pi-bî, Ai-ki̍p ê koân-le̍k siau-sit.

12Góa Siōng Chú beh hō͘ in khò góa kian-kiông, chiàu góa ê ì-sù seng-oa̍h hêng-tōng. Siōng Chú án-ni soan-pò͘.

← Chapter 9 Jump to: Chapter 11 →