Zechariah 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Góa koh gia̍h-thâu khòaⁿ, khòaⁿ-kìⁿ chi̍t ê lâng chhiú the̍h niû-soh.

2Góa mn̄g i, “Lí beh khì tó-ūi?” I kā góa kóng, “Beh khì niû Iâ-lō͘-sat-léng, khòaⁿ i jōa khoah, jōa tn̂g.”

3Āu-lâi, kap góa kóng-ōe ê sù-chiá chhut--khì, koh ū chi̍t ê sù-chiá lâi chiap i,

4tùi i kóng, “Lí kóaⁿ-kín khì kā hit-ê siàu-liân-lâng kóng, ‘ Iâ-lō͘-sat-léng beh chiâⁿ-chòe bô chhiûⁿ ê siâⁿ, lâng kap cheng-siⁿ khoeh kah móa-móa.’

5Siōng Chú kóng, ‘Góa beh ēng hé chòe chhiûⁿ sì-bīn pau-ûi pó-hō͘ i, koh góa ê êng-kng beh lîm-chāi tī hit lāi-bīn.’”

6Siōng Chú kóng, “Cháu, kín cháu, tùi pak-hng ê tōe tô-cháu--tńg-lâi! In-ūi góa í-chêng ū kā lín kóaⁿ-sòaⁿ khì choân-tōe ta̍k só͘-chāi.

7Cháu, tòa tī Pa-pí-lûn ê Sek-an chú-bîn, kín cháu o͘h!”

8Siōng Chú — Bān-kun ê Thóng-sòe hián-chhut êng-kng liáu-āu, chhe góa khì chhiúⁿ-lia̍h I ê chú-bîn ê lia̍t-kok hia, kóng, “Kha̍p-tio̍h góa ê chú-bîn, chiū-sī kha̍p-tio̍h góa ê ba̍k-chiu-jîn.

9Góa beh hē-chhiú kong-kek in, in ōe hō͘ in ê lô͘-lē chhiúⁿ.” Hit-sî lín chiū ōe chai, sī Siōng Chú — Bān-kun ê Thóng-sòe chhe góa lâi.

10Siōng Chú koh kóng, “ Sek-an ê chú-bîn, tio̍h hoaⁿ-hí chhiùⁿ-koa! Lín khòaⁿ, góa beh lâi, beh tiàm tī lín tiong-kan.

11Hit-ji̍t, ū chin chōe kok ōe lâi kui-óa Siōng Chú, chòe góa ê chú-bîn. Góa beh tiàm tī lín tiong-kan.” Án-ni, lín chiū ōe chai, sī Siōng Chú — Bān-kun ê Thóng-sòe chhe góa lâi lín chia.

12Siōng Chú beh tit-tio̍h Iû-tāi chòe I tī sèng-tōe ê sán-gia̍p; I beh koh kéng Iâ-lō͘-sat-léng chòe I ê siâⁿ.

13Só͘-ū ê lâng tī Siōng Chú bīn-chêng lóng tio̍h siok-chēng, in-ūi Siōng Chú tùi I ê sèng-só͘ khiā--chhut-lâi.

← Chapter 1 Jump to: Chapter 3 →