Zechariah 12

Chinese TTVR (現代台語譯本羅馬字版)

← Chapter 11 Jump to: Chapter 13 →

1Che sī Siōng Chú iú-koan Í-sek-lia̍t ê khé-sī. Kā thiⁿ thí-khui, kiàn-li̍p tāi-tōe ê kun-ki, chhòng-chō lâng sìⁿ-miā ê Siōng Chú án-ni kóng,

2“Góa beh hō͘ Iâ-lō͘-sat-léng chiâⁿ-chòe chi̍t poe chiú, hō͘ sì-ûi chiah-ê kok-ka lim kah chùi-chùi-chùi; Iâ-lō͘-sat-léng siū ûi-khùn ê sî, Iû-tāi choân-tōe mā ōe siū kong-kek.

3Chiah-ê kok-ka chū-chi̍p lâi kong-kek ê sî, góa beh hō͘ Iâ-lō͘-sat-léng chiâⁿ-chòe tāng ê chio̍h-thâu, hō͘ beh giâ i ê lâng lóng siū tāng-siong.”

4Siōng Chú kóng, “Tī hit-ji̍t, góa beh phah só͘-ū ê bé, hō͘ in tio̍h-kiaⁿ, hō͘ khiâ-bé--ê lia̍h-kông; góa beh thí-khui ba̍k-chiu khòaⁿ-kò͘ Iû-tāi -ke, phah lia̍t-kok ê bé, hō͘ in bô khòaⁿ--kìⁿ.

5Iû-tāi ê cho̍k-tiúⁿ sim-lāi án-ni kóng, ‘ Iâ-lō͘-sat-léng ê chū-bîn sī goán ê khùi-la̍t, in-ūi in óa-khò Siōng Chú — Bān-kun ê Thóng-sòe, in ê Siōng-tè.’

6“Tī hit-ji̍t, góa beh hō͘ Iû-tāi ê cho̍k-tiúⁿ chhin-chhiūⁿ chhâ-tui tiong ê hé-chéng, chhin-chhiūⁿ be̍h-kó téng ê hé-pé; in ōe sio tùi tò-pêng chiàⁿ-pêng, chiong sì-ûi ê lia̍t-kok sio-bia̍t. Iâ-lō͘-sat-léng ōe tī goân-lâi ê só͘-chāi kian-kò͘ khiā-chāi.

7“Siōng Chú beh tāi-seng chín-kiù Iû-tāi ê pò͘-pîⁿ, chiah bián Tāi-pi̍t ông-tiâu ê êng-kng kap Iâ-lō͘-sat-léng chū-bîn ê êng-kng iâⁿ-kè Iû-tāi.

8Tī hit-ji̍t, Siōng Chú beh pó-hō͘ Iâ-lō͘-sat-léng ê chū-bîn. Án-ni, in tiong-kan siōng nńg-chiáⁿ--ê ōe chhin-chhiūⁿ Tāi-pi̍t hiah-ni̍h ióng-béng; Tāi-pi̍t ông-tiâu ōe chhin-chhiūⁿ Siōng-tè, chhin-chhiūⁿ Siōng Chú ê sù-chiá tī thâu-chêng ín-chhōa in.

9Hit-ji̍t, lâi kong-kek Iâ-lō͘-sat-léng ê lia̍t-kok, góa it-tēng beh kā in châu-bia̍t.”

10“Góa beh chiong lîn-bín kap kî-kiû ê sîn piàⁿ-lo̍h hō͘ Tāi-pi̍t ê hō͘-tāi kap Iâ-lō͘-sat-léng ê chū-bîn; in beh gióng-bōng góa, chiū-sī in chha̍k--sí hit-ūi; koh beh ūi-tio̍h i ai-khàu, chhin-chhiūⁿ lâng ūi-tio̍h ko͘-kiáⁿ ai-khàu; koh ūi-tio̍h i iu-khó͘, chhin-chhiūⁿ lâng ūi-tio̍h sit-lo̍h tōa-kiáⁿ iu-khó͘.

11Tī hit-ji̍t, Iâ-lō͘-sat-léng ū tōa ai-khàu, chhin-chhiūⁿ tī Bí-kiat-to pêng-goân ê Hap-ta̍t Lîm-bûn ê ai-khàu.

12Choân-kok múi chi̍t ke lóng ōe ai-khàu: Tāi-pi̍t -ke, Ná-tan -ke, Lī-bī -ke, Sī-múi -ke, kap kî-tha só͘-ū ê ka-cho̍k, lóng kok chòe chi̍t tui, lâm lú hun-khui ai-khàu.”

← Chapter 11 Jump to: Chapter 13 →