1 Corinthians 12

Zande

← Chapter 11 Jump to: Chapter 13 →

1Were tipa agu ahe nga ga toro, awirina, mi akpi nga nyemu oni zanga inahe te.

2Oni ini ya ho oni adu ni ni aGendiria oni apeke fuo gu kpiahe ka afura nga ya, a wa i angbe fu roni ku mbata yo sa ni.

3Wa du he were mi fugu he fu roni oni ini ya a nga boro ho ka gumba pai sangba ga Mbori Toro yo niya, “Yesu nga boro motiwa,” wa sa te; a nga boro ka ya, “Yesu nga Gbia” te, kina sangba Ziazia Toro yo.

4Were agamahe na angbatungaha akia, ono Toro du sa nafu he.

5Mangapase ki du na angbatungaha akia, Gbia ki du sa i namanga pa ko.

6Manga sunge ki du na angbatungaha akia, ono Mbori du sa, namanga apai dunduko rogo ahe du.

7Ono i fu yuguyuguhe ni dezire Toro fu aboro ni ba sa sa i u be he.

8Bambiko i fu gu pai nga tatamana fu gu ni rogo Toro yo; ki fu gu pai nga inahe fu kura ni, ku sangba kina gu Toro yo sa;

9idapase fu kura ni rogo kina gu Toro re; gu agamahe nga husa aboro, rogo kina gu Toro sa;

10manga agu apai du na tandu fu kura ni, tandu, gumba apai mbata si nikada fu gu ni; wisiga pa atoro ki du fu gu ni: ngbatunga afugo ki du fu gu ni; pa sa afugo ki du fu gu ni.

11Ono Toro kina sa namanga agi apai dunduko re, ki nikparaka ha fu yo ni ba sa sa a wa ko akpi nyemu he.

12Bambiko wa du kpotoboro sa, si ki du na dungu apaha, apa kpotoboro wa du he ni dungu he, si nga kpoto sa; wo du Kristo a.

13Bambiko i abapatizi rani dunduko rogo Toro sa ku rogo kpotoboro yo sa, wa du ani watadu ni aYudo na aGiriki, watadu ni akanga na ani ni araniri; i ki ya ani mbiri Toro ambira sa.

14Bambiko a nga kpotoboro na paha sa te, ono si ni dungu he.

15Ka ndue ya, “Mbiko wa adu nga mi ni be ya, a nga mi ni pa kpotoboro te;” si he nga du ni pa kpotoboro mbiko gure te.

16Na ka tue ya, “Mbiko wa adu nga mi ni bangirise ya, a nga mi ni pa kpotoboro te;” si he nga du ni pa kpotoboro mbiko gure te.

17Ka kpotoboro angia kina bangirise dunduko, ka gia pai adu wari? Ka si angia kina gia pai dunduko, gia fuõ he ki du wari?

18Ono awere Mbori moi apa boro ni ba sa sa ti kpotoboro a wa si angba ti ko.

19Na ka si adu dunduko na paha sa ka kpotoboro adu wari?

20Ono awere si du na dungu apaha, ono kpotoboro ki du sa.

21Ka bangirise ya nga fu be, “Zingo ro adu nga ti re te, ya;” watadu ka ri ya nga fu ndue, “Zingo roni adu nga ti re te,” a ya.

22Oó, wa sa te, agu apa boro du ni rurungbura ha bangirise re, si ka du ho:

23na agu apa boro ani niya ti ni re irisa ti ni gbe te, ani namaa irisa ti gere susi. Agu aparani angba nga ngbanyaha ya si ki du na wene ngbanyaha susi.

24Ono agu aparani du na wene ngbanyaha zingoho ti ni te. Ono Mbori aringbisi kpotoboro wa he sa, nifu irisa susi fu gu paha nikpa;

25ya ka kparaka du nga rogo kpotoboro ya; ono apaha bánda tihe abanda dagba ha wa sa.

26Watadu gu paha ki hi pai, kura apaha ki hi pai na ni dunduko, na i irisi gu paha sa, kura apaha ki ngi angi na ni dunduko.

27Were oni nga boro Kristo, ki du ni apaha ni ba sa sa dunduko.

28Mbori ki moi agu yo rogo kanisa yo, amokedi mbata, anebi ki du ni ue he, abayugupai ki du ni biata ha, agu yo namanga apai na tandu ki du, gu agamahe nga husa aboro ki du, na undahe, na zoga aboro, na gumba ngbatunga afugo.

29Amokedi nga yo dunduko? Anebi nga yo dunduko? Abayugupai nga yo dunduko? Amangi agu apai du na tandu nga yo dunduko?

30I asia pa husa aboro fu yo dunduko? Agumba ngbatunga fugo aboro nga yo dunduko? I dunduko nasa fugo aboro?

31Ono oni nikpí nyemu kina gu agamahe du ni bakere he kakaka. Ono mi ayúgo gu gene ngba susi fu roni.

← Chapter 11 Jump to: Chapter 13 →