1 Corinthians 13

Zande

← Chapter 12 Jump to: Chapter 14 →

1Ka mi gumba pai ni agu afugo nga ga aboro na gu nga ga amaraika, nyemuse adu nga ti re ya, mi du wa kina sirigi napaa apaa, wa kina gu he nawo ruguzuruguzu.

2Ka mi rengbe na gumba pai wa anebi, ki ini pa gbugbu apai dunduko na agu apai i aina ha dũ; ka mi du na idapase dunduko rengbe na gbisa abaagangara, nyemuse adu nga ti re ya, mi du nga ni he te.

3Ka mi fuku gimi a ũkporo dunduko ka riga rungorungo aboro, ka mi fu kpotore i zo ho azo, nyemuse adu nga ti re ya, si du nga ni he fere te.

4Nyemuse nahi pai ni gbanga ha, ki du na weneringise; nyemuse akpi nga he te; nyemuse aabia nga tihe te, azaraga nga tihe te.

5Si amanga nga gu pai angba nga ya te, agbata nga gaha pai te, si aerã nga te, si aberã nga gbegberẽpai kuti boro te.

6Si angi nga mbiko irairapai te, ono si nangi mbiko rengo;

7si nambu pa apai dunduko, si du gaha idapase, na gaha maabangirise na gaha hi pa apai anyasa nga te.

8Nyemuse adiga nga te; ono si ngia gumba pai wa anebi du, si adiga adiga; si ngia ngbatunga afugo du, si anyása anyasa; si ngia inahe du, si adiga adiga.

9Bambiko ani ini bete apai, ani ki nigumba bete apai;

10ono ho gu he ka ye ni du ni nzunzu he, gu he nga bete he si ki digi adiga.

11Ho mi adu ni ni gude mi agumba pai wa gude, mi ki niberẽ pai wa gude. Awere wa du mi ni kumba, mi mbu agu apai nga ga agude.

12Bambiko wa du rago re ani nabi apai wa ngana yo, ti kirimaha; ono ni gu rago re ani abí kina kpakpuhe. Wa du rago re mi ini bete apai; ono ni gu rago re mi aina ha a wa ini yo re.

13Ono awere idapase du ho na maabangirise, na nyemuse; agi apai biata re; gu kii dagba ha nga nyemuse.

← Chapter 12 Jump to: Chapter 14 →