1 Corinthians 9

Zande

← Chapter 8 Jump to: Chapter 10 →

1Mi nara nga ni rire te? Mokedi nga mi te? Mi abi nga Yesu gaani Gbia te? A nga oni nga gi sunge rogo Gbia yo te?

2Ka mi adu nga ni mokedi fu agu yo ya, mi du ni mokedi fu roni: bambiko ngbaanga gimi dunimokedi nga oni rogo Gbia yo.

3Mbakada rimore fu agu yo nawisiga pa re nga gere.

4Ru nga ri he na mbira he fu rani, te?

5Ru nga ta na diarani ni idipase fu rani, a wa kura amokedi, na awirina Gbia na Kefa, te?

6Watadu kina rani na Barunaba, ru nga mbu manga sunge fu rani te?

7Gini banzengere ka manga gani sunge gbua? Da ka rú bakakue ati yo ka ni ari nga zuzuhe ya? Na da ka riga rimbasa akandoro, ka ni ari nga mamura ya?

8Mi nagumba agi apai re wa du sino aboro? Rugute nagumba ha kina wo te?

9Bambiko si ni keke he rogo ga Mose rugute ya, “Ka mo vó nga ngba bagara ho u nasimba zendehe ni ya.” Watadu abagara Mbori namanga pa ra,

10na ko agumba ha mbiko kina rani? Ii, i ake he mbiko rani, bambiko gu ni nasopa bino, ni ka sopa ha ni maabangirise, gu ni nataka zendehe ni ka taka ha nimoi bangirini sa ri he.

11Ka ani arú amaku nga ga toro fu roni, ka ani ke gaoni ú zegino si du ni bakere pai?

12Ka manga wo ru fu kura aboro, si ru nga fu rani susi te? Ono si avura ru ani amanga nga wo te; ono ani nahi apai dunduko, ka ani ba nga dingisaro fu gu wene pangbanga nga ga Kristo ya.

13Oni aina nga ya agu yo namanga sunge ziazia apai i nidu ni ungayo mbiko agu ahe nga ga yekaru, na agu yo namanga pa bamotumo, i nirogo bete ahe bamotumo yo te?

14Kina wo, Gbia aya agu yo anatungusa wene pangbanga i du ni ungayo mbiko wene pangbanga.

15Ono mi amanga nga agi apai re wa sa te, mi ake nga agi apai re ya i mangi he tipa re a te. Bambiko kpi mi ngba ti re susi gu ka boro mungosi gi sambuatise.

16Bambiko ka mi tungusi wene pangbanga, he du nga be re ka mi sambua tire mbiko ho te; bambiko i moi dingisaro ti re; bambiko rungo du fere ka mi atungusa nga wene pangbanga ya.

17Bambiko ka mi mangi gere mbiko mi asia ha tigimi, mi ab í mosoro. Ono ka si adu nga mbiko mi asia ha tigimi ya, mi du na gu pai i aasia pa ha fere.

18Gine tie nga gi mosoro? Ya, ho mi natungusa wene pangbanga ni, mi fu wene pangbanga ki he ú be, ka mi adia nga agu ahe ru fere mbiko wene pangbanga dunduko ya.

19Bambiko ka mi vura ra ni rire ti apai du, mi azogo tire ni kanga fu yo dunduko, mi ye na yo ni dungu yo.

20Fu aYudo mi ki du wa Yudo, mi zungadi aYudo; fu agu yo du tii rugute yo, wa ka mi adu tii rugute yo, wa adu nga mi tii rugute yo tigimi ya, mi zungadi agu yo du tii rugute yo;

21fu agu yo zanga rugute, wa ka mi azanga rugute, wa mi azanga nga rugute yo du Mbori ni te, ono mi du tii rugute yo fu Kristo, mi zungadi agu yo zanga rugute.

22Fu rurungbura aboro mi adu wa ka mi arungbura, mi zungadi rurungbura yo. Mi ye ka du ni apai dunduko fu aboro dunduko, si ngia ka mi batasiaguyo.

23Mi ki nimangi apai dunduko mbiko wene pangbanga, ya mi rogo gi bete he ti ni na akuare.

24Oni aina nga ya agu yo nazo abangirã i naora dunduko, ono gu ni sa nadia mosoroho te? Oni óro wa ka oni da ada.

25Agu aboro nazuna he ni mbaro dũ, i du na rugatise rogo apai dunduko. Were i namanga ha ka dia payapaya kpakpari irisa: ono ani tipa dia gu apaya nga ya.

26Wo mi aora tie, wa ka mi awo rogo pai te; wo mi namaa ngbondo, wa ka mi ataka yuge te.

27Ono mi namanga borore, ka sa ha ni kanga fere. Si ka du wa i mbu re ambu tigimi, fuo tungusa mi pai fu kura aboro.

← Chapter 8 Jump to: Chapter 10 →