Lamentations 2

Zande

← Chapter 1 Jump to: Chapter 3 →

1Ako Gbia moi aboro Siona ku tii dubo yo ni gako zinga! Ko ba gu wene ngbanya nga ga Yisaraere ngbangbaturũ yo ku sende no; ko atingida nga pa gbada nduko rago gako zinga te.

2Gbia gbarasi agu akporo dunduko nga ga Yakoba, ka nungaha adu nga ti ko ya; ko kuadi nyanyaki aba ku sande nga ga aboro Yuda, ni gako zinga. Ko zogo ngbi ku sande, na gaha abazogo rogo pa zee yo.

3Ko rogo ome awiri aYisaraere dunduko ku sa yo ni gako ngariangaria zinga; ko di kumbabeko ti yo ku sa yo barangba iravura. Ko zo Yakoba wa ka i zo he ni kina mirãwe, ki niriti ahe dunduko kirikiri.

4Ko nuga gako mboto wa boro vura, ko ru na kumbabeko wa irafudifudipai. Ko imi agu ahe dunduko ninangba ku bangirani, ko uka gako nzengerenzengere zinga wa we ku rogo ga aboro Siona bamburoko yo.

5Gbia sa tiko wa boro vura, ko gbarasi Yisaraere. Ko gbarasi gaha abambu bakindo dunduko, ki kuadi gaha nyanyaki aba mbusumbusu. Ko ngeesi kpenunga na ta wawa nga ga aboro Yuda.

6Ko kuadi gako basura ku sa yo, wa gu nga ga ati; ko gbarasi ba gako ringbisiringbisi agbuu. Yekova digisi tingida pa ringbisiringbisi gbuu na rago sabiti Siona yo, ko payasi pa bakindo na boromotumo ni gu imisiri ngbaduse nga ga gako zinga.

7Gbia mbu pa gako bamotumo, ko payasi pa gako kparakpara ziazia ba. Ko fu ngapa bakporo nga ga abambu bakindo ku be iravura. I amangi gbarakagbaraka pai rogo ga Yekova bambu yo, wa ti uru ringbisiringbisi gbuu.

8Yekova aberẽ pa gbarasa ngapa bakporo nga ga aboro Siona. Ko taĩ gire kuti ni, ko adia nga beko ku sa yo ti gbarasa ha te. Ono ko mangi ndugu na ngapa bakporo si kpari kpe, si zirĩ wa sa.

9Gaha angbadimo bakporo rinda ku sende yo; ko gbarasi gaha kengedi ngbadimo ki kuadi he. Gaha bakindo na abazogo du dagba arikaaboro yo; rugute du nga ho berewe te. Gaha anebi arara nga musumo nga ga Yekova te.

10Abaira kporo nga ga aboro Siona sungu sande, ki ongo kii. I mi nvutu ku riyo yo, ki ukadi mbuzaroko. Gu ngasu ade du Yerusarema yo dua riyo ku sende.

11Bangire naegerã be aume, mbisimore du rogo gbarakagbaraka pai. Kpotore yo uka ku sande be rungo, bambiko pa gbarasa gimi aboro, bambiko he namaka rukutu agude na ahaamai ti agene bakporo yo.

12I nakpara fu anayo, ya “Wari du riahe ni na imekakue?” wa he namaka yo wa agu yo hõko ti agene bakporo yo. Ungayo ki tiwi kuti ngbadu anayo.

13Ako aboro Yerusarema, Gini pai ka mi gumba ha tipa gaoni apai, ki ringbisi pa roni kuti gini he? Ako aboro Siona, gini he ka mi ringbisi roni kuti ni, nga gu nikafu wasa fu roni? Bambiko gaoni sapusapu ba du ni bakere he wa kina baime; da rengbe ka husa roni?

14Gamo anebi rari musumo tipa ro nga musumo nangahe na mumungo pai. Ono i ayugo nga pa ga irairapai, ka karaga pa ga zizi yo berewe te. Ono i bi ambusa tipa ro nga pa nangahe na irairaapai.

15Agu aboro nasusa ngba gene dunduko nata beyo ku ri yo; i nakpara nviinvii ki nipikipo riyo kuti aboro Yerusarema, niya; “Agi yo re nga aboro gu oakporo aboro aya ti ni, si nga ndikidi ba ngbanya, nga ũngbarago tipa kpotosende dunduko?”

16Avuraha dunduko nasenga ha; i nakpara nviinvii ki niri ngba rindiyo, ya yo: “Ani ima gbarasa ha! Ako, gere nga gu uru ani angera tipa ha; si da awere fu rani; ani bi he!”

17Yekova mangi gu pai ko aberẽ pa ha, ko digisi gu pai ko asere pa ha mbata; ko ba ha ku sande, ka nungaha adu nga ti ko ya, a wa ko arugu he bakuru yo; ko moi vuraro ni ngi ku ri ro, ki kiisi ome agu yo nafuda ro.

18Ako gu bakporo nga Siona, mo kpári na wawa fu Gbia! Aume nióro wa adi uru na yuru! Ka mo óngodi nga ya, ka ndika bangiro mbú nga be kpe ya!

19Mo gúari, mo kpári ku ari yuru, ho ababandarago natona pa banda rago ni! Mo úka kpotoro yo wa ime ku bara bangiri Gbia! Mo túmba abero koyo du ko ni, tipa unga awiro, nga agu yo he namaka yo be gomoro ti agene bakporo yo dunduko.

20Ako Yekova, mo ngére, ki bi nga! Da mangi mo pai fu ni were? Si rengbe wo ade ri awiriyo nga agu agude i nabanda yo wenengaĩ? Watadu i imi boromotumo na nebi rogo ga Gbia kparakpara ziazia ba yo?

21Paranga boro na gbinza boro pi sande bangiri agene bakporo. Gimi ngasu ade na paranga akumba natiwa be basape Mo aimi yo ti uru ga zinga, gayo kpio azanga inapai.

22Mo ayambu aũgundesi ku pati re kirikiri wa yamba yo aboro ti uru ringbisiringbisi gbuu. A nga boro ho namerẽ watadu nye ni ungani ti gu uru Yekova azingi ti ni te. Agu yo mi aaka yo bere ki mbu ti yo, vurare aima gbarasa yo dũ.

← Chapter 1 Jump to: Chapter 3 →