Lamentations 4

Zande

← Chapter 3 Jump to: Chapter 5 →

1Ako! dahabu sa tihe tataita, Waĩ wene ndikidi dahabu nasa tihe! Kparakpara ziazia ambia ki piki rasa ti agene bakporo yo dunduko.

2Gu kikiipa awiri Siona, rengbe baroã yo wa ndikidi dahabu, waĩ gedi yo yo wa kina aakoro nga gu sunge nga ga be abameaakoro!

3Zavura ahúa ami nikusi mamura, ka ahaga awira, ono gimi aboro sa tiyo ni kere yo, wa kina agu abaazire nga asurutio du ngbakungba yo.

4Mirã gude ngba mai nadika tihe kuti biringa ngbani be zingo mai. Agude naho riahe, ono a nga boro ho sa nafu he fu yo te.

5Agu yo naari wene riahe i nakpíka akpika gene bakporo yo. Agu yo naainidi pa kina ngungungu roko i napi kina ri guguda akuke.

6Bambiko gu mbusa irairapai nga ga gimi aboro adu ni bakere he susi gu mbugo ingapai nga ga Sodomo, nga gu bakporo i aba ha ku sande rogo kina wiri guru rago, ka be azada nga ha wa sa ya.

7Gu siasia aboro naadu yo i adu ziazia ki susi morogumba, i adu ni bapusi yo ki susi mamu anya. Kpotoyo adu ni zamba ha ki susi zamba ambia ime, kpia ngbanyayo ki du wa kikiipa mbia nga safiro.

8Ono kpakpuyo du ni babibiri he ki susi kingire awere, i aina nga yo agene bakporo yo te. Ayu kpotoyo ugu kuti amemeyo, si ugu ki du wa kina ugu ngua.

9Pa agu yo i aimi yo ni basape ngba gayo pai ki susi ti ga agu yo nakpi be gomoro, naruna ki gberẽ mbiko zingo zuzu aũati.

10Agu ade du na nunga kina boro beyo pasi awiriyo, i du ni gayo riahe rago pa gbarasa gimi aboro.

11Yekova nyasi pa gako ngariangaria zinga, ko uka gako kere zinga. Ko ki ginda we Siona yo nariti mburu he.

12Abakindo zegino watadu boro sa dagba araki zegino dunduko aberã nga pa gu pai nga irafudifudipai watadu iravura nikarengba ka rima ti angbadimo bakporo Yerusarema te.

13Gere adu tipa gu ingapai nga ga gaha anebi na tipa gu irairaapai nga ga gaha aboromotumo, naauka kure ruru aboro ku rogo ho yo.

14I ata wa iravurari ngba agene bakporo, i agbarasi tiyo na kure, ka boro arengba nga na zada gayo aroko be he ya.

15Akumba akpari fu yo, ki ya, “Oni gúari! Birikobiriko he! Oni gúari! Oni gúari! Ka oni zádi nga ha ya!” Si au i ki sa tiyo wa merẽmerẽ aboro ni nungunungu aboro. Aboro ki ya dagba arikaaboro yo, “I aráka nga dagba rani berewe te.”

16Yekova ni tiko gbandaka yo, ko abérã nga pa yo berewe te. I airisa nga aboromotumo te, i ayugo nga wenepai fu abaakumba a te.

17Bangirani ambu wa ani angere tipa undahe vurũ. Ti rago gaani ngera ani angere tipa rikaaboro naarengba nga na batasa rani ya.

18Akumba ambu nga pe fuo rani te, si du ani arengba nga ti ni na ta rogo gaani agene bakporo ya. Digida gaani pai ada; gaani auru ni gedigedi he; bambiko digida gaani pai da.

19Abado fuo rani aipi susi adingimo ari yo; i ado rani ri abaagangara yo, i asungudi rani ngbakungba yo.

20Gu onga du õrani yo, nga ga Yekova mbedimbedi ni, i di he ku rogo gayo adue yo; nga gu ni ani niya tipa ni, “Tii nzereme ni yo ani ka raka ni dagba rikaaboro.”

21Ako aboro Edome, oni ngí ki du na ngbarago, nga agu roni naraka ringara Uza yo. Ono inga asúsa koyo du oni ni a; oni akpí imekakue, ki uru gaoni aroko ki du ni kundiri roni.

22Ako aboro Siona, mbusa gaoni irairapai nyasi, ko azía nga roni berewe ni zizi aboro te; Ako aboro Edome, ko ambúsa roni tipa gaoni irairapai, ko akúsa pa gaoni ingaapai.

← Chapter 3 Jump to: Chapter 5 →