Lamentations 5

Zande

← Chapter 4 Jump to:

1Ako Yekova, nga gu pai naye ku ri rani. Mo ngére, ki bi nga gaani gbarasarimo!

2I sa gaani ũkumbo fu kungba aboro, gaani akporo fu akare.

3Ani nga awirinyaure, abarani akpiki dũ, anarani ki du ni adekurugbo.

4Ani nambira kina gu ime ani angbe ni marã. Ani nangbe gaani nyake a.

5I namanga rani nyanyaki na gonga ti gororani, ani mbu, ongoda ti rani te.

6Ani zi berani na aEzipeto, na aAsura ka bi riahe rengbe.

7Abarani mangi ingapai, ka i adu nga ho berewe ya, ono ani nakpida pa gayo irairaapai.

8Akanga nazoga rani, boro du nga ho sa ka batasi rani be yo te.

9Ani nabi gaani riahe be dungbaapai be kpio, be gu basape du ngbakungba yo.

10Kpotorani fafoi wa vuru gbigiwi yo, be gu faarago nga ga gberãngbi.

11I namanga ade Siona yo, na ngasu ade rogo ga aYudo abaakporo.

12I naasa abazogo ku ari ti abeyo, i airisa nga abaakumba te.

13I nasosoda paranga akumba i sa ahe; akumbagude ki nikotoko be tindiro nyake.

14Gbinza akumba mbu pa sunga ngbadimo bakporo yo, paranga akumba mbu pa taka gayo ũworo ahe.

15Gu ngbarago du kpotorani yo si nyasi; gaani dogbere sa tihe ku rogo kpenunga.

16Kpakpari irisa tiwi ri rani yo; rungo du fu rani, bambiko ani mangi ingapai!

17Bambiko gere he amaka rani ti ni kpotorani yo; bangirani ki du tataita be agi apai re,

18bambiko Bagangara Siona du ngbakungba yo kina ahúa nata ri he.

19Ako Yekova, ono mo nazoga rago nye anye kindi; ga mbatabakindo nye fu gu rikaaboro ki du fu gu kura rikaaboro.

20Tipagine go bangiro ti ni ti rani kindi? tipagine mbu mo rani ti ni were tipa gbanga rago?

21Ako Yekova, mo káraga rani koyo du mo ni berewe, si du ani ka karaga tirani ti ni! Mo mbákaai pa gaani arame berewe a wa si adu mbata!

22Watadu mo ginaiga rani agindiga ni rengo? mo zingi kuti rani gbe?

← Chapter 4 Jump to: