Luke 17

Zande

← Chapter 16 Jump to: Chapter 18 →

1Yesu ki ya fu gako abawiriki, “Agu apai aboro nakota mbiko ho ka si he nga ye te; ono rungo du fu gu ni gu pai ka ye be ni re!

2Si ka ngba tipa ni i vo kikii mbi asa ahe kuti goni, ki ba ni ku baime yo, ti manga ni gu ni sa dagba gi rukutu yo re ni koto.

3Oni bánda tironi abanda, ka wirinamo ingi pai kuti ro, mo ki za ni; ka ni sa gani berã, mo ki vu ni ti ni.

4Ka ni ingi kuti ro bara saba na uru, ki sa tini berewe bara saba, niya, ‘Mi sa gi berã,’ mo ki vu ni avu.”

5Amokedi ki ya fu Gbia, “Mo kíisi gaani idapase.”

6Gbia ki ya, “Ka gaoni idapase du wa tunga musutada, ka oni aya fu gi ngua re, ‘I mó ro ki rũ ro baime yo;’ ka si agia sangbaro.

7“Ono da dagba roni ka du na gu moyambu nasopa bino watadu banda akandoro, ni ka ya fu ni, ho ni ka ye ni ati yo, ‘Mo yé ki sungu ni ba sa?’

8Ono ni aya fu ni, ‘Mo mbákadi ahe mi ri he, mo ki tapa tiro, ki niru pati re daho mi ka ri he ni ki mbiri he; fuo gure mo ki ri riahe ki mbiri he,’ te?

9Ni natambua gu moyambu re bambiko ni amangi he wa i arugu ni?

10Kina wo, ho oni amangi ahe ni dunduko wa i arugu roni ti ni, oni yá tigaoni, ‘Ani nga mumungo amoyambu; ani mangi kina gu nga gaani pai.’ ”

11Si ki ta du wa gere, wa i andu ku Yerusarema yo, ko ki susi rogo Somorona na Gariraya.

12Wa ko arimi ku rogo gu kporo, akumba ki gbia ko bawe naakaza be ngbataka, i ki ru koyo tuturũ.

13I ki poi ku ari, niya, “Yesu, Baira, mo íni pai fu rani.”

14Ho ko abi yo ni, ko ki ya fu yo, “Oni ndú ki yugu tironi fu aboromotumo.” Si ki ta du wa gere, wa i andu, i ki hu ahu be gayo ngbataka.

15Gu ni sa dagba yo, ho ni abi he ni ya ni hu, ni ki sa tini, ki irisi Mbori ni bakere fugo;

16ni ki ta vagada pati nduko, nitambua ko; ni nangia boro Somorona.

17Yesu ki karaga ha ki ya, “I ahusa nga yo bawe te? ono agu yo ribua i wari?

18A nga agu yo niye ka fu taarimo fu Mbori fuo kina gi uro te re?”

19Ko ki ya fu ni, “Mo rú ku ari, ki ga; ga idapase batasi ro.”

20Ho aFarusi asana Yesu ni ya ni gini rago ga Mbori ngbi ka ye, ko akaraga ha ki ya, “Ga Mbori ngbi aye nga ni ngera nganganga te.

21I agumba nga, ‘Mo bí, si erẽ!’ na, ‘Si yore!’ te, bambiko ga Mbori ngbi du kpotoroni yo.”

22Ko ki ya fu gako abawiriki, “Rago nikada, ho oni akpi nyemu ka bi gu rago ni sa nga ga Wiri boro, oni abí nga ha te.

23I ki ya fu roni, ‘Oni bí, yore!’ ‘Oni bí, erẽ!’ Ka oni ndú nga fuo yo ka peka yo ya.

24Bambiko wa we gumba naikpira ni gbanga ha ngbangbaturũ yo; kina wo Wiri boro ka du rogo gako rago.

25Ono ko ka hi dungu apai mbata, gi rika aboro re nikambu ko.

26Wa si adu rago Noa, kina wo si ka du rago Wiri boro.

27I ari riahe, ki mbiri he, i arogo ade, i ki fu ade i rogo yo, daho Noa arimi ni ku rogo bakere kurungba, bakere ime ki hiki ahika na ngbi dunduko, ki gbarasi yo dunduko.

28Kina wo si adu ti rago Roto ― i ari riahe, ki mbiri he, i angbe he, i abagi he, i arú he, i adudua ahe;

29ono ni gu rago Roto akuru Sodoma yo we ana ngbangbaturũ yo na ambia, si ki gbarasi yo dunduko―

30rago yugo Wiri boro nikadu kina wo.

31Ni gu rago re, gu ni ka du ri bambu yo, gani ahe ki du dimo yo, ka ni zórõ nga ka roga ahe ya; gu ni ka du ati yo a, ka ni káraga nga tini ya.

32Oni tíngidi pa dia Roto.

33Gu ni ka kpi nyemu batasa ungani, ni aíngisa ha aingisa. Ono gu ni nikaingisa ungani ni abátasa ha abatasa.

34Ya mi fu roni wẽ, ni gu yuru re akumba ue apí auru barame sa; i adía gu ni, i ki he gu ni.

35Ade ue amongo sa ahe; i adía gu ni, i ki he gu ni. [

36Akumba ue adú ati yo; i adía gu ni, i ki he gu ni.”]

37I ki karaga ha ki ya fu ko, “Wari Gbia?” Ko ki ya fu yo, “Ho kangba ka du ni, yo anguku nikadungura tira ku ho ni.”

← Chapter 16 Jump to: Chapter 18 →

Recommended Reading

Commentary Luke Commentaries → Devotional Luke Devotional Guide → Get This Bible Zande Study Bible →