bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Zande
/
Zande
/
Luke 9
Luke 9
Zande
← Chapter 8
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 10 →
1
Yesu ki yambu agu yo nanidu bawe na ue koyo du ko ni, ki fu tandu fu yo ki asia pa adaimona fu yo na ka husa akaza.
2
Ko ki kedi yo ka tungusa pa ga Mbori ngb na ka husa agu yo du na kaza.
3
Ko ki ya fu yo, “Ka oni dí nga he tipa gaoni nunguro ya, ngbondo te, mangu te, riahe te, na marã a te; ka baukadi dú nga be roni ni ba ue a ya.
4
Gu bambu oni ka rima ku rogo ho, oni ki sungu ho, ki niguari yo.
5
Agu yo ka dia nga roni ku gume ya, ho oni ka niguari ni rogo gu bakporo re, oni ki zanzia nvutu ti nduroni ni yugopai kuti yo.”
6
I ki guari ki ta merã ku rogo akporo, nitungusi wene pangbanga, ki nihusi akaza rogo rago dunduko.
7
Were Erode nangia bazogo agi pa agu apai namangi dunduko. Ko ki nibaki bangiriko ti ni gbe, bambiko agu aboro agumba ha ya Yoane azingi be kpio;
8
agu yo ki ya si ngia Eriya ada, akura yo ki ya gu ni dagba agu anebi nadu mbata zingi be kpio.
9
Erode ki ya, “Mi aima kata ri Yoane; ono da nga gi kumba mi agia pako re?” Ko ki nikpi nyemu ka bi ko.
10
Ho amokedi ayega ni, i ki gumba pa agu apai fu Yesu i amanga. Ko ki rogo yo ki ndu na yo ku bakporo yo rimoho nangia Betesaida.
11
Rimbasa aboro ki ta ina ha ki nipeke ko. Ko ki di yo ku gume, ki nigumba pa ga Mbori ngbi fu yo, agu yo naida hu be kaza ko ki husi yo.
12
Ho uru ati ni; agu yo nanidu bawe na ue ki ye, ki ya fu ko. “Mo ásia rimbasa, i ndu ku rogo akporo na ringara kirikiri pati yo, ka gbata barame, na riahe; bambiko ani du kina ngbakungba no.”
13
Ono ko ki ya fu yo, “Oni fú he fu yo i ri he.” I ki ya, “Kpokuta be rani kina bisue na atĩo ue ― kina gu ka ani ndu ki ningbeke riahe tipa gi rimbasa dunduko re.”
14
Bambiko i adu wa akumba 5,000. Yesu ki ya fu gako abawiriki, “Oni gúmba ha fu yo i susungu ku rogo rika yo wa aboro 50.”
15
I ki mangi he wo, ki rugu yo i susungu dunduko.
16
Ko ki di gu kpokuta nadu bisue na atĩo ue, ki ngere ku ari ki nifu tambuahe, ki nikuadi he; ki nifu he fu abawiriki i moi he barangba rimbasa.
17
I ki ri he, ki nimbiki dunduko. I ki dungura gu mbusuruhe nanye be yo, abaga ki du bawe na ue.
18
Si ki ta du wa gere, wa Yesu akpara ni sa ko, abawiriki ki du na ko; ko ki ta sana yo niya. “Rimbasa aboro niya da nga mi?”
19
I ki karaga ha niya, “Yoane Babapatiza; ono kura yo naya, Eriya; kura yo ki ya, gu ni dagba agu anebi nadu mbata zingi be kpio.”
20
Ko ki gumba ha fu yo, “Ya oni tigaoni, da nga mi?” Petero ki karaga ha ki ya, “Ga Mbori Kristo nga mo.”
21
Ono Yesu ki rugu yo ya, ka i gumba nga gere fu boro wa sa ya;
22
ki niya, “Wiri boro ka hi dungu apai, ga aYudo abaakumba ki basa pako na abairamotumo na abakeapai, i ki imi ko, ko ki zingi be kpio ti biata rame.”
23
Ko ki ya fu yo, “Gu ni nakpi nyemu peka re ni mbu gani apai, ki tumba gani wagiwagi ngua na uru, ki nipeke re.
24
Bambiko gu ni nakpi nyemu batasa ungani ni aíngisa ha aingisa; na gu ni ka ingisa ungani tipa re, ni abátasa ha abatasa.
25
Bambiko gini u du ti kumuko boro na gi zegino dunduko re, ki ingisi tini?
26
Bambiko gu ni ka zee amanga ni amanga tipa re na gimi apai, zee amanga Wiri boro amanga tipa ni, ho ko ka ye ni rogo gako taarimo na ga Bako na ga ziazia amaraika.
27
Ono mi nagumba ha fu roni ni rengo, agu yo kina dagba agu aboro ru erẽ, nikaakpi nga ya daho i ka bi ga Mbori ngbi ni.”
28
Si ki ta du wa gere rame ki du muambi fuo agi apai re, ko ki rogo aPetero na Yoane na Yakoba, ki nindu ku ri bagangara yo ka kpara.
29
Wa ko akpara, kpakpuko ki sa tihe, gako remu ki vuru avura wa imarago.
30
Oni ngére, aboro ue ki fura na ko nangia aMose na Eriya;
31
i aye rogo imarago ka gumba pa gu kpio ko ka kpi Yerusarema yo.
32
Were aPetero na agu yo nadu na ko i ki yukura be rame. Ho i azingi ni rame yo, i ki bi ga Yesu imarago na agu akumba naru na ko ue.
33
Si ki ta du wa gere wa i aye ka ga pati ko, Petero ki ya fu Yesu, “Baira, du ani erẽ angba ti rani a; ani dudua abasura biata; gamo sa, ga Mose sa, ga Eriya a sa.” Ka ko aina nga gu pai ko agumba ya.
34
Wa ko agumba agi apai re, mai ki ye ku ba ri yo: i ki gunde agunde wa i arimi ku rogo mai.
35
Fugo ki poi mai yo, ki ya, “Wire du re, nyemuko ti re gbe; oni gi pako!”
36
Ho fugo asusi ni, i abi kina Yesu ni sa ko. I agumba nga pa agu apai bi yo wa sa te fu aboro ti gu rago re.
37
Si ki ta du wa gere, ho i azorõ ni ri bagangara yo wiso, bakere rimbasa ki gbia ko.
38
Mo ngére, kumba adu rimbasa yo ko ki poi ku ari, ki ya, “Bayugupai, mi nazungadi ro mo bi wire; bambiko bangisa wire nga ko.
39
Mo ngére, wa toro nazia ko, ko nakpara ni ba sa; u naba ko aba, fuge ki nigbadi ngbako, u ki guari ti ko nimburu ko ambura gbe.
40
Mi ki zungadi gamo abawiriki i do ru; ka omeyo arengba nga na u ya.”
41
Yesu ki karaga ha ki ya, “Ako keretukeretu rika aboro nazanga idapase, ani araka na oni ki ini pai fu roni da wari? Mo yé na wiro kono du mi ni.”
42
Ko ki ta ye, daimona ki ba ko ku sende, ki fu imawirianya fu ko gbe. Ono Yesu ki za gbigbita toro, ki nihusi gude, ki nigasi ko fu bako.
43
Si airiwo airiwo ti yo dunduko tipa ga Mbori bakere tandu. Ono wa i akiga dunduko mbiko agu apai ko amangi he dunduko, ko ki ya fu gako abawiriki,
44
“Oni ídi agi apai re si rimi ku rogo turoni; bambiko i afú Wiri boro ku be aboro.”
45
Ka i aruga nga tiyo na gu pai re ya, si adu ni okooko ho ti yo, ka i aina nga ha ya; i ki nigunde agunde ti sana ko.
46
I ki ta paa apaa dagba yo niya da nga bakumbayo.
47
Ono ho Yesu aini he ni ya i nasaka pai ngbaduyo yo, ko ki di toni gude ki moi ko pati ko.
48
Ko ki ya fu yo, “Gu ni ka di gi toni gude re ku gume ni rimore ni ka di re ku gume; gu ni ka di re ku gume ni nadia gu ko nakedi re ku gume; bambiko gu ni du ni toni ni dagba roni dunduko, ni nga bakumbaroni.”
49
Yoane ki karaga ha ki ya, “Baira, ani abi boro ni nidandi adaimona ni rimoro; ani ki za ni, bambiko ni apeka nga rani te.”
50
Yesu ki ya fu ko, “Ka mo zá nga ni ya; bambiko gu ni ka du nga ni vuraroni ya ni du adu fu roni.”
51
Si ki ta du wa gere, ho rame ambedi ni tipa dia ko ku ngbangbaturũ yo, ko ki sa kpakpuko kindi ka ndu ku Yerusarema yo,
52
ko ki kedi asunge ku mbata yo. I ki ndu ki nirimi ku rogo gu kporo nga ga aSomorono, ka mbakada ba tipa ko.
53
Aboro adia nga ko ku gume te, bambiko kpakpuko adu wa ko nasusa asusa ku Yerusarema yo.
54
Ho a Yoane abi he ni na Yakoba, nangia gako abawiriki, i ki ya, “Gbia mo ídi he ani yambu we si zorõ ngbangbaturũ yo ka gbarasa yo?”
55
Ko ki sa tiko, ki za yo.
56
I ki ndu ku rogo gu kura kporo.
57
Wa i amerẽ gene, gu boro ki ya fu ko. “Mi apéka ro rogo arago dunduko.”
58
Yesu ki ya fu ko, “Agu anya nasunga rogo yaro, azire ari yo ki sungu rogo angua: ono ba adu nga be Wiri boro ka ko pi auru he wa sa te.”
59
Ko ki ya fu gu kura ni, “Mo nipéke re.” Ko ki ya, “Gbia, mo ídi he fere mi ndu ka kpisida buba mbata.”
60
Yesu ki ya fu ko, “Mo he kangba aboro i ki kpisidi gayo kangba aboro; ono mo ndú ka tungusa pa ga Mbori ngbi rogo arago dunduko”
61
Kura ni ki ya a, “Mi apéka ro. Gbia; ono mo ídi he fere mi sanango agu yo du kpure yo mbata.”
62
Ono Yesu ki ya fu ko, “A nga gu ni sa ka ni nadia sunge ku beni ki ngere ku sa yo, ka re na rima ku rogo ga Mbori ngbi yo te.”
← Chapter 8
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 10 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24