Luke 23

Zande

← Chapter 22 Jump to: Chapter 24 →

1Rimbasa yo ki guari dunduko, ki niye na Yesu koyo du Pirato ni.

2I ki tona ka kita ngbanga ko, niya, “Ani abi gi kumba re ko airasi ngbatungarani, ki za yo ti ru he fu Kaisara, ki ya ko tigako nga Kristo nangia bakindo.”

3Pirato ki sana ko, niya, “Bakindo aYudo nga mo?” Yesu ki karaga ha ki ya fu ko, “A si mo agumba ha re.”

4Pirato ki ya fu abairamo tumo na fu rimbasa aboro, “Mi abi nga iraira apai ti gi kumba te re.”

5I ki gumba ha bakere ti gu nadu mbata, niya, “Ko nagumba pai ni soki fu aboro, ki niyugu pai rogo ringara Yuda yo dunduko, tona Gariraya yo ki da kina ku rogo gi rago re.”

6Ono ho Pirato agi he ni, ko ki sana yo ya boro Gariraya nangia gi kumba re.

7Ho ko aini he ni ya ko dagba agu yo Erode nazogo yo, ko ki kedi ko koyo du Erode ni, bambiko Erode adu Yerusarema yo a tigako ni gu rago re.

8Were ho Erode abi Yesu ni si ki ngba ti ko gbe; bambiko ko akpi nyemu bi ko mbata gbe, bambiko ko agi pai tipa ko; ko aidi ka bi ko ko nimangi gu pai i aina pai ti ni.

9Erode ki sana ko ni dungu apai; ono Yesu akaraga nga pai fu ko wa sa te.

10Abairamotumo ki ru ho na abakeapai, ki nikiti ngbanga ko gbe.

11Erode ki payasi ko na gako abanzengere, ki sawia ko, ki ta ukadi ko ni ngenzerengenzere remu ki kedi ko koyo du Pirato ni berewe.

12Erode na Pirato ki zi badia dagba yo ni kina gu rago re; bambiko mbata i adu na sogote dagba yo.

13Pirato ki yambu abairamotumo na abazogo na aboro,

14ko ki ya fu yo, “Oni aye na gi kumba re kono du mi ni, niya ko nairasi aboro. Oni ngére, wa oni akiti ngbanga ko, mi wisigi pa ko barangba roni ka mi abi nga iraira pai ti gi kumba re wa sa ya;

15na Erode a te; bambiko ko akedi ko kono du ani ni berewe. Oni ngére, ko amanga nga pai rengbe na kpio te.

16Si du mi nikata ko ata ti ni ki nikusi ko.” [

17Bambiko gako pai nangia kusa gu kisikisi boro fu yo sa rago pumbo.]

18Were i ki poi ku ari kina ku bani dunduko niya, “Mo gbárasi gi kumba re ki kusi Baraba fu rani―”

19nga gu ko i akisi ko bambukisa yo bambiko ko asa mungu bakporo yo, ki imi boro a.

20Pirato ki gumba pai fu yo berewe wa ko akpi nyemu ka kusa Yesu;

21ono i ki poi ku ari, niya, “Mo wági ko, mo wági ko.”

22Ko ki ya fu yo ni biata ha, “Tipagine, gini gbegberẽpai gi kumba amangi he re? Mi abi nga pai ti ko rengbe na kpio te; si du mi nikata ko ata ti ni ki nikusi ko.”

23Ono i azungia ko ni bakere fugo, nisana he ya ko wagi ko, fugoyo ki susi.

24Pirato ki gumba ha ya i mangi gu pai i asana he tipa ha.

25Ko ki kusi gu ni i akisi ni bambukisa yo bambiko ni asa mungu niimi boro, nga gu ni i asana ko tipa ni; ono ko afu Yesu kuti sangbayo.

26Ho i andu ni na Yesu, i ki zi Simona nangia boro Kurene, wa ko aye ringara yo, i ki fu wagiwagi ngua fu ko, ko tindi he fuo Yesu.

27Bakere rimbasa aboro ki peke ko gbe, na ade a, i ki kpari ni aume nungako ki mangi yo.

28Ono Yesu ki sa tiko fuo yo ki ya, “Awiri Yerusarema, ka oni kpári nga tipa re ya, ono oni kpári tipa tironi na awironi.

29Bambiko rago nambeda ho i ka ya ni, ‘De maku nga irazangada na gu rukumbu avunga nga ya na gu momuse ata fu nga mai ya!’

30Ni gu rago re i atóna gumba fu abaagangara, ‘Oni tiwi ku auru rani’; na fu agangara, ‘Oni dadi rani.’

31Bambiko ka i mangi agi apai re ho du ngua ni ni iwa ha, gine ka manga ho si ka du ni ni ugu he?”

32Kura aboro ki du ho ue, ni amangi gbegberẽpai, i ki ndu na yo a ka imo yo na ko.

33Ho i ada ni ku rogo gu ba i aya ti ni Memeri, i ki wagi ko yo na amangi gbegberẽpai, gu ni ku kumba beko yo, gu ni ku gare.

34Yesu ki ya, “Buba, mo vú yo; bambiko i aina nga gu pai i amanga te re.” I ki kparaka gako remu ki niba ake ti ni.

35Aboro ki ta ru ho ningere. Abazogo ki momu ko a, niya, “Ko abatasi kura aboro; ka ngia Kristo nga ko nga ga Mbori siasia ko, ko bátasi tiko.”

36Abanzengere ki sawia ko a, niye koyo du ko ni, ki niyugu kakai imekakuefuko,

37ki ya, “Si ngia Bakindo aYudo nga mo, mo bátasi tiro.”

38Pai ki du ni keke he ba riko, Bakindo aYudo nga gi ko re.

39Gu ni sa dagba agu amangi gbegberẽpai i awagi yo na ko, ki senge ko, niya, “A nga Kristo nga mo te? Mo bátasi tiro na ani a!”

40Ono gu ni ki karaga ha ki ta za ni niya, “Mo agunde nga be Mbori te wa i ambusi ro wa kina ko?

41Gaani mbusa ru aru; bambiko ani nadia mosoro tipa gaani mangaapai. Ono gi kumba ainga nga pai wa sa te re.”

42Ko ki ya, “Yesu, mo tíngidi pa re ho mo ka da ni ku rogo ga ngbi.”

43Yesu ki ya fu ko, “Ya mi foro ni rengo, areme, ani adú na mo Paradiso yo.”

44Bebere uru bitimo ki ye ku auru kpotosende dati saa biata nga ga nyemu,

45ima uru ki kpa. Gu remu nadu yekaru yo, si ki siri rogo ue.

46Ho Yesu apoi ni ku ari ni bakere fugo, ko ki ya, “Buba, mi fu torore ku bero!” Ho ko agumba gi ni re, ko ki fu toroko.

47Ho barukuri aboro 100 abi gi ni re, ko ki taasi rimo Mbori, niya, “Ruru kumba nangia gi ko re ni rengo!”

48Gu rimbasa aboro dunduko natiria ka bi gu pai re, ho i abi agu apai namangi ni, i ki karaga tiyo nita ngbaduyo.

49Agu yo naini ko dunduko, na agu ade naapeka ko Gariraya yo, i ki ru tuturu, nibi agi apai re.

50Kumba adu yo rimoko nangia Yosefa nangia boro Arimataya. Ko ki du ni weneringiko, ni ruru ko a. Ko ki ningere tipa ye ga Mbori ngbi. Ko adu dagba ga aYudo abororondo, ono ko aida nga pa gayo rondo te, na gu pai i amangi a te.

52Gi kumba andu re koyo du Pirato ni, ki sana ko tipa kangba Yesu.

53Ko ki zogo kangbako, ki nikãi he ni remu, ki pigi he rogo murã i age he ti mbia, nga gu i ata piga nga boro rogo ho mbata te.

54Rago Mbakadaahe nadu, rago sabiti ki nimbedi.

55Agu ade naye na Yesu Gariraya yo, i ki peke Yosefa, ki nibi murã, na wa i apigi kangba Yesu.

56I ki karaga tiyo ki mbakadi wene fuõangua na fuõnzeme. I ki ongodi rago sabiti ku sangba rugute yo.

← Chapter 22 Jump to: Chapter 24 →