1 John 2

Ahirani (आहिराणी नवा करार) - No Year

← Chapter 1 Jump to: Chapter 3 →

1मना पोरसहोण, मी तुमले एनासाठे लिखस, कि तुमी पाप नई करोत. पण कदी कोणी पाप करस, त परमेश्वर बाप ना जोळे आमना साठे एक मदत करणार शे, म्हणजे धर्मी येशु ख्रिस्त.

2आणि ख्रिस्त स्वताच आमना पापस्ना प्रायश्चित्त साठे बलिदान बनना आणि फक्त आमनाच नई, पण जग ना सर्वा लोकस साठे बी.

3कदी आमी परमेश्वर नि आदन्यास्ले मानसुत, त एना कण आमले हय समजी जास कि आमी तेले वयखतस.

4जो कोणी हय सांगतस, कि त्या तेले वयखतस पण तेनी आदन्यास्ले नई मानत. त्या खोटा शेतस, आणि परमेश्वर ना सत्य ना नुसार नई जीतस.

5जो कोणी तेना वचन ले माणस, तेस्ना मा परमेश्वर ना प्रेम खरज सिद्ध हुयेल शे. एना कण आमले माहिती पळस कि आमी तेनामा शेतस.

6जो कोणी हय सांगस, कि मी परमेश्वर मा बनेल ऱ्हास, तेस्ले असा जीवन जगाले पाहिजे जसा येशु ख्रिस्त नि जग.

7मना प्रिय मित्रसहोण, मी तुमले कोणती नवी आदन्या नई लिखत, हय तीच जुनी आदन्या शे जी सुरुवात पासून तुमले भेटेल शे. हय जुनी आदन्या तो वचन शे, जेले तुमी पहिलेच पासून आयकी लीयेल शेतस.

8तरी बी, जी आदन्या मी तुमले लिखी ऱ्हायनु ती नवी शे, एना खरापण ख्रिस्त मा आणि तुमना मा दिखेल शे. कारण कि अंधकार जात ऱ्हास आणि खरा उजाया चामकाले लागेल शे.

9जो कोणी हय सांगस, कि त्या उजाया मा ऱ्हातस आणि आपला विश्वासी भावूस संगे बैर ठेवस, त्या आते लगून अंधकार माच ऱ्हाय ऱ्हायनात.

10जो कोणी आपला विश्वासी भावूस संगे प्रेम ठेवतस, त्या उजाया मा ऱ्हातस. ह्या मुळे तेस्ना मा अस काहीच नई शे जे दुसरास्ले पाप मा पाळाना कारण बनो.

11पण जो कोणी आपला विश्वासी भावूस संगे बैर ठेवतस, त्या अंधकार मा शेतस. त्या त्या मा चालतस आणि नई मालूम कि कोठे जास, कारण कि अंधकार नि तेस्ले अंधा करी टाकेल शे.

12ओ पोरसहोण, मी तुमले एनासाठे लिखस, कारण कि तुमना पाप येशु ख्रिस्त ना नाव कण माफ करामा एयेल शे.

13ओ बापसहोण, मी तुमले एनासाठे लिखस, कारण कि तुमी तेले वयखतस जो सुरुवात पासून शे. ओ जवानसहोण, मी तुमले एनासाठे लिखस, कि तुमी त्या द्रुष्ट ले हराई टाकेल शे. ओ पोरसहोण, मी तुमले एनासाठे लिखस, कारण कि तुमी परमेश्वर बाप ले वयखतस.

14ओ बापसहोण, मी तुमले एनासाठे लिखेल शे, कारण कि तुमी तेले वयखतस जो सुरुवात पासून मा शे. ओ जवानसहोण, मी तुमले एनासाठे लिखेल शे, कारण कि तुमी शक्तिशाली शेतस, आणि परमेश्वर ना वचन तुमना मा ऱ्हास, आणि तुमी दुष्ट सैतान ले हाराई टाकेल शे.

15तुमी नईत जग संगे आणि नईत जग नि वस्तूस संगे प्रेम ठेवज्यात, कदी कोणी जग संगे प्रेम ठेवस, त तेनामा परमेश्वर ना प्रेम नई शे.

16कारण कि जे काही जग ना शे, म्हणजे-पापमय शरीर ना वासना, आणि डोयास्नि वासना आणि धन संपत्ती ना गर्व, हय सगळ परमेश्वर बाप कळून नई शे, पण जग कळून शे.

17जग आणि जग ना सर्वा अभिलाषा सराव शे, पण जो कोणी परमेश्वर नि ईच्छा ले पुरी करस, तो कायम जित्ता राहीन.

18ओ पोरसहोण, शेवट जोळे शे, तुमले सांगामा एयेल होत कि ख्रिस्त ना विरोधी एणार शे, आणि आते ख्रिस्त ना गैरा विरोधी उठी उभा ऱ्हायेल शेतस, एना कण आमले माहिती पळस कि शेवट जोळे शे.

19त्या ख्रिस्त विरोधी लोक आमना मधून नई शेतस एनासाठे त्या आमले सोळीसन चालना ग्यात, कदी त्या आमना मधला ऱ्हातात त त्या आमना संगे थांबनात, पण त्या निघीग्यात एनासाठे कि हय प्रगट होवो कि त्या आमना मधला नई शेतस.

20पण तुमी सर्वास्ना ख्रिस्त ना द्वारे पवित्र आत्मा कण अभिषेक हुएल शे. आणि सगळ सत्य तुमले माहिती शे.

21मी तुमले एनासाठे नई लिखत, कि तुमी सत्य ले नई वयखतस, पण एनासाठे, कि तुमी वयखतस, आणि तुमले हय बी माहती शे कि कोणतीच लबाळी, सत्य कळून नई.

22त मंग लबाळ कोण शे? त्या ह्या शेतस ज्या सांगतस कि येशु ख्रिस्त नई शे. असा लोक ख्रिस्त ना विरोधी शेतस, त्या परमेश्वर बाप आणि पुत्र दोनी ना नकार करस.

23जो कोणी पुत्र ना नकार करस तो परमेश्वर बाप ना बी नकार करस, आणि जो कोणी पुत्र ले स्वीकार करस, तो परमेश्वर बाप ले बी स्वीकार करस.

24सत्य ना संदेश तुमना मा सदा बनेल राहो जो तुमी सुरुवात पासून आयकेल होत. कदी ते वचन तुमना मा सदा ऱ्हास, त तुमी बी पुत्र मा आणि बाप मा सदा राहाश्यात.

25परमेश्वर नि करार दियेल शे कि तो आमले कायम ना जीवन दिन.

26मी तुमले ह्या गोष्टी त्या लोकस पासून सावधान राहणा विषय मा लिखेल शे, ज्या तुमले बहकावतस.

27पण तुमना साठे, पवित्र आत्मा, जो तुमले ख्रिस्त पासून भेटेल शे, तुमना मा सदा ऱ्हास. आणि पवित्र आत्मा मुळे तुमले गरज नई कि कोणी तुमले सिखाळो. कारणी कि तेनी आत्मा तुमले सर्व्या गरजस्ना गोष्टीस्ले शिकाळस आणि जे काही तो शिकाळस ते खर शे खोट नई. पवित्र आत्मा नि शिक्षा ले मानत ख्रिस्त मा सदा राहा.

28म्हणून आते, ओ पोरसहोण, ख्रिस्त मा सदा बनेल राहा. जेना कण जव तो प्रगट होवो त आमले पुरा विश्वास हुई जावो आणि तेना एवावर तेना समोर आमले लज्जित नई होण पळो.

29जर तुमले माहिती शे कि ख्रिस्त धर्मी शे, त तुमी हय बी समजी ल्या कि ज्या कोणी धर्म ना काम करतस, त्या परमेश्वर ना पोर शेतस.

← Chapter 1 Jump to: Chapter 3 →