1 John 4

Ahirani (आहिराणी नवा करार) - No Year

← Chapter 3 Jump to: Chapter 5 →

1ओ प्रिय मित्रसहोण, प्रत्येकस वर विश्वास नका करज्यात ज्या हक्क कण सांगतस कि तेस्ना मा परमेश्वर ना आत्मा शे, असास्ले वयखा कि जो आत्मा तेस्ना मा शे तो परमेश्वर ना शे कि नई, कारण कि गैराच खोटा भविष्यद्वक्ता जग मा निघी उभा हुई जायेल शेतस.

2परमेश्वर नि आत्मा तुमी ह्या प्रमाणे वयखी सकतस, जो कोणी हय मानी लेस कि येशु ख्रिस्त शरीर ना रूप धारण करीसन एयेल होता, त तेनामा तो आत्मा शे जो परमेश्वर कळून शे.

3आणि जो कोणी येशु ना बारामा हय नई मानी लेत कि येशु ख्रिस्त शरीर ना रूप धारण करीसन एयेल होता, त तेनामा परमेश्वर ना आत्मा नई शे. जो आत्मा तेनामा शे तो ख्रिस्त ना विरोधी शे. तुमनी आयकेल शे कि तो एणार शे आणि आते बी जग मा शे.

4ओ मना पोरसहोण, तुमी परमेश्वर ना शेतस, आणि तुमी खोटा भविष्यद्वक्तास्ले हारायेल शेतस, कारण कि जो आत्मा तुमना मा शे, तो त्या आत्मा तून मोठा शे जो संसार मा शे.

5त्या खोटा भविष्यद्वक्ता जग ना बारामा गोष्टी करतस, आणि ह्या जग ना लोक तेस्नी आयकतस कारण कि त्या जग ना शेतस.

6पण आमी परमेश्वर ना शेतस, जो कोणी परमेश्वर ले वयखस तो आमनी आयकस, जो परमेश्वर ले नई वयखत तो आमनी नई आयकत. ह्या प्रकारे आमी सत्य नि आत्मा आणि भ्रम नि आत्मा ले वयखी लेतस.

7ओ मना प्रिय मित्रसहोण, आमी आपस मा प्रेम ठेवाले पाहिजे, कारण कि प्रेम परमेश्वर पासून शे. जो कोणी प्रेम करस तो परमेश्वर ना पोऱ्या शे आणि परमेश्वर ले वयखस.

8जो कोणी प्रेम नई करत, तो परमेश्वर ले नई वयखत, कारण कि परमेश्वर प्रेम शे.

9आणि परमेश्वर ना प्रेम एना कण प्रगट होस कि तेनी आपला एकुलता पुत्र ले आमना साठे जग मा धाळ कि आमले तेना द्वारे कायम ना जीवन भेटो.

10खरा प्रेम हवू शे कि, आमी परमेश्वर संगे नई पण परमेश्वर नि आमना वर प्रेम कर. आणि परमेश्वर नि आमना पापस्ना प्रायश्चित्त साठे आपला पुत्र ले धाळ.

11ओ मना प्रिय मित्रसहोण, कदी परमेश्वर नि आमना वर असा प्रेम करेल शे, त आमले बी एक दुसरास्वर प्रेम कराले पाहिजे.

12कोणीच परमेश्वर ले नई देख, पण कदी आमी एक दुसरास्वर प्रेम करतस, त परमेश्वर आमना मा सदा ऱ्हास, आणि तेना प्रेम आमना मा सिद्ध हुई जायेल शे.

13आमले माहिती शे कि आमी परमेश्वर मा राहातस आणि तो आमना मा, कारण कि तेनी आमले आपला आत्मा दियेल शे.

14आमी पुत्र ले देखी बी लीयेल शेतस आणि साक्ष देतस, कि परमेश्वर बाप नि पुत्र ले जग ना लोकस्ना तारणार होवा साठे धाळेल शे.

15जो कोणी मानी लेस कि येशु परमेश्वर ना पोऱ्या शे, तो परमेश्वर मा ऱ्हास, आणि परमेश्वर तेनामा सदा ऱ्हास.

16आणि आमले चांगल्या प्रकारे माहिती शे आणि विश्वास बी करतस कि परमेश्वर आमना संगे प्रेम करस, परमेश्वर प्रेम शे, आणि ज्या प्रेम मा बनेल राहातस, त्या परमेश्वर मा बनेल राहातस, आणि परमेश्वर तेस्ना मा बनेल ऱ्हास.

17आमना मा प्रेम या प्रकारे सिद्ध हुयेल शे, कि आमी न्याय ना दिन पुरा भरोसा ठेवी सकोत, कारण कि जसा ख्रिस्त शे तसाच ह्या जग मा आमी बी शेतस.

18प्रेम मा भीती नई राहात, पण सिद्ध प्रेम सर्वा प्रकार नि भीती ले दूर करी देस, एनासाठे जो भ्यास तेनामा प्रेम सिद्ध नई हुयना, कारण कि भीती संबंध दंड संगे शे.

19आमी परमेश्वर वर आणि दुसरास वर प्रेम करतस कारण कि पहिले परमेश्वर नि आमना वर प्रेम करेल शे.

20कदी आमी सांगतस कि आमी परमेश्वर संगे प्रेम ठेवतस, पण आपला विश्वासी भावू संगे बैर ठेवस, त आमी खोटा शेत. कारण कि डोया समोर ना आपला भावू वर जो प्रेम नई करत, त तो नई देखेल परमेश्वर वर प्रेम करू सकत नई.

21ख्रिस्त नि जी आदन्या आमले दियेल शे ती हय शे, जो कोणी त्या परमेश्वर वर प्रेम ठेवस, तो आपला विश्वासी भावू वर बी प्रेम ठेवो.

← Chapter 3 Jump to: Chapter 5 →