1 John 3

Ahirani (आहिराणी नवा करार) - No Year

← Chapter 2 Jump to: Chapter 4 →

1विचार करा परमेश्वर बाप नि आमना शी कितला प्रेम कर, तेना प्रेम इतला महान शे कि आमी परमेश्वर ना पोर म्हणावतस, आणि खरज शेत बी. एनामुळे जग ना लोक आमले वयखत नई, कारण कि तेनी परमेश्वर ले बी नई वयख.

2मना प्रिय मित्रसहोण, आते आमी परमेश्वर ना पोर शेतस, पण आते लगून स्पष्ट नई हुयन, कि आखो आमी काय बनसुत. पण आमले हय माहिती शे जव ख्रिस्त प्रगट हुईन आमी तेना सारखा होसुत, कारण कि आमी तेले तसाच देखसुत जसा तो खरज शे.

3प्रत्येक झन जो कोणी ख्रिस्त वर हय आशा ठेवतस तो स्वता ले पवित्र ठेवो, जसा ख्रिस्त पवित्र शे.

4जो कोणी पाप करस, तो परमेश्वर ना नियमले मानाले नकार देस, कारण कि पाप ना अर्थ परमेश्वर ना नियमले मानाले नकार करान शे.

5पण तुमले माहिती शे, कि ख्रिस्त एनासाठे प्रगट हुईना, कि तो आमले आमना पापस पासून मुक्त करी देवो, आणि तेनामा कोणताच पाप नई.

6एनासाठे प्रत्येक जो ख्रिस्त मा बनेल ऱ्हास, तो कायम पाप करत नई राहात, पण जो पाप करत ऱ्हास तेनी नईत ख्रिस्त ले देखेल शे आणि नईत ख्रिस्त ले वयखेल शे.

7ओ पोरसहोण, सावधान राहा कि कोणी तुमले बहकाई नई देवो, जो कोणी धार्मिकता ना काम करस तो धर्मी शे. तसाच जसा ख्रिस्त धर्मी शे.

8जो कोणी पाप करस तो सैतान कळून शे, कारण कि सैतान सुरुवात पासून पाप करत एयेल शे. परमेश्वर ना पोऱ्या एनाच मुळे प्रगट हुईना, कि सैतान ना कामस्ले नाश करो.

9जो कोणी परमेश्वर ना पोर शे त्या पाप नई करत, कारण कि परमेश्वर ना स्वभाव तेस्ना मा शे. एनासाठे तो पाप नई करू सकस कारण कि तो त परमेश्वर ना पोऱ्या शे.

10हवू स्पष्ट फरक शे परमेश्वर ना पोरस्मा आणि सैतान ना पोरस्मा. जो कोणी धार्मिकता ना काम नई करत आणि जो आपला भावूस संगे प्रेम नई ठेवस त्या परमेश्वर ना पोर नई शेतस.

11जो संदेश तुमनी सुरुवात पासून आयकेल शे तो हवू शे कि एक दुसरास्वर प्रेम करा.

12आदाम ना पोऱ्या काइन ना सारखा नका बना, जो त्या दुष्ट सैतान पासून होता, आणि तेनी आपला भावू ना हत्या करी टाकेल होती. काइन नि तेनी हत्या काब करी? कारण कि तेना स्वता ना काम वाईट होतात, पण ज्या काम तेना भावू हाबेल नि करेल होतात त्या धार्मिकता काम होतात.

13एनासाठे ओ भावूसहोण, कदी ह्या जग ना लोक तुमना वर बैर करतीन त आश्चर्य नका करज्यात.

14आमले माहिती शे कि आमी मोत नि सामर्थ्य कण सुटीसन जीवन मा पोहोची जायेल शेतस. कारण कि आमी आपला विश्वासी भावूस संगे प्रेम ठेवतस. जो कोणी प्रेम नई ठेवत, तो आते बी मोत नि सामर्थ्य ना अधिकार मा शे.

15जो कोणी आपला विश्वासी भावू संगे बैर ठेवस, त तो हत्यारा शे, आणि तुमले माहिती शे, कि कोणताच हत्यारा मा कायम ना जीवन नई ऱ्हास.

16येशु ख्रिस्त नि आमना साठे आपला जीव दिधा. ह्या मुळे प्रेम ना बारामा आमले माहिती पळण. म्हणून आमी बी आपला विश्वासी भावूस साठे जीव देवाले पाहिजे.

17ज्या लोकस जोळे जग नि संपत्ती शे आणि त्या आपला विश्वासी भावूस्ना गरजस्ले समजीसन तेस्नी मदत करासाठे आपला हृदय ले कठोर करीन दया नई कराव त तेस्ना मा परमेश्वर ना प्रेम नई.

18ओ पोरसहोण, आमी फक्त शब्दस कण हय नई सांगाले पाहिजे कि आमी एक दुसरास्वर प्रेम करतस, पण कामस्ले कराना द्वारे आणि खरापणा कण प्रेम कराले पाहिजे.

19एनाच कण आमी समजसुत कि आमी सत्य ना पोर शेतस, आणि जव आमना मन आमले दोष देस, तव आमी परमेश्वर नि उपस्थिती मा धाळस कण राही सकसुत. कारण कि परमेश्वर आमना मन तून मोठा शे आणि तेले सगळ काही माहिती शे.

21आणि एनासाठे, ओ मना प्रिय मित्रसहोण, कदी आमना मन आमले दोष नई देत, त आमले परमेश्वर नि उपस्थिती मा साहास ऱ्हास.

22आणि जे काही आमी मांगतस ते आमले भेटस, कारण कि आमी तेनी आदन्यास्ले मानतस आणि तेच करतस जेना कण तो खुश होस.

23तेनी आदन्या हय शे कि आमी तेना पुत्र येशु ख्रिस्त ना नाव वर विश्वास करोत, आणि जसा ख्रिस्त नि आमले आदन्या दियेल शे त्याच प्रमाणे एक दुसरास्वर प्रेम ठेवोत.

24जो कोणी परमेश्वर नि आदन्यास्ले माणस, तो परमेश्वर मा आणि परमेश्वर तेनामा ऱ्हास. आणि एनामुळे त्या आत्मा ना द्वारे जो आमले परमेश्वर पासून भेटेल शे आमले माहिती शे कि परमेश्वर आमना मा ऱ्हास.

← Chapter 2 Jump to: Chapter 4 →