1 John 5

Ahirani (आहिराणी नवा करार) - No Year

← Chapter 4 Jump to:

1जो कोणी हवू विश्वास करस कि येशुच ख्रिस्त शे, तो परमेश्वर ना पोऱ्या शे, आणि जो कोणी परमेश्वर बाप वर प्रेम करस, तो तेना पोरस वर बी प्रेम करस.

2जव आमी परमेश्वर वर प्रेम करतस, आणि तेनी आदन्यास्ले मानतस, त एनाच कण आमले समजस कि आमी परमेश्वर ना पोरस्वर प्रेम करतस.

3परमेश्वर वर प्रेम करन म्हणजे तेन्या आदन्यास्ले मानन शे, आणि तेन्या आदन्या मानन आमना साठे कठीण नई शेतस.

4ज्या परमेश्वर ना पोर शेतस त्या जग वर विजय प्राप्त करस. आणि तो विजय जेना कण आमी जग ले हारावतस तो आमना विश्वास शे.

5जग वर कोण विजय होवू सकस? फक्त तोच व्यक्ती जो हवू विश्वास करस कि येशुच परमेश्वर ना पोऱ्या शे.

6तो येशु ख्रिस्तच शे जो पाणी आणि रक्त व्दारे एयेल होता, तो फक्त पाणीच कण नई पण पाणी आणि रक्त दोनीस्ना व्दारे एयेल होता. आणि पवित्र आत्मा स्वता ह्या गोष्ट नि साक्ष देस हय सत्य शे. कारण कि पवित्र आत्मा सत्य शे.

7आणि साक्ष देणारा तीन शेतस. पवित्र आत्मा, आणि पाणी आणि रक्त. आणि तिनी एकच गोष्ट नि साक्ष देतस.

9आमी माणसस्नी साक्षस्वर विश्वास करतस, पण परमेश्वर नि साक्ष त सर्वास्तून मोठी शे, आणि परमेश्वर नि साक्ष हय शे कि तेनी आपला पुत्र ना बारामा साक्ष दियेल शे.

10त जो कोणी परमेश्वर ना पोऱ्या वर विश्वास करस, तो स्वताच ह्या साक्ष ले आपला मन मा ठेवस. पण जो कोणी विश्वास नई करत तेले परमेश्वर नि खोटा ठरायेल शे. कारण कि तेस्नी परमेश्वर नि साक्ष वर विश्वास नई कर जी तेनी आपला पोऱ्या ना बारामा दियेल शे.

11साक्ष हय शे, कि परमेश्वर नि आमले कायम ना जीवन दियेल शे, आणि हवू जीवन तेना पुत्र येशु मा शे.

12जेना जोळे परमेश्वर ना पोऱ्या शे, तेना जोळे कायम ना जीवन शे, आणि जेना जोळे परमेश्वर ना पोऱ्या नई, तेना जोळे कायम ना जीवन बी नई शे.

13मी तुमले हवू पत्र लिखस, एनासाठे कि परमेश्वर ना पोऱ्या ना नाव वर विश्वास ठेवतस, कि तुमी समजी साकोत कि तुमना जोळे कायम ना जीवन शे.

14परमेश्वर ना समोर आमले धीर शे कि, कदी आमी तेना ईच्छा प्रमाणे काही मांगतस, त तो आमनी आयकस.

15आणि आमी तेना पासून जे काही मांगतस ते तो आयकस, हय आपले माहिती शे, म्हणून जे काही आमी तेना पासून मांगेल शेतस त्या आपले भेटी जायेल शेतस हय बी आपले माहिती शे.

16कदी तू आपला विश्वासी भावू व बहिण ले असा पाप करतांना देखो, जेना दंड मृत्यु नई शे, त तो तेना साठे प्रार्थना करो आणि परमेश्वर तेना जीवन ले सुरक्षित ठेवीन. हय त्या लोकस्ना साठे लागू होस जेस्ना पाप प्राणघातक नई शे, कारण कि एक पाप असा बी ऱ्हास जो प्राणघातक शे तेना बारामा मी नई सांगस कि प्रार्थना कराले पायजे.

17सर्वा प्रकार ना अधर्म त पाप शे, पण असा पाप बी शेतस, जेना परिणाम मृत्यु नई शे.

18आमले माहिती शे कि परमेश्वर ना पोर कायम पाप नई करत राहत, कारण कि परमेश्वर ना पोऱ्या सुरक्षित ठेवस, आणि सैतान तेस्ले हात नई लावू सकत.

19आमले माहिती शे कि आमी परमेश्वर ना शेतस, आणि पुरा जग त्या सैतान ना आधीन मा शे.

20आमले माहिती शे कि परमेश्वर ना पोऱ्या ईजायेल शे आणि तेनी आमले समज दियेल शे, एनासाठे कि आमी खरा परमेश्वर ले वयखी सकोत. आमी खरा परमेश्वर मा वास करतस, कारण कि आमी तेना पुत्र येशु ख्रिस्त मा वास करस. खरा परमेश्वर आणि कायम ना जीवन हवूच शे.

21ओ मना पोरसहोण, स्वता ले त्या सर्वा गोष्टी पासून वाचाळी ठेवा, (जो तुमना हृदय मा परमेश्वर नि जागा लेस.)

← Chapter 4 Jump to: