1 Timothy 5

Ahirani (आहिराणी नवा करार) - No Year

← Chapter 4 Jump to: Chapter 6 →

1धल्ला माणुस ले जो तुना तून वय मा मोठा शे तेले धमकाऊ नको, पण तेले आपला बाप समजीसन विनंती कर. ज्या माणस तुना तून वय मा धाकला शेतस तेस्ले आपला धाकला भावू समजीसन व्यवहार कर,

2धल्ल्या बायास संगे तसाच व्यवहार कर जसा तू आपली माय ना संगे व्यवहार करस, आणि शुद्ध मन कण जवान बायास्ना संगे तसाच व्यवहार कर जसा तू आपली बहिण ना संगे करस.

3त्या विधवास्ना साठे सन्मान दाखाळ, जेस्ले सांभाळा ना साठे आणि तेस्नी देख-रेख कराले कोणीच नई शे.

4पण जर कोणती विधवा ना पोर व नातवंड होतीन, त त्या पहिले आपलाच घराणा ना लोकस्ना प्रती आपल्या जपापदाऱ्यास्ले पुरा कराले सिखोत, आणि आपला माय बाप नि देख-रेख कराना द्वारे तेस्ना उपकार फेळा कारण कि हय परमेश्वर ले आवळस.

5जी विधवा खरज एखटी शे, जीना रेख-देख करणार कोणीच नई, ती परमेश्वर वर आशा ठेवस, आणि परमेश्वर ले मदत ना साठे रात दिन प्रार्थना मा लीन राहस.

6पण ती विधवा जी आपला पुरा टाईम भोग विलास मा जावाळस, ती जीत्ती ऱ्हातांना मरी जायेल शे.

7तेस्ले ह्या गोष्टीस्नी बी सूचना देत जा एनासाठे कि त्या निर्दोष राहोत.

8पण कदी कोणी आपला नातेवाईकस्नि रेख-देख नई करत, खास करीसन स्वता ना घराणा नि, त तेनी विश्वास ले नकारी दियेल शे आणि अविश्वासीस तून बी जास्त वाईट बनी जायेल शे.

9विधवास्नी यादी मा तीनाच नाव लिखामा येवो जी साठ वरीस तून जास्त वय नि राहो, आणि ती एकच नवरा नि बायको राहेल हो.

10आणि ती आपला चांगला कामस साठे वयखावत हो, जस कि पोरस्ना पालन-पोषण करान, पाव्हनास्नी सेवा करान, प्रभु ना लोकस्नी सेवा करान, आळचन मा लोकस्नी मदत करान, आणि प्रत्येक चांगला काम ना साठे स्वता ले समर्पित करेल राहो.

11पण जवान विधवास्ना नाव यादी मा नका लिखज्यात, कारण कि जव त्या सुख-विलास कण आकर्षित हुईसन लगन करान देखतीस त ख्रिस्त नि सेवा कराना वचन पासून परती जाईन,

12आणि अस कराना द्वारे तेनी दियेल पहिला लगन ना वचन ले मोळीसन ती दोषी ठरस.

13एना संगेच त्या घर-घर फिरीसन आळशी ऱ्हावाले शिकी जास, फक्त ईतलच नई पण दुसरास्ना बारामा बकबक करत ऱ्हातस आणि दुसरास्ना कामस्मा हात टाकत ऱ्हातस, आणि बिगर शोभा ना गोष्टीस्नी चर्चा करस.

14एनासाठे मनी ईच्छा शे कि जवान विधवा लगन करो, पोरस्ले जल्म देवो आणि आपला घरस्ले समायो आणि आमना कोणता बी शत्रू ले आमना बारामा वाईट करानी संधी नई देवो.

15मी असा एनासाठे सांगस कारण कि काही विधवा बाया परमेश्वर ले मानान सोळीसन ते काम करी ऱ्हायनात जे सैतान तेस्ना कळून कराले लावस.

16पण कदी कोणती विश्वासनी बाई ना घर मा विधवा राहो, त ती तेनी देख-रेख करो आणि मंडळी वर भार नई टाको, एनासाठे कि मंडळी तेस्नी मदत करू सको ज्या खरज विधवा शेत आणि जीस्ना कोणीच नई शे.

17मंडळी ना वरिष्ठ लोक ज्या चांगली पुढाकारी करी ऱ्हायनात, खास करीसन त्या ज्या वचन आयकाळा मा आणि सिखाळामा कष्ट करतस, त्या दोन पट ना आदर ना योग्य समजामा येतीन.

18कारण कि परमेश्वर ना पुस्तक सांगस, “धान्य नि मळणी करतांना बईल ना तोंड ले मुस्का नका बांधा.” आणि “मजुर आपली मजुरी ना हकदार शे.”

19कदी कोणी दोष मंडळी ना वरिष्ठ वर लावामा एस त बिगर दोन व तीन साक्ष ना तेना विरुद्ध मा कोणता आरोप स्वीकार नका करज्यात.

20पाप करणारस्ले सर्वा विश्वासी समोर समजाळा, जेना कण कि सर्वा विश्वासी बी घाबरोत.

21परमेश्वर, आणि ख्रिस्त येशु आणि पवित्र परमेश्वर ना दूतस्ले उपस्थित समजीसन मी तुले चेतावणी देस कि तू कोणा बी संगे बिगर पक्षपात कराना, ह्या आदन्यास्ना पालन कर.

22कोणी वरिष्ठ वर प्रभु नि सेवा समर्पण साठे लवकर हात नको ठेवजो. जर तू असा करस त तेना पाप ना साठे दोषी ठरशीन. स्वता ले अनैतिक वाईट पासून दूर ठेव.

23फक्त पाणीच नका प्या, पण आपला पोट ना साठे आणि आपले घळी-घळी आजारी होवा मुळे थोळा-थोळा द्राक्षरस बी पीत ऱ्हावा.

24(मी तुले सांगस कि काब कोणा माणुस नि वागणूक बिगर जाणाना तेले घाई-घाई मा पुढारी नई ठरावाले पाहिजे.) कारण कोणी लोकस्ना पाप गुप्त ऱ्हास आणि हय तठलोंग मालूम नई होत जठलोंग कोणी तेस्नी तपासणी नई करोत. पण कईक लोक मोक्या पाप करतस कारण कि तपासणी कराना पयलेच लोकस्ले माहित पळो कि तेस्नी काय करेल शे.

25त्याच प्रकारे, जव लोक चांगला काम करतस त त्या काम दुसरा विश्वासीस समोर प्रगट होतस, आणि ज्या असा नई होतस, त्या बी दपी नई सकतस.

← Chapter 4 Jump to: Chapter 6 →