Ephesians 2

Ahirani (आहिराणी नवा करार) - No Year

← Chapter 1 Jump to: Chapter 3 →

1पहिले तुमी आपला अपराध आणि पापस मुळे आत्मिक रूप कण मरेल ना सारखा होतात.

2त्या टाईम ले तुमी ह्या जग ना लोकस्ना रिती प्रमाणे जीवन जगत होतात ज्या परमेश्वर ले ओयखत नई होतात. तुमी सैतान ना नुसार जीवन जगत होतात जो आकाश मा ऱ्हायनारा दुष्ट आत्मास्ना प्रधान शे, तो आते बी तेस्ना हृदय मा काम करस ज्या परमेश्वर नि आदन्यास्ना उल्लंघन करतस.

3ह्या सर्वास्ना जसा आमी बी सर्वान सर्वा पहिले आपला शरीर ना पापमय स्वभाव ना नुसार जीवन जगत होतुत, आमी तेच कऱ्या करत होतुत ज्या आमना वाईट ईच्छा आणि विचार आमले करासाठे जबरजस्ती करत होतात. आमी दुसरास्ना सारखा आपला स्वभाव मुळे परमेश्वर ना राग ना आधीन होतुत.

4पण परमेश्वर नि दया इतली जास्त शे आणि तेना प्रेम इतला महान शे कि,

5जव आमी आपला अपराधस मुळे मरेल ना सारखा होतुत, त परमेश्वर नि आमले ख्रिस्त ना संगे जीवन दिधा. परमेश्वर नि कृपा ना द्वारे तुमना तारण हुयेल शे.

6परमेश्वर नि येशु ख्रिस्त ना संगे आमी लोकस्ले परत जित्ता करेल शे आणि तेनाच संगे आमले स्वर्गीय जागा मा बसाळ.

7परमेश्वर नि ख्रिस्त येशु ना संगे नात जुळा मुळे आमी सर्वास्वर हय कृपा दाखाळेल शे. तेनी हय एनासाठे कर कि तो येणारा टाईम वर जग ना लोकस्ले दाखाळी सको कि तेनी कृपा कितली महान शे.

8कारण कि ख्रिस्त वर विश्वास ना द्वारे परमेश्वर नि कृपाच कण तुमना तारण हुयेल शे, हय तुमना कामस मुळे नई, पण हय परमेश्वर ना दान शे. एनासाठे कि कोणी एना विषय मा गर्व नई करू सको.

10एनासाठे परमेश्वर नि आमनी निर्मिती करी. तेनी येशु ख्रिस्त ना द्वारे आमनी सृष्टी करी, जेस्ले करासाठे परमेश्वर नि पयले पासून आमले तयार करेल शे जेना कण आमी त्या चांगला कामस्ले पुरा करत राहोत.

11आठवण करा, तुमी ज्या जल्म पासूनच बिगर यहुदी शेतस, यहुदी लोक तुमले बिगर सुंता ना म्हणीसन चीळावतस, आणि शारीरिक रूप कण करेल सुंता कण सुंता वाला म्हणावतस. जरी त्या लोक ज्या आपली सुंता नि दशा वर गर्व करीसन विचार करतस कि त्या परमेश्वर ना लोक शेतस.

12त्या टाईम ले तुमी ख्रिस्त ले ओयखत नई होतात. आणि परमेश्वर नि निवाळेल प्रजा इस्त्राएल देश ना लोकस मधून नई होतात. आणि परमेश्वर ना कळून करेल त्या करार ना वचन ना भागी बी नई होतात. आणि एक आशा पासून वंचित ना सारखा ह्या जग मा परमेश्वर ना बिगर जीवन जगत होतात.

13पण ज्या पहिले परमेश्वर पासून दूर होतात, आते येशु ख्रिस्त ना रक्त ना द्वारे जोळे लयामा एयेल शेतस.

14कारण कि ख्रिस्त नि स्वता यहुदी आणि बिगर यहुदीस्ले एक करीसन तेस्नी सामंजस्य कराई टाक. तेनी ती शत्रुता नि भीत ले पाळी टाकेल शे जी तेस्ले आल्लग करत होती.

15ख्रिस्त येशु नि आपली मृत्यु ना द्वारे, मोशे ना नियम ना सर्वा विधीस्ले आणि नियमस्ले रद्द करी टाक, एनासाठे कि तो यहुदी लोक आणि बिगर यहुदी लोकस्ना मधमा शांती लय सको आणि दोनी दलस पासून आपला साठे एक नवीन दल बनाई सको.

16ख्रिस्त नि आपली क्रूस वर मृत्यु ना द्वारे दोनीस्ना एकच शरीर मा परमेश्वर ना संगे सामंजस्य कराव आणि ह्या प्रकारे शत्रुता ले नष्ट करी टाक.

17ख्रिस्त नि ईसन दोनीस्ले, बिगर यहुदीस्ले ज्या तेना पासून दूर होतात आणि यहुदीस्ले ज्या तेना जोळे होतात, शांती नि सुवार्ता आयकाळी.

18कारण कि ख्रिस्त ना द्वारे आमी दोनी एकच पवित्र आत्मा कण उत्तेजित हुईसन बाप ना जोळे पोहोची सकतस.

19एनासाठे आते तुमी दुसरा देश ना नईत म्हणजे परका नई ऱ्हायनात, पण परमेश्वर ना लोकस्ना संगे मिईसन स्वदेशी नागरिक आणि परमेश्वर ना परिवार ना सदस्य बनी जायेल शेतस.

20तुमी सर्वा मिईसन परमेश्वर ना त्या ईमारत ना सारखा शेतस जेना पाया प्रेषित आणि भविष्यवक्तास्ना पाया बनेल शे आणि जेना कोपरा ना दघळ स्वता येशु ख्रिस्त शे.

21ख्रिस्त ना द्वारे पुरी ईमारत नि निर्मिती एकत्र मियसन प्रभु ना साठे पवित्र मंदिर ना रूप धारण करी ऱ्हायना.

22तेनाच द्वारे तुमी लोक बी ह्या ईमारत मा जोळामा येतस, जेना कण तुमी पवित्र आत्मा ना द्वारे परमेश्वर ना साठे राहाणी जागा बनेल शेतस.

← Chapter 1 Jump to: Chapter 3 →