Ephesians 4

Ahirani (आहिराणी नवा करार) - No Year

← Chapter 3 Jump to: Chapter 5 →

1एनासाठे मी, प्रभु नि सेवा करा मुळे जेल मा कैद शे, तुमले विनंती करस कि ज्या बलावा कण तुमी तेना लोक होवा साठे बलावामा एयेल शेतस तेनाच नुसार तुमी जीवन जगा.

2म्हणजे पुरी सौम्यता आणि नम्रता कण, आणि धीर धरीसन प्रेम कण एक दुसरास्नी सहन करील्या.

3एक दुसरा ना संगे कायम एकता मा राहाणा प्रयत्न करा, कारण कि परमेश्वर नि आत्मा ना द्वारे तुमी एक करामा एयेल शेतस.

4आमी सर्वा विश्वासी लोक एकच शरीर ना आंगस सारखा शे, आणि आमी सर्वास्ले एकच आत्मा भेटेल शे, जसा कि तुमी लोकस्ले तीच आशा देवामा एयेल होती जव तुमले परमेश्वर ना लोक होवाना साठे बलावामा एयेल होत.

5आमी सर्वास जोळे एकच प्रभु शे, आणि आमी फक्त प्रभु येशु ख्रिस्त वरच विश्वास करतस, आणि आमी सर्वास्नी एकसारखा बाप्तिस्मा लीयेल शे.

6एकच परमेश्वर शे जो सर्वास्ना बाप शे, तो सर्वास्वर राज्य करस, तो आमी सर्वास्ना द्वारे काम करस आणि तो आमना मधमा ऱ्हास.

7ख्रिस्त नि उदारता कण आमना मधून प्रत्येक ले आत्मिक दान दियेल शे, जसा तेनी तेस्ले देवाना करार करना.

8जस कि पवित्र शास्त्र मा लिखेल शे, “तो उच्चा वर चळना आणि बंदिस्ले बांधी लीग्या आणि तेनी माणसस्ले दान दिधात.”

9जव पवित्र शास्त्र सांगस, “तो उच्चा वर चळना” त एना काय अर्थ शे? एना अर्थ हय शे कि तो पहिले पृथ्वी नि सर्वास्तून खाल्ली जागास्मा उतरना.

10एनासाठे जो खाले उतरणा तो तोच शे जो आकाश तून बी वरे चळी ग्या कि आपली उपस्थिती कण पुरी सृष्टी ले भरी देवो.

11हवू तोच शे जेनी वरदान दियेल शेतस, तेनी काही लोकस्ले प्रेषित होवाना, आणि काहीस्ले भविष्यवक्ता होवाना, आणि काहीस्ले सुवार्तिक होवाना, आणि काही लोकस्ले पाळक ना आणि शिक्षक होवाना वरदान दिधा.

12तेनी अस एनासाठे कर कि परमेश्वर ना लोक ख्रिस्त नि सेवा करासाठे तयार होवोत, एनासाठे कि ख्रिस्त ना शरीर पुरी रिती कण पक्का बनो आणि परिपक्व हुई जावो.

13हय तठ लगून होत राहीन जठ लगून कि आमी सर्वा विश्वास कराना द्वारे एक नई बनी जाउत आणि परमेश्वर ना पोऱ्या ना संगे नात होवा मुळे पक्का विश्वासी बनी जाउत आणि पूर्णपणे ख्रिस्त येशु जो बिलकुल सिद्ध शे.

14एनासाठे आते पुळे चालीसन आमी पोरच सारखा वागाले नको पाहिजे, जी माणसस्नी फसवणूक आणि चालाकी कण, तेस्ना भ्रम नि चालना आणि उपदेश ना द्वारे एक धाकली नाव ना सारखा उदलावामा आणि ईकळे तिकळे फिरावामा येतस.

15पण आमी प्रेम कण सत्य ना अनुसरण करोत, आणि ख्रिस्त मा सर्वा गोष्टीस्मा पक्का हुई जावोत, जो मंडळी ना डोक शे.

16तेना नियंत्रण कण पुरा शरीर, प्रत्येक जोळ नि मदत कण एकत्र मियसन आणि एकत्र जुळाईसन, त्या प्रभाव ना प्रमाणे जो प्रत्येक आंग ना चांगल्या प्रकारे कार्य कराना द्वारे तेनामा होस, स्वता ले वाळावस कि तुमी सर्वा प्रेम मा उन्नती करत जावो.

17एनासाठे मी तुमले प्रभु ना अधिकार कण जताळी देस कि, अविश्वासीस सारखा जसा त्या आपला मन नि बिगर अर्थ नि रितीस्वर चालतस, तुमी आते पासून परत असा जीवन नका जगज्यात.

18त्या काही बी समजू नई सकतस, कारण कि त्या पूर्णपणे अज्ञानी आणि जिद्दी शे, ह्या मुळे त्या परमेश्वर ना जीवन पासून आल्लग करामा एयेल शे.

19आणि त्या आपला वाईट कामस मुळे बिगर लाज ना हुई जायेल शेतस. तेस्नी स्वतास्ले वाईट ना हातस्मा दि दियेल शे कि त्या सर्वा प्रकार ना गंधा कामस्ले बिगर आळचन ना करी सको.

20पण तुमी लोकस्ले ख्रिस्त पासून अशी शिक्षा नई भेटणी.

21पण तुमनी जे ख्रिस्त येशु ना विषय मा आयकेल शे आणि तेना विषय मा सिखाळणारस्नि तुमले जे शिकाळेल शे तो निश्चितच खरा वचन हुईन.

22एनासाठे तुमी लोकस्ले आपला पयली वागणूक आणि जुना स्वभाव सोळी देवाले पाहिजे, कारण कि ती फुसलावणारी वाईट ईच्छास्ना मुळे बिगळत जाई ऱ्हायना.

23आते परमेश्वर नि आत्मा ले संधी द्या कि तो तुमना मन ना विचारस्ले पुरी रिती कण नवीन करी देवो,

24आणि नवा स्वभाव ले घालील्या जो स्वता परमेश्वर ना स्वभाव ना सारखा शे. एनासाठे ह्या नवा स्वभाव प्रमाणे वागा जेनामा खरी धार्मिकता आणि पवित्रता शे.

25एनामुळे खोट बोलन सोळीसन, प्रत्येक विश्वासी एक दुसरा ना संगे खर बोला कारण कि आमी आपस मा ख्रिस्त ना शरीर ना आंग शेतस.

26कदी तुमी रागे भरतस, तरी बी पाप नका करज्यात, आणि पुरा दिन रागे नका भरेल राहा पण सूर्य डुबा लगून तुमना राग शांत हुई जावो.

27सैतान ले कोणतीच संधी नका द्या.

28जो चोरी करत होता, तेले आते पासून चोरी नको कराले पाहिजे, पण परिश्रम करो कि तो आपला हातस कण करामा एयेल उपयोगी कामस्ना द्वारे दुसरा लोकस्नी बी मदत करी सको, जेस्ले कोणत्या प्रकार नि गरज शे.

29कोणती वाईट गोष्ट तुमना तोंड मधून नई निघो, पण गरज ना नुसार तेच निघो जे दुसरास्ले उन्नती साठे चांगल होवो, एनासाठे कि आयकणारस्न चांगल होवो.

30पवित्र आत्मा ले दुखी नका करा, कारण कि पवित्र आत्मा सुटका ना दिन साठे तुमी लोकस्वर परमेश्वर ना देवायेल शिक्का शे.

31सगळ्या प्रकार ना कळूपणा, कोप, राग, झगळा, निंदा, दृष्टपणा व द्वेष ले आपला जीवन पासून दूर करा.

32आणि एक दुसरास्ना प्रती दयाळू आणि कनवाळू व्हा, आणि एक दुसरास्ले त्याच प्रकारे माफ करा ज्या प्रकारे परमेश्वर नि ख्रिस्त मा तुमले माफ करेल शे.

← Chapter 3 Jump to: Chapter 5 →