Ephesians 3

Ahirani (आहिराणी नवा करार) - No Year

← Chapter 2 Jump to: Chapter 4 →

1एनामुळे मी पौल, जो तुमी बिगर यहुदीस्ले ख्रिस्त येशु नि सुवार्ता आयकाळा मुळे जेल मा कैद शे, आणि मी तुमना साठे परमेश्वर ले प्रार्थना करस.

2खरज तुमी लोकस्नी हय आयकेल अशीन कि परमेश्वर नि आपली कृपा कण मले तुमना चांगला साठे हय काम सोपेल शे.

3परमेश्वर नि स्वता हवू भेद मनावर प्रगट कर, जेना विषय मा काही गोष्टी मी पहिलेच सार मा लिखेल शे,

4आणि जे मी लिखेल शे कदी तुमी तेले वाचशात, त समजी जाश्यात कि मी ख्रिस्त ना तो भेद कोठ लगून समजस.

5मांगला पिढीस्मा हवू भेद माणसस्ले सांगामा नई एयेल होता, पण आते परमेश्वर नि आपली आत्मा व्दारे हवू भेद तेना पवित्र प्रेषित आणि भविष्यद्वक्तास्वर प्रगट करेल शे.

6आणि तो भेद हवू शे, कि ख्रिस्त येशु नि सुवार्ता ना व्दारे बिगर यहुदी लोक यहुदीस संगे मियसन परमेश्वर नि मिरास मा सहभागी होवोत. त्या एकच शरीर ना आंग शेतस आणि ख्रिस्त येशु ना द्वारे त्या सर्वा वस्तूस्मा सहभागी शे जेले देवाना करार परमेश्वर नि यहुदी लोकस्ले करेल होता.

7परमेश्वर नि कृपा आणि तेना सामर्थ्य ना काम ना नुसार मले सुवार्ता ना प्रचार ना द्वारे तेनी सेवा कराना सोभाग्य भेटेल शे.

8जर मी परमेश्वर ना सर्वा लोकस्मा कम योग्य माणुस शे, तरी बी मनावर हय कृपा हुईनी कि मी बिगर यहुदीस्ले ख्रिस्त ना अगम्य धन नि सुवार्ता आयकाळू.

9आणि सर्वा लोकस्वर हय प्रगट करू कि परमेश्वर कोणत्या प्रकारे आपला गुप्त योजनास्ले पुरा करस. जो सगळी सृष्टी ले बनावना, आणि ह्या भेद ले युगानयुग पासून गुप्त ठेव.

10आते परमेश्वर ना लक्ष हवू शे कि मंडळी ना व्दारे परमेश्वर ना असीम ज्ञान बिगर देखेल जग ना आत्मास्ना प्रधानस्वर आणि अधिकारीस्वर प्रगट करामा येवो.

11परमेश्वर नि आपला मन मा कायम पासून जो उद्देश ठीयेल होता आमना प्रभु येशु ख्रिस्त ना द्वारे पुरा करना.

12कारण कि आमले ख्रिस्त ना द्वारे आणि तेनावर विश्वास करा मुळे हय हिम्मत होस कि आमी बिगर भ्यावाना परमेश्वर जोळे जावू सकतस.

13एनासाठे मी तुमले विनंती करस, कि तुमी लोकस्ना साठे मी जे कष्ट करी ऱ्हायनु, तेना मुळे तुमी हिम्मत नका सोळा, कारण कि एनामाच तुमी लोकस्ना फायदा शे.

14ह्या मुळे मी परमेश्वर बाप ना समोर गुळघा टेकीसन विनंती करस,

15जो स्वर्ग आणि पृथ्वी वर, प्रत्येक परिवार ना मुल आधार शे.

16मी विनंती करस कि तो आपली महिमा ना धन ना नुसार तुमले हवू दान देवो कि तुमी तेनी आत्मा कण आपला मधमा मनुष्यत्व मा सामर्थ्य प्राप्त करीसन शक्तिशाली होत जावा.

17कारण कि जसा तुमी ख्रिस्त वर विश्वास करत ऱ्हायनात, तो तुमना हृदय मा राहो. मी विनंती करस कि परमेश्वर ना आणि एक दुसरा ना प्रती तुमना प्रेम तुमले पक्का करो आणि तुमले पळा पासून वाचाळो.

18एनासाठे कि तुमले, परमेश्वर ना सर्वा लोकस संगे चांगल्या प्रकारे समजानी शक्ती भेटो, कि ख्रिस्त तुमले कितला जास्त प्रेम करस.

19मी विनंती करस, कि तुमी ख्रिस्त ना त्या प्रेम ले समजोत, जरी तेले पुरा-पुरा नई समजू सकतस, आणि ह्या प्रकारे तुमी परमेश्वर ना स्वभाव कण परिपूर्ण भरी जावा.

20परमेश्वर आपली त्या सामर्थ्य कण जी आमना मधमा काम करस, आमना मांगा पासून जास्त आणि आमना विचारस्तून जास्त कार्य करानी क्षमता ठेवस.

21मंडळी मा आणि ख्रिस्त येशु मा त्या परमेश्वर नि महिमा पिढ्यानपिढ्या लगून युगानयुग होत राहो. आमेन.

← Chapter 2 Jump to: Chapter 4 →