Ephesians 5

Ahirani (आहिराणी नवा करार) - No Year

← Chapter 4 Jump to: Chapter 6 →

1तुमी परमेश्वर ना प्रिय पोर शेतस, एनासाठे तुमनी वागणूक तेना स्वभाव ना नुसार होवो.

2तुमना जीवन दुसरा ना प्रती प्रेम कण भरेल होवो, ज्या प्रमाणे ख्रिस्त नि तुमी लोकस संगे प्रेम कर आणि तुमले पापस पासून सोळावा साठे परमेश्वर ना समोर स्वता ले सुखदायक सुगंध ना सारखा भेट म्हणीसन अर्पण करी टाक.

3तुमी परमेश्वर ना लोक शेतस, एनासाठे तुमी लोकस्ना मधमा कोणत्याच प्रकार ना व्यभिचार आणि अशुद्धता व लोभ नि चर्चा बी नई होवो.

4आणि नईत लाज, मूर्खपणा व वाईट गोष्टीस्न बोलन, कारण कि ह्या गोष्टी शोभतस नईत, पण तुमी परमेश्वर ना धन्यवाद करत राहा.

5कारण कि तुमले माहिती शे कि जो माणुस व्यभिचारी, व अशुद्ध, व लोभी शे म्हणजे जो मूर्तीपुजक एवळा शे. असा माणुस्ले ख्रिस्त आणि परमेश्वर ना राज्य मा मिरास नई शे.

6कोणी तुमले फालतू गोष्टीस कण धोका नई देवू सको, कारण कि असाच गोष्टीस कण परमेश्वर ना राग तेनी आदन्या नई पायणारस्वर भळकस.

7एनासाठे असा लोकस संगे कोणताच संबंध नका ठेवज्यात.

8पहिले तुमी स्वता बी अंधकार मा जीवन जगत होतात, पण जव पासून तुमी परमेश्वर ना लोक बनी जायेल शेतस, तव पासून उजाया मा शेतस. एनासाठे तुमी असा लोकस सारखा जीवन जगा ज्या उजाया ना शेतस.

9कारण कि जठे उजाया शे, तठे सर्वा प्रकार ना चांगुलपण, धार्मिकता, व सत्यता उत्पन्न होस.

10त्या गोष्टीस्नी शोध मा लागेल राहा जेना कण परमेश्वर खुश होस.

11ज्या व्यर्थ ना काम लोक अंधकार मा करतस, तेस्ना संगे सहभागीता नका ठेवा, पण तेस्ले सांगा कि तेस्ना काम वाईट शेतस आणि तेस्ले उजाया मा लई या.

12कारण कि असा अधर्मी लोकस्ना गुप्त कामस्नी चर्चा करान बी लाज नि गोष्ट शे.

13उजाया ह्या सर्व्या गोष्टीस्ना वाईटस्ले प्रगट करस आणि एस्ना वास्तविक रूप स्पष्ट करी देस. कारण कि उजायाच शे, जो सर्व काही प्रगट करस.

14एनासाठे हय सांगामा एयेल शे, “ओ जपणार, जाग आणि मरेल मधून जित्ता हुई जा, त ख्रिस्त ना उजाया तुनावर चमकीन.

15एनासाठे ध्यान ठेवा कि कसा जीवन जगतस. मूर्खस सारखा नई पण बुद्धीमान सारखा जीवन जगा.”

16संधी ले बहुमुल्य समजीसन तेना फायदा उचला, कारण कि दिन वाईट शेतस.

17एनासाठे मूर्ख नका बना पण बुद्धीमानी कण समजा कि प्रभु नि काय ईच्छा शे.

18द्राक्षरस पिसन झिंगनारस सारखा नका बना, कारण कि एना कण तुमना जीवन नाश हुई जाईन. पण पवित्र आत्मा कण भरी जावा.

19आणि आपस मा मियसन भजन आणि स्तुती ना गाना आणि आत्मिक गाना गात राहा, आणि आपला पुरा मन कण प्रभु ना आदर मा गात आणि कीर्तन करत राहा.

20आमना प्रभु येशु ख्रिस्त ना नाव कण कायम सगळ्या गोष्टीस साठे परमेश्वर ना धन्यवाद करत राहा.

21ख्रिस्त ना प्रती आदर मुळे एक दुसरा ना आधीन राहा.

22ओ बायकाहोण, आपला नवरा ना असा आधीन राहा, जसा तुमी ख्रिस्त ना आधीन ऱ्हातस.

23कारण कि नवराले बायको वर अधिकार शे तसाच जसा कि ख्रिस्त ले मंडळी वर अधिकार शे, आणि ख्रिस्त स्वता शरीर ना म्हणजे मंडळी ना तारणार शे.

24ज्या प्रकारे मंडळी ख्रिस्त ना आधीन शे तशीच बायको बी सगळ्या गोष्टीस्मा आपला नवरा ना आधीन राहो.

25ओ नवरासहोण, आपली बायको वर त्याच प्रमाणे प्रेम ठेवा, ज्या प्रकारे ख्रिस्त नि मंडळी वर प्रेम कर आणि तीना साठे आपला जीवन दि टाक.

26जेना कण तो तिले वचन व पाणी ना आंघोळ ना व्दारे शुद्ध करीसन पवित्र बनाई सको,

27आणि तिले एक अशी तेजस्वी मंडळी बनाईसन आपला जोळे उभी करो, जीनामा नईत डाग, नईत सूरकुती, नईत कोणती अशी वस्तू होवो पण पवित्र आणि निर्दोष होवो.

28ह्याच प्रकारे उचित शे कि नवरा आपली बायको वर प्रेम ठेवो, जसा तो आपला शरीर वर प्रेम ठेवस. कारण कि जो आपली बायको वर प्रेम करस, तो स्वता वर प्रेम करस.

29कारण कि कोणी बी आपला शरीर संगे घृणा नई करत, पण तो तेना पायन-पोषण करस आणि तेनी देख-रेख करत ऱ्हास. जसा ख्रिस्त बी मंडळी ना संगे करत ऱ्हास.

30कारण कि आमी तेना शरीर ना आंग शेतस.

31जस कि परमेश्वर नि पुस्तक सांगस, “ह्या मुळे माणुस आपला माय-बाप ले सोळीसन आपली बायको संगे राहीन, आणि त्या दोनी एक आंग होतीन.”

32हवू एक खोल भेद शे आणि मी एना वापर ख्रिस्त आणि मंडळी ना संदर्भ मा करी ऱ्हायनु.

33पण हवू तुमना वर बी लागू होस कि, तुमना मधून प्रत्येक आपली बायको वर आपला सारखा प्रेम ठेवा, आणि बायको बी आपला नवरा नि भीती ठेवो.

← Chapter 4 Jump to: Chapter 6 →