Ephesians 6

Ahirani (आहिराणी नवा करार) - No Year

← Chapter 5 Jump to:

1ओ पोरसहोण, तुमी आपली माय आणि बाप ना आदन्यास्ना पालन कऱ्या करा, कारण कि अस करान चांगल शे.

2“आपली माय आणि आपला बाप ना आदर कर.” हय पहिली अशी आदन्या शे जीना संगे एक प्रतिज्ञा बी जोळायेल शे.

3जी ह्या प्रकारे शे, “जेना कण तून बर हुईन आणि तू गैर दिनस लगून पृथ्वी वर जित्ता ऱ्हाशी.”

4ओ पोरसवालाहोण, आपला पोरस्ना संगे असा नका वागा जेना कण त्या रागे भरोत, पण प्रभु नि शिक्षा चेतावणी देत तेस्ना पायन-पोषण करा.

5ओ दाससहोण, ज्या लोक ह्या पृथ्वी वर तुमना मालक शेतस, तुमी भ्यात आणि कापत निष्कपट हृदय कण तेस्नी आदन्या ना पालन करत राहा. समजा जसा तुमी ख्रिस्त नि सेवा करी ऱ्हायनात.

6हय सगळ तुमी तेस्ले खुश कराना उद्देश कण फक्त दाखाळा साठे नका करा, पण ख्रिस्त ना दासस सारखा पुरा हृदय कण परमेश्वर नि ईच्छावर चाला.

7आणि दासस्ना सारखा आपला काम खुशी कण करत राहा, समजा तुमी माणुस नि नई पण प्रभु नि सेवा करी ऱ्हायनात.

8आठवण ठेवा कि जो कोणी चांगला काम करीन, भले तो दास राहो कि स्वातंत्र, प्रभु तेले तसच फय दिन.

9ओ मालकसहोण, तुमी आपला दासस्ले धमक्या देवाना सोळीसन तेस्ना संगे चांगला व्यवहार करत राहा. आठवण ठेवा कि तेस्ना आणि तुमना स्वर्ग मा एकच मालक शे, आणि तो सर्वास्ना न्याय बिगर पक्षपात ना करस.

10म्हणून, तुमी प्रभु मा आणि तेनी शक्ती ना प्रभाव मा शक्तिशाली होत जावा.

11त्या सर्वा शस्त्रसामग्रीस्ले आंग मा घालील्या ज्या परमेश्वर देस, एनासाठे कि तुमी सैतान नि युक्तीस पुळे उभा राही सकोत.

12कारण कि आमनी लळाई माणसस संगे नई, पण प्रधानस संगे, अधिकारी संगे आणि ह्या जग ना अंधकार ना अधिपतीस संगे आणि दृष्टता नि आत्मिक सेनास संगे शे जी आकाश मा शे.

13एनासाठे परमेश्वर ना सर्वा शस्त्रसामग्रीस्ले आंग मा घालील्या, एनासाठे कि जव वाईट दिन येवोत त तुमी शत्रू ना सामना करी सकोत, आणि आखरी लगून लळाई करीसन स्थिर राही सकोत.

14एनासाठे परमेश्वर ना सत्य कण आपली कमर बांधीसन, आणि धार्मीक्ता नि झीलम घालीसन.

15आणि पायस्मा सामंजस्य ना सुवार्ता नि तयारी ना जुता घालीसन.

16आणि ह्या सर्वास संगे विश्वास नि ढाल लिसन स्थिर राहा जेना कण तुमी त्या द्रुष्ट ना सर्वा पेटता बानस्ले मलावू सकोत.

17आणि तारणरुपी शीरस्त्राण, आणि आत्मा नि तलवार, जो परमेश्वर ना वचन शे, ली ल्या.

18प्रत्येक टाईम ले आणि हरेक प्रकार कण आत्मा ना मार्गदर्शन ना नुसार प्रार्थना, आणि विनंती करत राहा, आणि एनासाठे जागत राहा कि सर्वा पवित्र लोकस्ना साठे कायम प्रार्थना करत राहोत.

19मनासाठे बी प्रार्थना करत राहा, एनासाठे कि जव मी बोलू त परमेश्वर मले बरोबर शब्द देवो कि मी हिम्मत कण सुवार्ता ना भेद सांगी सकू.

20एनाच साठे मी बेड्यास्मा बांधायेल राजदूत ना सारखा सेवा करी ऱ्हायनु. प्रार्थना करा कि मी, ज्या प्रकारे मले बोलाले पाहिजे, त्याच प्रकारे हिम्मत कण सुवार्ता ना प्रचार करी सकू.

21तुखिक, प्रभु मा मना प्रिय भावू आणि एक विश्वास योग्य सेवक शे, तुमी लोकस्ले हय सगळ सांगी दिन, एनासाठे कि तुमले बी माहिती पळो कि मी कसा शे आणि काय करी ऱ्हायनु.

22मी तेले तुमना जोळे एनासाठे धाळी ऱ्हायनु कि तुमले मना बारामा पुरी बातमी माहित पळी जावो आणि एनासाठे बी कि तो तुमले प्रोत्साहित करो.

23परमेश्वर बाप आणि प्रभु येशु ख्रिस्त ना कळून सर्वा विश्वासी भावूस्ले शांती आणि विश्वास ना संगे प्रेम बी भेटो.

24परमेश्वर नि कृपा त्या सर्वास्वर सदा राहो, ज्या आमना प्रभु येशु ख्रिस्त वर खरा प्रेम करतस.

← Chapter 5 Jump to: