1 Chronicles 14

Amharic Gofa GFBEVF (ጌሻ ማፃፋ)

← Chapter 13 Jump to: Chapter 15 →

1ፅሮሳ ካዎይ ክራም ዳዊታስ ጋ ኬፃና መላ ኪተትያ አሳታ፥ ሹቹ ማሰይሳታነ አናፀታ ዝጋ ምራ የድስ።

2ጎዳይ እስራኤለ ቦላ እያ ካዎ ኦድ ምንዳይሳነ ባ አሳ እስራኤለ ግሾ እያ ካዎተ ቦንችዳይሳ ዳዊቲ ኤርስ።

3ሄሳፈ ጉየ፥ ዳዊቲ የሩሳላመን ሀራ ማቾ ኤክድ አደ ናይታነ ማጫ ናይታ የልስ።

4ዳዊቲ የሩሳላመን የልዳ አደ ናይት ሳሙሳ፥ ሶባባ፥ ናታና፥ ሶሎሞነ፥

5ይብሃራ፥ ኤልሱአ፥ ኤልፋላፃ፥

6ኖጋ፥ ናፈጋ፥ ያፋያ፥

7ኤልሳማ፥ ኤልዳና፥ ኤልፋላፃ።

8ዳዊቲ እስራኤለ ኡባ ቦላ ካዎ ግድድ ትየትዳይሳ ፍልስፄመት ስእዳ ዎደ ኡባይ ዳዊታ ኦልድ ኦይካናዉ ከይዶሶና። ዳዊቲ ሄሳ ስእድ ኤንታራ ኦለታናዉ ከይስ።

9ፍልስፄመት ራፋይመ ዛንጋራ ይድ ኦይክዶሶና።

10ዳዊቲ፥ “ታኒ ፍልስፄመታ ኦሎ? ኔኒ ኤንታ ታዉ አ እማኔ?” ያግድ ፆሳ ኦይችስ። ጎዳይ፥ “ባዳ ኦላ፤ ታኒ ኤንታ ነዉ አ እማና” ያግስ።

11ዳዊቲነ እያ አሳይ ባአል-ፓራስመ ጌተትያ በሳ ብድ ያን ኤንታ ፆንዶሶና። ዳዊቲ፥ “ሃ ስድ ከየይሳዳ ፆሳይ ታ ሞርከታ ግዶራ ታና ካንስስ” ያግስ። ሄ በሳ ሱንይ ባአል-ፓራስመ ጌተትስ።

12ፍልስፄመት ባንታ ኤቃታ ሄ በሳን የግድ ብን፥ ዳዊቲ ኪትድ ኤንታ ኤቃታ ፁግስስ።

13ፍልስፄመት ዛር ሄ ዛንጋራ ይድ ኦልዶሶና።

14ዳዊቲ ፆሳ ዛሪድ ኦይችስ። ፆሳይ፥ “ኤንታ ጉየራ ዩያ አዳ ዎላ ማታን ኤቃዳ ኦላፐ አትሽን፥ ስን ባጋራ ከዮፓ።

15ዎላ ሁጰን ሳልፐ ግርስ ኔኒ ስእያ ዎደ ኦላናዉ ከያ። ሄስ ፍልስፄመ ኦላንቾታ ሾጫናዉ ፆሳይ ኔፐ ስን አዳይሳስ ማላ” ያግስ።

16ፆሳይ ኪትዳይሳዳ ዳዊቲ ኦስ። ጋባኦናፐ ገዘራ ጋካናዉ እስራኤለ አሳይ ፍልስፄመ ኦላንቾታ ዎዶሶና።

17ዳዊታ ሱንይ ቢታ ኡባ ጋክስ። ካዎተ ኡባይ ዳዊታስ ያያና መላ ጎዳይ ኦስ።

← Chapter 13 Jump to: Chapter 15 →