1 Chronicles 26

Amharic Gofa GFBEVF (ጌሻ ማፃፋ)

← Chapter 25 Jump to: Chapter 27 →

1ፆሳ ኬ ፐንግያ ናገይሳት ሀይሳፈ ካልድ ፃፈትዳይሳታ። ኮይሮይ ቆረ ኮቻፈ አሳፋ አደ ናይታፐ ቆረ ናአ ማሱላማ።

2ማሱላም ላፑን አደ ናይታ የልስ፤ ኤንቲ ባንታ የለታ ማራን ዛካርያሳ፥ ይድኤላ፥ ዮዞባታ፥ ያትንኤላ፥

3ኤላማ፥ ይሆናነ ኤልሆና።

4ፆሳይ ኦቤድ-ኤዶማ አንጅዳ ግሾ፥ እ ሆስፑን አደ ናይታ የልስ። ኤንቲ ባንታ የለታ ማራን ሻማያ፥ ዮዛባታ፥ እዮኣሳ፥ ሳካራ፥ ናትናኤላ፥

5አምኤላ፥ ይሳኮራነ ፑላታ።

6ኦቤድ-ኤዶማ ናአይ ሻማየይ ኡሱፑን አደ ናይታ የልስ፤ ኤንቲ ምኖ አስ ግድዳ ግሾ፥ ባንታ አዋ ሶ አሳስ ሀላቃ ግድዶሶና።

7ሻማያ ናይት ኦትና፥ ራፋኤላ፥ ዮቤዳነ ኤልዛባዳ፤ ኤንታ እሻት ኤልሁይነ ሳማክ ቃራ አሳታ።

8ሀይሳቲ ኡባይ ኦቤድ-ኤዶማ ኮቻታ፤ ኤንቲ፥ ኤንታ ናይታነ ኤንታ ዳቦት ኦሶስ ምኖ። ኦቤድ-ኤዶማ ኮቻት ኩመ ኡሱፑን ታማነ ናምአ።

9ማሱላማስ ምኖ ናይትነ ምኖ ዳቦት ደኦሶና፤ ኤንቲ ኩመ ታማነ ሆስፑና።

10ማራራ ያራፐ ሆሳ ጌተትያ አድያስ ኦይዱ አደ ናይት ደኦሶና። ሽምር ባይራ ናአ ግደና፥ ሽን እያ አዋይ እያ ሀላቃ ኦስ።

11እያ እሻት ካልቀ፥ ዛባላነ ዛካርያሳ። ሆሳ ናይትነ እያ ዳቦት ኩመ ታማነ ሄ።

12ፆሳ ኬ ፐንግያ ናገይሳት ባንታ ሶ አሳ ሀላቃታ ጩጋን ጩጋን ሻከትዶሶና። ሀራ ሌወታዳ ኤንታካ ፆሳ ኬ ኦሶይ ሻሆን ጋክስ።

13እስ እስ ፐንግያ ናጋናዉ ባንታ ሶ አሳን አሳን ናአ ጭማ ጎና ሳማ የግዶሶና።

14ዶሎሀ ፐንግያ ናጋናዉ ሳማይ ሳላማስ ከይስ። ሎኦ ዞረ ዞርያ እያ ናኣ ዛካርያሳ ፑደሀ ፐንግያ ናጋናዉ ሳም ከይስ።

15ኦቤድ-ኤዶማስ ዱገሀ ፐንግያ ናጋናዉ ሳም ከይስ። እያ ናይታስ ቡቁራ ምንጅያ ኬ ናጋናዉ ሳም ከይስ።

16ዉሎሀ ፐንግያነ ቆሞ ባጋራ ደእያ ሻለኮታ ፐንግያ ናጋናዉ ሳም ሱፍማስነ ሆሳስ ከይስ። ናጎይ ማራን ማራን ጋኬስ።

17ጋላስ ጋላስ ዶሎሀ ባጋራ ኡሱፑን፥ ፑደሀ ባጋራ ኦይዳ፥ ዱገሀ ባጋራ ኦይዱ ሌወት ናጎሶና። ቃስ ቡቁራ ምንጅያ ኬ ናምኡ ናምኡ ሌወት ናጎሶና።

18ዉሎሀ ባጋራ ዳባባኮ ኤፍያ ኦግያ ኦይዱ፥ ቃስ ዳባባ ናምኡ ሌወት ናጎሶና።

19ህዛ ቆረስነ ማራራ ኮቻስ እመትዳ ፐንገ ናጎ ኦሶይ ሀይሳ።

20አክያ ጌተትያ ሌወይ ፆሳ ኬን ደእያ ቡቁራነ ፆሳስ ዱማይ ዎዳ እሞታታ ናጋናዉ ሹመትስ።

21ገድሶና ናኣ ላዳና ያራፐ ይኤል ዱማ ዱማ ሶ አሳስ አዋተስ።

22ይኤላ ናይት ዘታማነ እያ እሻ እዩኤላ፤ ኤንቲ ፆሳ ኬን ደእያ ቡቁራ ናጋናዉ ሹመትዶሶና።

23አምራማ፥ ይስሃራ፥ ከብሮናነ ኡዝኤላ ያራታስ ኦሶይ ሻከትድ እመትስ።

24ሙሰ ናኣ ገድሶና ያራ ግድዳ ሳቡኤል ፆሳ ኬን ደእያ ቡቁራ ናገይሳታ ሀላቃታ ቦላ ሹመትስ።

25እ ገድሶና እሻ አላዛራ ባጋራ ሳሎሞታስ ዳቦ። አልአዛር ራሃብያ የልስ፤ ራሃብ የሻያ የልስ፤ የሻይ ዮራማ የልስ፤ ዮራም ዝክራ የልስ፤ ዝክር ሳሎምታ የልስ።

26ሳሎሞትነ እያ ዳቦት ካዎይ ዳዊቲ፥ እያ ሶ አሳ ሀላቃት፥ ሻላቃት፥ ማቶ ሀላቃትነ ቶራ ሞጮናታ ፆሳስ ዱማይዳ ሚሸ ኡባ ቦላ ሹመትዶሶና።

27ሀ አሳት ኦላን ድኤትድ ይዳ ሚሸታፐ ባጋ ፆሳ ኬን ዱማይድ ዎዶሶና።

28ቆንጨ በእያ ሳሜል፥ ቂሳ ናአይ ሳኦል፥ ኔራ ናአይ አበኔርነ ፃሩያ ናአይ እዮኣብ ካሰ ዱማይድ ዎዳ እሞታ ኡባ ሳሎሞትነ እያ ዳቦት ናጎሶና።

29ይስሃራ ያራታፐ ካናነይነ እያ ናይት ፆሳ ኬፈ ካረራ ደእያ ኦሶን እስራኤለ አሳ አይሳናዉነ ዳይናታናዉ ሹመትዶሶና።

30ከብሮና ያራታፐ ሀሻብነ እያ ዳቦት 1,700 ምኖ አሳት፥ ጎዳ ኦሱዋስነ ካዋ ኦሱዋስ ዮርዳኖሰፐ ዉሎሀ ባጋራ ደእያ እስራኤለ አሳ ቦላ ሹመትዶሶና።

31ከብሮና ያራታ ማዝጋብያ ማራን ይርይ ኤንታ ሀላቃ። ዳዊቲ ካዎትዳ ኦይታማን ላይን ማዝጋበን ኮይን ኤንታ አሳ ግዶፈ ምኖ አሳት ጋላዳ ቢታን ያእዜራ ጌተትያ በሳን በንትዶሶና።

32ኤንታ ሶ አሳስ ሀላቃ ግድዳ ይርያ ዳቦት ምኖት 2,700. ካዎይ ዳዊቲ ፆሳ ኦሱዋስነ ካዋ ኦሱዋስ ሮቤላ፥ ጋደነ ምናሰ ኮቻታፐ ባጋታ ቦላ ኤንታ ሹምስ።

← Chapter 25 Jump to: Chapter 27 →