1 Chronicles 5

Amharic Gofa GFBEVF (ጌሻ ማፃፋ)

← Chapter 4 Jump to: Chapter 6 →

1እስራኤለ ባይራ ናኣ ሮቤላ የለታይ ሀይሳፈ ካልድ ፃፈትዳይሳ። ሮቤል ባይራ ናአ፤ ሽን ባ አዋ ሂፃ ቱንስዳ ግሾ፥ ባይራተ ማታይ እስራኤለ ናኣ ዮሰፋ ናይታስ እመትስ። ሄሳ ግሾ፥ እያ የለታይ ባይራተ ማራ ናግድ ፃፈትቤና።

2ይሁድ ባ እሻታፐ አድ ምኖ፤ ባይራተይ ዮሰፋስ እመትዳባ ግድኮካ፥ እስራኤለ አሳ ሃረይስ ይሁዳፐ ከይስ።

3እስራኤለ ባይራ ናኣ ሮቤላ አደ ናይት ሄኖሀ፥ ፓላ፥ ሄስሮናነ ካርማ።

4እዩኤላ ናአይ ሻማያ፤ ሻማያ ናአይ ጎጋ፤ ጎጋ ናአይ ሳመአ፤

5ሳማአ ናአይ ምካ፤ ምካ ናአይ ራያ፤ ራያ ናአይ ብኤላ።

6ብኤላ ናአይ አሶረ ካዎይ ተልገልተልፈልሶሪ ድእድ ኤፍዳ ብኤራ፤ ብኤር ሮቤላ ኮቻታ ሀላቃ።

7ብኤራ ዳቦት፥ ባንታ የለታ ማዝጋበን ፃፍዳ ሮቤላ ያራታ ሀላቃት እዩኤላነ፥ ዛካርያሳ።

8ብኤል አዛዛ ናአ፤ አዛዝ ሻማአ ናአ፤ ሻማእ እዩኤላ ኮቸ። እዩኤላ ኮቻት አሮኤራ ካታማን፥ ነቦ ቢታንነ ባኣል-ማኦና ቢታን ደእዶሶና።

9ሮቤላ ኮቻታስ መሄይ ጋላዳን ዳርዳ ግሾ፥ ኤንቲ ያፐ ዶሎሀ ባጋ ብድ፥ ኤፍራፂሳ ሻፋ ጋካናዉ ደእያ መላ ቢታን ኡትዶሶና።

10ሳኦላ ላይን አጋራ ያራታራ ሮቤላ ያራት ኦለትድ ፆንዶሶና። ጋላዳፐ ዶሎሀ ባጋራ ደእያ አጋራ ያራታ ቢታን ኡትዶሶና።

11ጋደ ኮቻት ሮቤላ ኮቻታፐ ፑደሀ ባጋን፥ ሳልካ ጋካናዉ ደእያ ባሳነ ቢታን ኡትዶሶና።

12እዩኤል ኮይሮ ያራታስ ሀላቃ፤ ሳፋም ናምአን ያራታስ ሀላቃ። ያናይነ ሳፋም ባሳነን ኡትዳ ያራታስ ሀላቃ።

13ኤንታ ዳቦት፥ ባንታ ሶ አሳን አሳን፥ ምካኤላ፥ ማሱላማ፥ ሳባ፥ ዮራያ፥ ያቅካና፥ ዙኤነ ኤቤራ። ኤንቲ ኩመ ላፑና።

14ሀይሳቲ አብካላ ናይት ቡዛ ኮቻታ። ቡዝ የዳያ የልስ፤ የዳየይ እየሳያ የልስ፤ እየሳይ ምካኤላ የልስ፤ ምካኤል ጋላዳ የልስ፤ ጋላድ እዳያ የልስ፤ እዳይ ሁራ የልስ፤ ሁር አብሃላ የልስ።

15ኤንታ ሶ አሳ ሀላቃይ ጉና ናኣ ናኣ አብድኤላ ናኣ አካ።

16ኤንቲ ጋላዳንነ ባሳነን፥ ያን ደእያ ካታማታንነ ሳሮና ቢታን መሄይ ሄመትያ በሳታን ኡትዶሶና።

17ሀይሳታ የለታይ ይሁዳ ካዋ እዮአታማ ዎደ እስራኤለ ካዋ እዮርባማ ዎደ ማዝጋበን ፃፈትስ።

18ሮቤላ ኮቻፈ፥ ጋደ ኮቻፈነ ምናሰ ኮቻ ባጋፈ ጎንዳለ ኦይከይሳት፥ ማሸ ዳንጨይሳትነ ዶንገ ዱከይሳት ምኖነ ኦላን ሎህዳይሳት 44፥ 760.

19ኤንቲ አጋራ ያራራ፥ እፁራ ያራራ፥ ናፈሳራነ ኖዳባራ ኦለትዶሶና።

20ኤንቲ ሄ አሳራ ኦለትሸ ፆሳኮ ዋስዳ ግሾ፥ ማዶ ደምዶሶና። ኤንቲ ፆሳን አማነትዳ ግሾ፥ እ ኤንታዉ ዎሰትስ። ሄሳ ግሾ፥ አጋራ ያራትነ ኤንታራ ደእያ ሀራት ኤንታ ኩሸን ገልዶሶና።

21ባንታ ሞርከታፐ እሻታሙ ሙኩሉ ግማለታ፥ ናምኡ ፄታነ እሻታሙ ሙኩሉ ዶርሳታ፥ ናምኡ ሙኩሉ ሀረታነ ፄቱ ሙኩሉ አሳ ድእድ ኤፍዶሶና።

22ኦላይ ፆሳባ ግድዳ ግሾ ዳሮት ሀይቅዶሶና። ድኤተ ዎደይ ጋካናዉ ሄ ቢታን ደእዶሶና።

23ምናሰ ኮቻፈ ባጋ ያራይ ባሳነፐ ዶምድ፥ ባኣል-አርሞና፥ ሳንራነ አርሞና ዙማ ጋካናዉ ደእያ ቢታን ኡትዶሶና፤ ኤንቲ ሄ ቢታን ዳርዶሶና።

24ኤንታ ሶ ሀላቃት ኤፈራ፥ ይሽአ፥ ኤልኤላ፥ አዝርኤላ፥ ኤርምያሳ፥ ሆዳዋነ እዮድኤላ። ሀይሳቲ ኤንታ ሶ አሳን ኤረትዳይሳታ፥ ፃላነ ዎልቃማ።

25ሽን ባንታ ማይዛታ ፆሳስ አማነትቦኮና፤ ፆሳይ ኤንታ ስንፈ ይስዳ ሄ ቢታ ፆሳታ ጎይንዶሶና።

26ሄሳ ግሾ፥ እስራኤለ ፆሳይ አሶረ ካዋ ፖሀ (ሄስካ ተልገልተልፈልሶራ) አያና ደንድ ሮቤላ ኮቻ፥ ጋደ ኮቻነ ምናሰ ኮቻፈ ባጋ ድእድ፥ ሀላሀ፥ ሀቦራነ ሃራ ቢታነ ጎዛና ሻፋ ኤፍስ። ኤንቲ ሀች ጋካናዉ ያን ደኦሶና።

← Chapter 4 Jump to: Chapter 6 →