1 Chronicles 17

Amharic Gofa GFBEVF (ጌሻ ማፃፋ)

← Chapter 16 Jump to: Chapter 18 →

1ዳዊቲ ባ ጋን ኡትዳፐ ጉየ ናብያ ናታናኮ፥ “ታኒ ዝጋፐ ኬፀትዳ ኬን ደአይስ፤ ሽን ጎዳ ጫቆ ታቦተይ ዱንካነ ግዶን ደኤስ” ያግስ።

2ናታን ዳዊታኮ፥ “ጎዳይ ኔራ ደእያ ግሾ ነ ዎዛናይ ቆፕዳባ ኡባ ኦ” ያግስ።

3ሽን ሄ ቃማ ጎዳ ቃላይ ናታናኮ ሀይሳዳ ያግሸ ይስ፤

4“ባዳ ታ አይልያ ዳዊታኮ ሀይሳዳ ያጋ፤ ‘ታኒ ዳና ኬ ኬፃናይ ነና ግዳካ።

5ታኒ እስራኤለ ግብፀፈ ከስዳ ዎደፐ ዶማዳ ሀች ጋካናዉ ኬን ደአብከ፤ ታኒ ዱንካነፐ ዱንካነ፥ በሳፈ በሲ ዩያሸ ደአስ።

6ታኒ እስራኤለ አሳ ኡባራ ዩይዳ በሳ ኡባን፥ ታ አሳ ሄማና መላ ታኒ ሹምዳ አሳፐ ኦና ታዉ ዝጋ ኬ አይስ ኬፃብኪ?’ ጋዳ ኦይቻብከ” ያጌስ።

7“ሄሳ ግሾ፥ ታ አይልያ ዳዊታኮ ባዳ ኡባፈ ዎልቃማ ጎዳይ ሀይሳዳ ያጌስ፤ ‘ታኒ ነና ዶርሰ ሄምያ በሳፔ ደንዳ ታ አሳ እስራኤለ ካለና መላ ኤሀስ።

8ኔኒ ብዳ በሰ ኡባን ታኒ ኔራ ግዳስ፤ ነ ሞርከታ ኡባ ነ ስንፈ ድጋስ። ህዛ ታኒ ሀ ሳአን ኤረትዳ ግታ አሳዳ ነ ሱን ግታያና።

9ታኒ ታ አሳ እስራኤለስ በሰ እማዳ፥ ኤንታ ሄ በሳን ቶካና። ሄሳ ግሾ፥ ኤንቲ ባንታ በሳን ደአና፤ ኤንቲ ዛሪድ ዋባቆኮና። ካሰ ታኒ ታ አሳ እስራኤለ ቦላ ዳይናታ ሹማዳ ዎደ ሞርከት ናቅዳይሳዳ፥

10ዛሪድ ኢታ አሳት ኤንታ ናቆኮና። ታኒ ነ ሞርከታ ኡባ ነዉ ሃርሳና። “ ‘ሄሳ ቦላ ጎዳይ ባ ሁጰን ነዉ ኬ ኬፃናይሳ ኦዴስ።

11ነ ሀይቃዳ ነ ማይዛታን ጋሄትያ ዎደ ታኒ ኔፐ ጉየ ነ ናይታፐ እሱዋ ደንዳ እያ ካዎተ ምንና።

12ታዉ ኬ ኬፃናይ እያ፤ ታኒ እያ አራታ መርናዉ ምን ኤሳና።

13ታኒ እያዉ አዋ ግዳና፤ እካ ታዉ ናአ ግዳና። ኔፐ ስን ካዎትዳ ሳኦላፐ ታ ማሮተ ኤክዳይሳዳ ታኒ እያፐ ኤክከ።

14ታኒ እያ ታ አሳ ቦላነ ታ ካዎተ ቦላ መርናዉ ሹማና፤ እያ አራታይ መርናዉ ምን ኤቃና’ ” ያግስ።

15ናታን ፆሳይ እያዉ ቆንጭስዳ ቃላ ኡባ ዳዊታስ ኦድስ።

16ሄሳፈ ጉየ፥ ካዎይ ዳዊቲ ዱንካንያ ግዶ ገልድ፥ ጎዳ ስንን ኡትድ፥ ሀይሳዳ ያግድ ዎስስ፤ “አቤት ጎዳዉ፥ ፆሳዉ ኔኒ ሀይሳ ኡባ ታዉ ኦናዉ ታኒ ኦኔ? ታ ሶ አሳይካ አይቤ?

17አቤት ጎዳዉ፥ ሄስ ነ አይፍያ ስንን ጉ ዳንን፥ ነ አይልያ ሶ አሳስ ስንፈ ሀናናባ ኦዳዳሳ። ኔኒ ታና ግታ አስ ኦዳ ፄላዳሳ።

18ኔኒ ታና ነ አይልያ ቦንችዳ ግሾ፥ ዳዊቲ አይ ጋናዉ ዳንዳኢ? ኔኒ ታና ነ አይልያ ኤራሳ።

19አቤት ጎዳዉ፥ ነ አይልያ ግሾነ ነ ዎዛና ቆፋዳ ሀ ግታባ ኡባ ኦዳ፥ ሀ ግታ ኡፋይሳ ቃላ ኡባ ታና ኤርሳዳሳ።

20አቤት ጎዳዉ፥ ነ መል ኦንካ ባዋ። ኑኒ ኑ ሀይን ስእዳይሳዳ ኔፐ አትሽን፥ ሀራ ፆሲ ባዋ።

21ኔኒ ነ አሰ ኦናዉ ዎዝዳ ነ አሳ እስራኤለ ዳንያ ሀራ ካዎተ ሳአ ቦላ ባዋ። ኔኒ ኦዳ ግታነ ማላልስያ ኦሶታ ጋሶን ነ ሱንይ ቢታን ኤረትስ። ኔኒ ግብፀፈ ዎዝዳ ነ አሳ ስንፈ ካዎተታ ጎዳ ከሳዳሳ።

22ኔኒ ነ አሳ እስራኤለ መርናዉ ነባ ኦዳሳ። አቤት ጎዳዉ፥ ኔኒ ኤንታ ፆሰ ግዳዳሳ።

23“አቤት ጎዳዉ፥ ኔኒ ነ አይልያስነ እያ ሶ አሳስ ኦድዳባይ መርናዉ ምንድ ደኦ፤ ኔኒ ኦና ግዳይሳዳ ኦ።

24‘ኡባፈ ዎልቃማ ጎዳይ፥ እስራኤለ ፆሳይ ቱማ እስራኤለ ፆሰ’ አሳይ ጋናዳ ነ ሱንይ መርናዉ ምንድ ዳናነ ግታ ግዳና። ነ አይልያ ዳዊታ ሶ አሳይ ነ ስንን ምንድ ዳና።

25“አቤት ታ ፆሳዉ፥ ኔኒ ነ አይልያስ ኬ ኬፃና ጋዳ ቆንጭሳዳሳ። ሄሳ ግሾ፥ ታኒ ነ አይለይ ሀ ዎሳ ዎሳናዉ ምናስ።

26አቤት ጎዳዉ፥ ኔኒ ፆሰ! ኔኒ ሀ ሎኦ ኡፋይሳ ቃላ ታዉ ነ አይልያስ ኦና ጋዳሳ።

27ነ ስንን መርናዉ ዳና መላ ነ አይልያ ሶ አሳ አንጃናዉ ኮያዳሳ። አቤት ጎዳዉ፥ ነ አንጅዳይስ መርናዉ አንጀትዳይሳ ግዳና” ያግድ ዎስስ።

← Chapter 16 Jump to: Chapter 18 →