1 Chronicles 23

Amharic Gofa GFBEVF (ጌሻ ማፃፋ)

← Chapter 22 Jump to: Chapter 24 →

1ዳዊቲ ጭምዳ ዎደ ባ ናኣ ሶሎሞነ እስራኤለ ቦላ ካዎስ።

2ዳዊቲ እስራኤለ ካለይሳታ ኡባ፥ ካህነታነ ሌወታ እስፈ ሺሽስ።

3ላይ ሀስታማነ እያፐ ቦላ ግድዳ ሌወት ታይበትድ ኩመ 38,000 ግድዶሶና።

4ኤንታፈ ጎዳ ኬ አዋተን አይስያ 24,000 ሌወታ ካዎይ ዎስ፤ 6,000 ሌወታ ሀላቃታነ ፕርዳ ዳይናታ ኦድ ዎስ።

54,000 ሌወታ ፐንገ ናገይሳታ ኦድ ዎስ። ቃስ ጎዳ ጋላታናዉ ዳዊቲ ጊግስዳ የ ሚሸን ጎዳ ጋላትያ 4,000 ሌወታ ዎስ።

6ዳዊቲ ሌወ አደ ናይታ ገድሶና፥ ቃሃታነ ማራራ ኤንታ ያራን ያራን ሄ ጩጋን ሻክስ።

7ገድሶና አደ ናይት ላእዳነነ ሳምአ።

8ላእዳነ ሄ አደ ናይት ይኤላ፥ ዘታማነ እዩኤላ።

9ሳመአ ሄ አደ ናይት ሳሎሞታ፥ ሀዝኤላነ ሀራና፤ ሀይሳቲ ላእዳነ ያራ ሀላቃታ።

10ሳማአ ኦይዱ አደ ናይት ያሃታ፥ ዚዛ፥ ኡሳነ ባርአ።

11ኡስ ባይራ፥ ዚዝ ካሎ። ሽን ኡሳስነ ባርአስ ናይት ዳሮና ግሾ ኤንቲ እስ ያራዳ ታይበትዶሶና።

12ቃሃታ ኦይዱ አደ ናይት አንባራማ፥ ይስሃራ፥ ከብሮናነ ኡዝኤላ።

13አንባራማ አደ ናይት አሮናነ ሙሰ። አሮንነ እያ ኮቻይ ኡባፈ ጌሽ ግዳና መላ ዱማትዶሶና። ኤንቲ ጎዳ ስንን እፃነ ጩይሳናዉ፥ ጎዳስ ኦናዉነ ጎዳ ሱንን አሳ አንጃናዉ መርናዉ ዱማትዶሶና።

14ፆሳ አሰ ግድዳ ሙሰ ናይታ ሌወ ኮቻታራ ጋድ ታይብዶሶና።

15ሙሰ ናይት ገድሶና አላዛራ።

16ገድሶና ናይታ ግዶፈ ሀላቃይ ሳቡኤላ።

17አላዛራ ናአይ ራሃባ። አላዛራስ ሀራ ናእ ባዋ፤ ሽን ራሃባስ ናይት ዳሮ።

18ይስሃራ ናይታ ሀላቃይ ሳሎምታ።

19ከብሮና ናአይ ባይራይ ይርያ፤ ካሎይ አማረ፤ ሄንይ ያሀዝኤላ፤ ኦይዳንይ ያቅምኣማ።

20ኡዝኤላ ባይራ ናአይ ምክያሳ፤ ካሎይ ይሽያ።

21ማራራ ናይት ማህላነ ሙሳ። ማህላ ናይት አላዛራነ ቂሳ።

22አላዛር ማጫ ናአፐ አትሽን፥ አደ ናአ የሎና ሀይቅስ። ሄሳ ግሾ፥ ኤንታ አዋ እሻ ቂሳ ናይት ኤንታ ማችዶሶና።

23ሙሳ ሄ ናይት ማህላ፥ ኤደራነ ይረሞታ።

24ሌወ የለታን ባንታ ኮቻንነ ሶ አሳን ባንታ ሱንን ማዝጋበትዳ ሌወ ኮቻት ሀይሳታ። ላይ ላታማነ እያፐ ቦላ ግድዳ ሌወ ኮቻት ኡባይ ጎዳ ፆሳ ኬን ኦዶሶና።

25ዳዊቲ፥ “ጎዳይ፥ እስራኤለ ፆሳይ ባ አሳ ሸምፕስስ። ጎዳይ የሩሳላመን መርናዉ ዳና።

26ሌወት ዱንካንያነ እያ ግዶን ጎኤትያ ሚሸታ ህዛፐ ጉየ ቶካናዉ በሰና” ያግስ።

27ዳዊቲ ዉርሰ ኪታን፥ ላይ ላታማነ እያፐ ቦላ ግድዳ ሌወት ታይበትዶሶና።

28ኤንቲ ጎዳ ፆሳ ኬን ኦያ አሮና ኮቻታ ማዶሶና። ጎዳ ፆሳ ኬን ካረራነ ሶራ ኦሶና፤ ጌሻ ሚሸ ኡባ ቱኖና መላ ናጎሶና።

29ኤንቲ ፆሳ ስንን ዎያ ኡይ፥ ካ ያርሾስ ሺሽያ ልያ፥ እርሾይ ባይና ኡይነ ዛይተራ ሙኑቀትያ ልያ አዋተን አይሶሶና፤ ፆሳ ኬን ማከትያባነ ልከያባ ኡባ አዋተን ፄሎሶና።

30ቃስ ኤንቲ ኡባ ጋላስ ዎንታነ ኦማርስ ጎዳ ጋላታናዉነ ሳባናዉ ኤቆሶና።

31ሳምባታ ጋላስ፥ አጌና ፄሮን፥ ዎጋይ ኪትያ ሀራ ባኣለ ጋላሳይ ጋክያ ዎደ ጎዳስ ፁሳ ያርሾ ያርሾሶና። ኤንታዉ እመትዳ ታይቡዋዳነ ኪታዳ ኡባ ዎደ ጎዳ ስንን ኦሶና።

32ዱንካንያነ ጎዳ ፆሳ ኬ ናጋና መላነ ባንታ እሻ ግድዳ፥ አሮና አደ ናይታ፥ ማዳና መላ አዋተ ሌወታስ እመትስ።

← Chapter 22 Jump to: Chapter 24 →