Psalms 104

Amharic Tigrinya 2011

← Chapter 103 Jump to: Chapter 105 →

1ነፍሰይ፡ ንእግዚኣብሄር ባርኺ፡ ግርማን ክብርን ለበስካ።

2ንብርሃን ከም ልብሲ ለበስካዮ፡ ንሰማያት ከም መጋረጃ ዘርጋሕካዮ፡

3ንርሻንካ ኣብ ማያት ሀነጽካዮ፡ ንደበናስ ሰረገላኻ ገበርካ፡ ኣብ ኣኽናፍ ንፋስ ኴንካ ኸድካ።

4ንንፋሳት ልኡኻትካ፡ ንሃልሃልታ ሓዊ ኣገልገልትኻ ገበርካዮም።

5ንዘለኣለም ከይትናወጽሲ፡ ንምድሪ ኣብ መሰረታ ኣጽንዓ።

6ከም ብልብሲ ብመዓመቚ ኣልበስካያ፡ ማያት ኣብ ልዕሊ ኣኽራን ቈሙ።

7ብመግናሕትኻ ሀደሙ፡ ብድምጺ ነጐድጓድካ ቐልጢፎም ከዱ።

8ኣብቲ ዝመደብካሎም ቦታ ኣኽራን ልዕል በሉ፡ ለሴታትውን ለጠቕ በሉ።

9ተመሊሶም ንምድሪ ኸይከድንዋስ፡ ዘይሐልፍዎ ደረት ወሰንካሎም።

10ኣብ ሽንጭሮታት ዓይኒ ማያት ኣንታዕካ፡ ኣብ መንጎ ኣኽራን ይውሕዛ።

11ንዂሉ እንስሳ መሮር የስትያኦ፡ ኣእዱግ በረኻ ይረውዩለን።

12ኣዕዋፍ ሰማይ ኣብ ጥቓኤን ይነብራ፡ ካብ ማእከል ጨናፍር ከኣ ድምጸን የስምዓ።

13ነኽራን ካብ ርወናትካ ተስትዮ፡ ምድሪ ብፍረ ተግባርካ ትጸግብ።

14ወይኒ ንልቢ ሰብ ኬሕጒሶ፡ ዘይቲ ንገጹ ኼብርሆ፡ እንጌራውን ንልቢ ሰብ ኬጽንዖስ፡ ካብ ምድሪ ምግቢ ምእንቲ ኼውጽእ፡ ንእንስሳስ ሳዕሪ፡ ንጥቕሚ ሰብ ከኣ ተኽሊ ኣብቈልካ።

16ኣእዋም እግዚኣብሄርን እተን ዝተኸልካየን ጽሕድታት ሊባኖስን ጸገባ።

17ኣዕዋፍ ኣብኡ እንዳኤን ይሰርሓ፡ ጽሕድታት ንራዛ ማሕደሪኡ እየን።

18ነዋሕቲ ኣኽራን ንሰሰውሕ፡ ኣኻውሕ ድማ መዕቈቢ ጊሔታት እዩ።

19ወርሒ ንመመደብ ግዝያት ገበረ፡ ጸሓይ ንምዕራባ ትፈልጥ።

20ጸልማት ትገብር፡ ለይትውን ይኸውን፡ ብእኡ ዂሎም እንስሳ ዱር ይዛወሩ።

21ሽደናት ኣንበሳ ንምዝራፍ ይጓዝሙ፡ ቀለቦም ከኣ ካብ ኣምላኽ ይደልዩ።

22ጸሓይ ትበርቕ፡ ይምለሱ፡ ኣብ ጒድጓዶም ድማ ይድቅሱ።

23ሰብ ናብ ተግባሩን ናብ ዕዮኡን ክሳዕ ምሸት ይወጽእ።

24ዎ እግዚኣብሄር፡ ግብርታትካስ ክንደይ ብዙሕ እዩ፡ ንዂሉ ብጥበብ ገበርካዮ፡ ምድሪ ብሃብትኻ መሊኣ ኣላ።

25እታ ዓባይን ገፋሕን ባሕሪ እዚኣ እያ፡ ቊጽሪ ዜብሎም ዓበይትን ናእሽቱን እንስሳ ኣብኣ ይዋሳወሱ ኣለዉ።

26ኣብኣ መራኽብ ይኸዳ፡ እቲ ዝፈጠርካዮ ሌዋታን ኣብኣ ይጻወት።

27እዚኣቶም ኲሎም ምግቦም በብጊዜኡ ኽትህቦምሲ፡ ንኣኻ ይጽበዩ ኣለዉ።

28ንስኻ ትህቦም፡ ይኣክቡ፡ ንስኻ ኢድካ ትዝርግሕ፡ ብጸጋውን ይጸግቡ ኣለዉ።

29ንስኻ ገጽካ ትኽውል፡ ይስምብዱ፡ ትንፋሶም ተውጽእ፡ ይሞቱ፡ ኣብ መሬቶምውን ይምለሱ።

30ትንፋስካ ትልእኽ፡ ይፍጠሩ፡ ንገጽ ምድሪውን ትሕድሳ።

31ክብሪ እግዚኣብሄር ንዘለኣለም ይንበር፡ እግዚኣብሄር ብተግባሩ ይተሐጐስ።

32ኣብ ምድሪ ይጥምት፡ ንሳ ኸኣ ተንቀጥቅጥ፡ ነኽራን ይትንክዮም እሞ ይተኩ።

33ብህይወተይ ከሎኹ፡ ንእግዚኣብሄር እዝምር፡ ክሳዕ ዘሎኹ ንኣምላኸይ ኤመስግን።

34ቃላተይ ባህ የብሎ፡ ብእግዚኣብሄር እሕጐስ እየ።

35ሓጥኣን ካብ ምድሪ ይጥፍኡ፡ ረሲኣንውን ደጊም ኣይሀልዉ፡ ነፍሰየ፡ ንእግዚኣብሄር ባርኽዮ።

← Chapter 103 Jump to: Chapter 105 →