Psalms 119 — Amharic Tigrinya 2011

1ብመገዶም ፍጹማት ዝዀኑ፡

2ምስክራቱ ዚሕልዉ፡ ብምሉእ ልቢ ዚደልይዎ ብጹኣን እዮም።

3እከይ ኣይገብሩን፡ ብመገድታቱ ኸኣ ይመላለሱ።

4ኣጸቢቑ ምእንቲ ኺሕሎ፡ ትእዛዛትካ ኣዘዝካ።

5ኣየ፡ ስርዓታትካ ኽሕሉስ፡ መገደይ እንተ ዚቐንዕ።

6ንዂሉ ትእዛዛትካ እንት ዝቋመት፡ ሽዑ ኣይምሐፈርኩን።

7ፍርዲ ጽድቅኻ ምስ ተምሀርኩ፡ ብቕንዕና ልቢ ኸመስግነካ እየ።

8ስርዓታትካ ኽሕሉ እየ፡ ፈጺምካ ኣይትሕደገኒ።

9ጐበዝ ንመገዱ ብምንታይ የንጽሃ? ከም ቃልካ ንነፍሱ ብምጥንቃቕ እዩ።

10ብምሉእ ልበይ እደልየካ ኣሎኹ፡ ካብ ትእዛዛትካ ኸየግልስ ኣይትሕደገኒ።

11ንኣኻ ምእንቲ ኸይብድልሲ፡ ንቓልካ ኣብ ልበይ ዐቘርክዎ።

12ዎ እግዚኣብሄር፡ ንስኻ ብሩኽ ኢኻ፡ ስርዓታትካ ምሀረኒ።

13ንዂሉ ፍርድታት ኣፍካ ብኸናፍረይ ኣዘንቶኹ።

14ብመገዲ ምስክራትካ ኸም ብዂሉ ሃብቲ ገይረ ተሐጐስኩ።

15ንትእዛዛትካ ኤስተንትኖ፡ ንመገድኻውን እቋመቶ ኣሎኹ።

16ብስርዓታትካ ባህ እብል፡ ንቓልካ ኣይክርስዖን እየ።

17ብህይወት ክነብር፡ ቃልካውን ክሕሉስ፡ ንባርያኻ ሰናይ ግበረሉ።

18ኣብ ሕግኻ ተኣምራት ክርእስ፡ ኣዒንተይ ክፈተለይ።

19ኣነ ኣብ ምድሪ ጋሻ እየ፡ ትእዛዛትካ ኣይትሕብኣለይ።

20ነፍሰይ፡ ኲሉ ጊዜ ፍርድኻ ብምንፋቕ ተቐጥቀጠት።

21ነቶም ትዕቢተኛታት፡ ነቶም ካብ ትእዛዛትካ ዜግልሱ ርጉማት ገናሕካ።

22ምስክራት ሐልየ እየ እሞ፡ ጸርፍን ንዕቀትን ኣርሕቐለይ።

23መሳፍንቲ ተቐሚጦም እኳ እንተ ሐመዩኒ፡ ባርያኻስ ብስርዓታትካ የስተንትን ኣሎ።

24ምስክራትካ ድማ ባህታይን መኸርተይን እዮም።

25ነፍሰይ ኣብ ሓመድ ተጣበቐት፡ ከም ቃልካ ህያው ግበረኒ።

26መገደይ ኣዘንቶኹ፡ ንስኻውን መለስካለይ፡ ስርዓታትካ ምሀረኒ።

27ንተኣምራትካ ኸስተንትኖስ፡ መገዲ ትእዛዛትካ ኣፍልጠኒ።

28ነፍሰይ ብሓዘን ትነብዕ ኣላ፡ ከም ቃልካ ኣደልድለኒ።

29መገዲ ሓሶት ኣርሕቐለይ፡ ሕግኻውን ብሳህልኻ ፍቐደለይ።

30መገዲ ሓቂ መረጽኩ፡ ፍርድታትካ ኣብ ቅድመይ ኣንበርኩ።

31ኣብ ምስክራትካ እጠብቕ፡ ዎ እግዚኣብሄር፡ ኣይተሕፍረኒ።

32ልበይ ምስ ኣግፋሕካ፡ ብመገዲ ትእዛዛትካ ኽጐዪ እየ።

33ዎ እግዚኣብሄር፡ መገዲ ስርዓታትካ ምሀረኒ፡ ክሳዕ መወዳእታውን ክሕልዎ እየ።

34ምስትውዓል ሀበኒ እሞ፡ ንሕግኻ ኽሕልዎ፡ ብምሉእ ልበይውን ክገብሮ እየ።

35ብእኡ ባህ ኢሉኒ እዩ እሞ፡ ብመገዲ ትእዛዛትካ ኣመላልሰኒ።

36ንልበይ ናብ ምስክራትካ እምበር፡ ናብ ስስዔ ገንዘብ ኣይተዝብሎ።

37ነዒንተይ ካብ ምርኣይ ከንቱነት ምለሰን፡ ብመገድኻ ህያው ግበረኒ።

38ነቲ ናብ ፍርሃትካ ዚመርሕ ቃልካ ኣብ ባርያካ ኣጽንዓዮ።

39ፍርድታትካ ሰናይ እዩ እሞ፡ ነቲ ዝፈርሆ ጸርፊ ኣርሕቐለይ።

40እንሆ፡ ትእዛዛትካ እናፍቕ ኣሎኹ፡ ብጽድቅኻ ህያው ግበረኒ።

41ዎ እግዚኣብሄር፡ ከምቲ ቓልካ ምሕረትካን ምድሓንካን ይምጽኣኒ።

42ኣብ ቃልካ ተወኪለ እየ እሞ፡ ነቲ ዚጸርፈኒ ምላሽ ክህቦ እየ።

43ንፍርድታትካ እጽበ ኣሎኹ እሞ፡ ነቲ ቓል ሓቂ ኻብ ኣፈይ ፈጺምካ ኣይተግድፈኒ።

44ኣነውን ንሕግኻ ኣዘውቲረ፡ ኲሉ ጊዜ፡ ንዘለኣለም ክሕልዎ እየ።

45ትእዛዛትካ ድማ ደልየ እየ እሞ፡ ብገፊሕ ቦታ ኽመላለስ እየ።

46ኣብ ቅድሚ ነገስታት ከኣ ምስክራትካ ኽዛረብ፡ ኣይክሐፍርን ድማ እየ።

47በቲ ዘፍቅሮ ትእዛዛትካውን ባህ ክብል እየ።

48ኣእዳወይ ድማ ናብቲ ዘፍቅሮ ትእዛዛትካ ኸልዕል፡ ስርዓታትካ ኸኣ ከስተንትን እየ።

49ነቲ ንባርያኻ ዘተስፎኻዮ ቓል ዘክር።

50ቃልካ ህያው ገይሩኒ እዩ እሞ፡ እዚ ኣብ መከራይ መጸናንዕየይ እዩ።

51ትዕቢተኛታት ኣዝዮም ኣላገጹለይ፡ ኣነ ግና ካብ ሕግኻ ኣየግለስኩን።

52ጐይታየ፡ ናይ ጥንቲ ፍርድታትካ እናሐሰብኩ፡ እጸናናዕ ኣሎኹ።

53ብሰሪ እቶም ሕግኻ ዝሐደጉ ረሲኣን ብቚጥዓ ተቓጸልኩ።

54ኣብ ቤት ግሽነተይ ስርዓታትካ መዝሙራተይ እዩ።

55ዎ እግዚኣብሄር፡ ብለይቲ ስምካ ሐሰብኩ፡ ሕግኻውን ሐሎኹ።

56ትእዛዛትካ ሐልየ እየ እሞ፡ እዚ ዕድለይ ኰነ።

57ጐይታየ፡ ምሕላው ቃልካ ግደይ እዩ፡ በልኩ።

58ብምሉእ ልበይ ኣባኻ እምህለል ኣሎኹ፡ ከም ቃልካ ምሐረኒ።

59ንመገደይ ሐሰብኩ፡ ኣእጋረይውን ናብ ምስክራትካ መለስኩ።

60ትእዛዛትካ ንምሕላው ቀልጠፍኩ እምበር፡ ኣይደንጔኹን።

61ኣግማድ ረሲኣን ከበበኒ፡ ሕግኻ ግና ኣይረሳዕኩን።

62ስለቲ ጻድቕ ፍርድኻ ኸመስግነካ፡ ፍርቂ ለይቲ ኽትንስእ እየ።

63ኣነ ብጻይ እቶም ዚፈርሁኻ ዂሎምን ትእዛዛትካ ዚሕልዉን እየ።

64ጐይታየ፡ ምድሪ ብጸጋኻ መሊኣ ኣላ፡ ስርዓታትካ ምሀረኒ።

65ዎ እግዚኣብሄር፡ ከም ቃልካ ንባርያኻ ሰናይ ገበርካሉ።

66ትእዛዛትካ ኣሚነ ኣሎኹ እሞ፡ ሰናይ ምስትውዓልን ፍልጠትን ምሀረኒ።

67ከይተዋረድኩ ተጋጌኹ፡ ሕጂ ግና ቓልካ እሕሉ ኣሎኹ።

68ንስኻ ሰናይ ኢኻ እሞ፡ ሰናይ ትገብር ኣሎኻ፡ ስርዓትካ ምሀረኒ።

69ትዕቢተኛታት ሓሶት ይፍሕሱለይ ኣለዉ፡ ኣነ ግና ብምሉእ ልበይ ትእዛዛትካ እሕሉ ኣሎኹ።

70ልቦም ከም ስብሒ ረጐደ፡ ኣነ ግና ብሕግኻ ባህ እብል ኣሎኹ።

71ስርዓታትካ ምእንቲ ኽምሀር፡ ውርደተይ ሰናይ ኰነለይ።

72ካብ ኣእላፋት ወርቅን ብሩርንሲ ሕጊ ኣፍካ ይሔሸኒ።

73ኣእዳውካ ገበራንን ሰርሓንን፡ ትእዛዛትካ ኽምሀርሲ፡ ኣለብመኒ።

74ንቓልካ ተጸብየ እየ እሞ፡ እቶም ዚፈርሁኻ ርእዮምኒ ኺሕጐሱ ኣዮም፡

75ጐይታየ፡ ፍርድኻ ጽድቂ ምዃኑ፡ ብሓቅኻውን ከም ዘዋረድካኒ፡ እፈልጥ ኣሎኹ።

76ከምቲ ንባርያኻ ዝበልካዮ ቓል፡ ጸጋኻ መጸናንዒ ይኹነኒ።

77ሕግኻ ደስታይ እዩ እሞ፡ ብህይወት ክነብርሲ፡ ምሕረትካ ይውረደኒ።

78ዕቡያት ብሓሶት ጠውዮምኒ እዮም እሞ፡ ይሕፈሩ፡ ኣነ ግና ትእዛዛትካ ኤስተንትን ኣሎኹ።

79እቶም ዚፈርሁኻን ምስክራትካ ዚፈልጡን ናባይ ይመለሱ።

80ምእንቲ ኸይሐፍርሲ፡ ልበይ ብስርዓታትካ ፍጹም ይኹን።

81ነፍሰይ ንምድሓንካ ትናፍቖ ኣላ፡ ንቓልካ እጽበዮ ኣሎኹ።

82መኣዝ ኢኻ እተጸናንዓኒ? እናበልኩ፡ ብናፍቖት ቃልካ ኣዒንተይ ሐመቓ።

83ከም ኣብ ትኪ ዘሎ ሓርቢ ዀንኩ፡ ስርዓታትካ ግና ኣይረሳዕኩን።

84መዓልትታት ባርያኻ ኽንደይ እየን? ንሰጐጒተይከ መኣዝ ኢኻ እትፈርዶም?

85እቶም ከም ሕግኻ ዘይነበሩ ትዕቢተኛታት ጒድጓድ ኰዐቱለይ።

86ኲሉ ትእዛዛትካ ሓቂ እዩ፡ ብዘይ ምኽንያት ይሰጉኒ ኣለዉ፡ ርድኣኒ።

87ካብ ምድሪ ኼጥፍኡኒ ቕሩብ ተረፎም፡ ኣነ ግና ትእዛዛትካ ኣይሐደግኩን።

88ከም ጸጋኻ ህያው ግበረኒ፡ ኣነውን ምስክር ኣፍካ ኽሕሉ እየ።

89ዎ እግዚኣብሄር፡ ቃልካ ንዘለኣለም ኣብ ሰማይ ጸኒዑ ኣሎ።

90ሓቅኻ ኻብ ወለዶ ንወለዶ እዩ፡ ንምድሪ ኣጽኒዕካያ፡ ንሳውን ትነብር ኣላ።

91ብዘሎ ዂሉ ንኣኻ የገልግል እዩ እሞ፡ ክሳዕ ሎሚ ኸም ሕጋጋትካ ቘይሙ ኣሎ።

92ሕግኻ ደስታይ እንተ ዘይነብርሲ፡ ዛጊት ብመከራይ ምጠፋእኩ ነይረ።

93ብእኡ ህያው ጌርካኒ ኢኻ እሞ፡ ንትእዛዛትካ ከቶ ኣይክርስዖን እየ።

94ትእዛዛትካ ደልየ እየ እሞ፡ ናትካ እየ፡ ኣድሕነኒ።

95ረሲኣን፡ ምእንቲ ኼጥፍኡኒ፡ ይጸናተዉኒ ኣለዉ፡ ኣነ ግና ንምስክራትካ ኤስተብህሎ ኣሎኹ።

96ኲሉ ፍጽምነት መወዳእታኡ ርኤኹ፡ ትእዛዝካ ግና ኣዝዩ ርሒብ እዩ።

97ንሕግኻ እምብዛ ኣፍቀርክዎ፡ ምሉእ መዓልቲ ኤስተንትኖ ኣሎኹ።

98ትእዛዛትካ ንሓዋሩ ምሳይ እዩ እሞ፡ ሓለፋ ጸላእተይ ኣለበመኒ።

99ምስክራትካ ምስትንታነይ እዩ እሞ፡ ሓለፋ ዂሎም መምህራነይ ለባም ኰንኩ።

100ትእዛዛትካ ሐልየ እየ እሞ፡ ሓለፋ እቶም ሽማግሌታት ኣእምሮ ኣሎኒ።

101ቃልካ ምእንቲ ኽሕሉስ፡ ኣእጋረይ ካብ ክፉእ ዘበለ መገዲ ኸልከልኩ።

102ንስኻ ምሂርካኒ ኢኻ እሞ፡ ካብ ፍርድኻ ኣይርሕቕን እየ።

103ቃላትካ ንትንሓገይ እምብዛ ጥዑም እዩ፡ ንኣፈይ ካብ መዓር ዝበለጸ ይምቅር።

104ሳላ ትእዛዛትካ ኣእምሮ ረኸብኩ፡ ስለዚ ዂሉ መገዲ ሓሶት ጸላእኩ።

105ቃልካ ንእግረይ መብራህቲ፡ ንመገደይ ብርሃን እዩ።

106ንፍርድታት ጽድቅኻ ኽሕሉ መሐልኩ፡ ኣጽናዕክዎ ኸኣ።

107ኣዝየ ተጨነቕኩ፡ ዎ እግዚኣብሄር፡ ከም ቃልካ ህያው ግበረኒ።

108ዎ እግዚኣብሄር፡ ፍርድታትካ ምሀረኒ፡ እቲ ፈትየ ዘቕርበልካ መስዋእቲ ኣፈይ ባህ የብልካ።

109ነፍሰይ ኲሉ ጊዜ ኣብ ኢደይ እያ፡ ኣነ ግና ሕግኻ ኣይርስዕን እየ።

110ረሲኣን መፈንጠርያ ኣጻወዱለይ፡ ኣነ ግና ካብ ትእዛዛትካ ኣየግለስኩን።

111ምስክራትካ ሓጐስ ልበይ እዩ እሞ፡ ንዘለኣለም ርስተይ ገበርክዎ።

112ስርዓታትካ ንሓዋሩ ኽሳዕ መወዳእታ ኽገብር፡ ልበይ ኣድነንኩ።

113ክልተ ዝልቦም ጸላእኩ፡ ሕግኻ ግና ፈቶኹ።

114ንስኻ መዕቈብየይን ዋልታይን ኢኻ፡ ብቓልካ ተስፋ እገብር ኣሎኹ።

115ትእዛዛት ኣምላኸይ ክሕሉስ፡ ኣቱም ሕሱማት፡ ካባይ ርሐቑ።

116ብህይወት ክነብርሲ፡ ከም ቃልካ ደግፈኒ፡ ብተስፋይ ድማ ኣይተሕፍረኒ።

117ምእንቲ ኽድሕን ደግፈኒ፡ ንስርዓታትካውን ኲሉ ጊዜ ኽቋመቶ እየ።

118ተንኰሎም ሓሶት እዩ እሞ፡ ነቶም ካብ ስርዓታተካ ዜግልሱ ዂሎም ትረግጾም።

119ንስኻ ንዂሎም ረሲኣን ምድሪ ኸም ሓርኢ ሓጺን ትጒሕፎም፡ ስለዚ ንምስክራትካ ኣፍቀርኩ።

120ካብ ስምባድካ እተላዕለ ስጋይ ይርዕድ፡ ፍርድኻውን የሸብረኒ ኣሎ።

121ፍርድን ጽድቅን እገብር ኣሎኹ፡ ነቶም ጠቓዕተይ ኣሕሊፍካ ኣይትሀበኒ።

122ንባርያኻ ብሰናይ ተውሐሶ፡ ዕቡያት ኪጠቕዑኒ ኣይትፍቀደሎም።

123ኣዒንተይ ብናፍቖት ምድሓንካን ቃል ጽድቅኻን ሐመቓ።

124ከም ጸጋኻ ንባርያኻ ግበረሉ፡ ስርዓታትካ ኸኣ ምሀረኒ።

125ኣነ ባርያኻ እየ፡ ምስክራትካ ኽፈልጥሲ፡ ኣእምሮ ሀበኒ።

126ሕግኻ ኣፍሪሶም እዮም እሞ፡ እግዚኣብሄር ግብሩ ዚገብረሉ ጊዜ እዮ።

127ስለዚ ንትእዛዛትካ ኻብ ወርቂ፡ ካብ ጽሩይ ወርቂ ኣብሊጸ እፈትዎ ኣሎኹ።

128ስለዚ ትእዛዛትካ ዘበለ ዂሉ ቕኑዕ ምዃኑ እቘጽሮ፡ መገዲ ሓሶት ዘበለ ኸኣ እጸልኦ ኣሎኹ።

129ምስክራትካ መስተንክር እዩ፡ ስለዚ ነፍሰይ ትሕልዎ።

130ምኽፋት ቃልካ የብርህ፡ ንገርህታት ኣእምሮ ይህብ።

131ትእዛዛትካ ናፊቐ እየ እሞ፡ ኣፈይ ሃህ ኣቢለ እህህ እብል ኣሎኹ።

132ከምቲ ነቶም ስምካ ዚፈትዉ እትገብረሎም፡ ተመለሰንን ምሐረንን።

133ንስጒምተይ ኣብ ቃልካ ኣጽንዓዮ፡ እከይ ድማ ከቶ ኣይምለኸኒ።

134ካብ መጥቃዕቲ ሰብ ተበጀወኒ፡ ኣነውን ትእዛዛትካ ኽሕሉ እየ።

135ገጽካ ንባርያካ ኣብርሃሉ፡ ስርዓታትካ ኸኣ ምሀረኒ።

136ሕግኻ ኣይሕልዉን እዮም እሞ፡ ኣዒንተይ ወሓዚ ማይ የፍስሳ ኣለዋ።

137ዎ እግዚኣብሄር፡ ንስኻ ጻድቕ ኢኻ፡ ፍርድኻ ድማ ቅኑዕ እዩ።

138ብጽድቅን ብዕዙዝ ሓቅን ምስክራትካ ኣዘዝካ።

139ተጻረርተይ ቃልካ ረሲዖም እዮም እሞ፡ ቅንኣተይ ይበልዓኒ ኣሎ።

140ቃልካ ኣዝዩ ጽሩይ እዩ፡ ባርያኻውን የፍቅሮ ኣሎ።

141ኣነ፡ ንኡስን ንዑቕን እየ፡ ትእዛዛትካ ግና ኣይረሳዕኩን።

142ጽድቅኻ ናይ ዘለኣለም ጽድቂ እዩ፡ ሕግኻውን ሓቂ እዩ።

143መከራን ሽጋርን ረኸበኒ፡ ትእዛዛትካ ግና ደስታይ እዩ።

144ምስክራትካ ንዘለኣለም ጽድቂ እዩ፡ ኣእምሮ ሀበኒ እሞ፡ ብህይወት ክነብር እየ።

145ብምሉእ ልበይ እምህለል ኣሎኹ፡ ዎ እግዚኣብሄር፡ ምለሰለይ፡ ስርዓታትካ ኽሕሉ እየ።

146ናባኻ ተማህለልኩ፡ ኣድሕነኒ፡ ምስክራትካውን ክሕሉ እየ።

147ቅድሚ ወጋሕታ መጺኤ ኣእዌኹ፡ ንቓልካ እጽበ እኔኹ።

148ንቓልካ ኼስተንትንሲ፡ ኣዒንተይ ነቶም ናይ ለይቲ ሓለውቲ ቐደማኦም።

149ከም ሳህልኻ ድምጸይ ስማዕ፡ ዎ እግዚኣብሄር፡ ከም ፍርድኻ ህያው ግበረኒ።

150ንሕሰም ዚስዕቡ ይቐርቡ ኣለዉ፡ ካብ ሕግኻ ረሐቑ።

151ዎ እግዚኣብሄር፡ ቀረባ ኢኻ፡ ኲሉ ትእዛዛትካ ኸኣ ሓቂ እዩ።

152ንዘለኣለም ከም ዝመስረትካዮ፡ ካብ ጥንቲ ጀሚረ ብምስክራትካ ፈለጥኩ።

153ሕግኻ ኣይረሳዕኩን እሞ፡ መከራይ ርኢኻ ኣናግፈኒ።

154ጠበቓይ ኩን እሞ ተበጀወኒ፡ ከም ቃልካ ህያው ግበረኒ።

155ረሲኣን ስርዓታትካ ኣይደልዩን እዮም እሞ፡ ምድሓንካ ኻብኦም ረሐቐ።

156ዎ እግዚኣብሄር፡ ርሕራሔኻ ዓብዪ እዩ፡ ከም ፍርድኻ ህያው ግበረኒ።

157ሰጐጒተይን ተጻረርተይን ብዙሓት እዮም፡ ኣነ ኻብ ምስክራትካ ኣየግለስኩን።

158ቃልካ ኣይሕልዉን እዮም እሞ፡ ንጠለምቲ ርእየ ፈንፈንክዎም።

159ዎ እግዚኣብሄር፡ ንትእዛዛትካ ኸም ዘፍቅሮ ርኤ፡ ከም ሳህልኻ ህያው ግበረኒ።

160ብዘሎ ቓልካ ሓቂ እዩ፡ ኲሉ ፍርዲ ጽድቅኻ ድማ ንዘለኣለም ይነብር።

161መሳፍንቲ ብዘይ ምኽንያት ሰጐጉኒ፡ ልበይ ግና ቃልካ እዩ ዚፈርህ።

162ከምቲ ብዙሕ ምርኮ ዝማረኸ፡ ብቓልካ ባህ ይብለኒ ኣሎ።

163ንሓሶት እጸልኦን እፍንፍኖን፡ ንሕግኻ ግና ኤፍቅሮ ኣሎኹ።

164ስለ ጽድቂ ፍርድኻ ኣብ መዓልቲ ሾብዓተ ሳዕ ኤመስግነካ ኣሎኹ።

165እቶም ዜፍቅሩ ብዙሕ ሰላም ኣለዎም፡ ዜዐንቅፎም ከኣ የልቦን።

166ዎ እግዚኣብሄር፡ ንምድሓንካ ተጸቤኽዎ፡ ትእዛዛትካ ድማ ገበርኩ።

167ነፍሰይ ንምስክራትካ ሐለወቶ፡ ኣዝየውን ኤፍቅሮ ኣሎኹ።

168ኲሉ መገደይ ኣብ ቅድሜኻ እዩ እሞ፡ ትእዛዛትካን ምስክራትካን ሐሎኹ።

169ዎ እግዚኣብሄር፡ ኣውያተይ ኣብ ቅድሜኻ ይብጻሕ፡ ከም ቃልካ ኣእምሮ ሀበኒ።

170ምህለላይ ኣብ ቅድሜኻ ይብጻሕ፡ ከም ቃልካ ኣናግፈኒ።

171ስርዓታትካ ምሂርካኒ ኢኻ እሞ፡ ከናፍረይ ምስጋናኻ ኼፈልፍላ እየን።

172ኲሉ ትእዛዛትካ ጽድቂ እዩ እሞ፡ ልሳነይ ንቓልካ ኽትነግር እያ።

173ትእዛዛትካ ሐርየ እየ እሞ፡ ኢድካ ረዳኢተይ ትኹን።

174ጐይታየ፡ ምድሓንካ እናፍቕ ኣሎኹ፡ ሕግኻውን ደስታይ እዩ።

175ንነፍሰይ ህያው ግበራ፡ ንሳ ኸኣ ከተመስግነካ እያ፡ ፍርድታትካውን ይርዳኣኒ።

176ከም ጥፍእቲ በጊዕ ተባረርኩ፡ ትእዛዛትካ ኣይረሳዕኩን እሞ፡ ንባርያኻ ድለዩ።