Psalms 109

Amharic Tigrinya 2011

← Chapter 108 Jump to: Chapter 110 →

1ኣታ ኣምላኽ ምስጋናይ፡ ኣፍ ረሲኣን ኣፍ ጥበራን ናባይ ተኸፊቶም፡ ብሓሳዊት መልሓስ ይዛረቡኒ፡ ብቓላት ጽልኢ ኸቢቦምኒ፡ ብዘይ ምኽንያት ይዋግኡኒ ኣለዉ እሞ፡ ስቕ ኣይትበል።

4ኣብ ክንዲ ዘፍቀርክዎም ተጻረሩኒ፡ ኣነ ግና እጽሊ ኣሎኹ።

5ኣብ ክንዲ ሰናይ እከይ፡ ኣብ ክንዲ ፍቕረይ ከኣ ጽልኢ ፈድዮምኒ።

6ረሲእ ኣብ ልዕሊኡ ኣቚመሉ፡ ተጻራሪ ኣብ የማኑ ይቑም።

7ምስ ተፈርደ፡ ተረቲዑ ይውጻእ፡ ጸሎቱውን ንሓጢኣት ይኹኖ።

8መዓልትታቱ ሒደት ይኹና፡ ንሽመቱውን ካልእ ይውሰዳ።

9ውሉዱ ዘኽታማት ይኹኑ፡ ሰበይቱውን መበለት ትኹን።

10ውሉዱ እናዞሩ ይለምኑ፡ ካብተን ዝዐነዋ ኣባይቶም ርሒቖም፡ እንጌራ ይድለዩ።

11ንዘለዎ ዂሉ እቲ መሓረጺ ይሐዞ፡ ጓኖት ከኣ ንጻማኡ ይዝመትዎ።

12ዚልውሃሉ ሓደ እኳ ኣይረኸብ፡ ንዘኽታማቱ ዚርሕርሓሎም ከኣ ሓደ እኳ ኣይሀሉ።

13ሐድጉ ይጽነቱ፡ ስሞም ኣብ ካልኣይ ወለዶ ይደምሰስ።

14በደል ኣቦታቱ ኣብ ቅድሚ እግዚኣብሄር ይዘከር፡ ሓጢኣት ኣዲኡ ኸኣ ኣይደምሰስ።

15ኲሉ ጊዜ ኣብ ቅድሚ እግዚኣብሄር ይኹኑ፡ መዘከርታኦም ካብ ምድሪ የጥፍኣዮ።

16ንመስኪንን ንድኻን፡ ነቲ ልቡ እተሰብረን ምእንቲ ኪቐትሎም ሰጐጎም እምበር፡ ምሕረት ኪገብር ስለ ዘይሐሰበ፡

17ንመርገም ፈተዋ፡ ንሳ ኸኣ መጸቶ፡ ንበረኽት ኣይበሀጋን፡ ንሳውን ረሐቐቶ።

18ንመርገም ከም ክዳኑ ተኸድና፡ ንሳ ኸኣ ከም ማይ ናብ ውሽጡ፡ ከም ቅብኢውን ናብ ኣዕጽምቱ ሰረጸት።

19ከምቲ ዚጓናጸፈሉ ልብስን፡ ከምቲ ዂሉ ጊዜ ዚዕጠቖ ቕናትን ይኹኖ።

20እዚ ኻብ እግዚኣብሄር ናይ ተጻረርተይን ናይቶም ኣብ ነፍሰይ ክፉእ ዚዛረቡን ፍዳ ይኹን።

21ዎ እግዚኣብሄር ኣምላኽ፡ ስለ ስምካ ኢልካ ርድኣኒ፡ ጸጋኻ ሰናይ እዩ እሞ፡ ኣናግፈኒ።

22ኣነ መስኪንን ድኻን እየ እሞ፡ ልበይ ኣብ ውሽጠይ ቈሲሉ ኣሎ።

23ከም ዚነውሕ ጽላሎት እኸይድ፡ ከም ኣንበጣውን እሰጐጒ ኣሎኹ።

24ኣብራኸይ ብጾም ራዕራዕ በለ፡ ስጋይ ከኣ ካብ ስብሒ ዐበረ።

25መላገጺኦም ከኣ ዀንኩ፡ እተን ረኣዩኒ ርእሶም ይንቕንቑ።

26ዎ እግዚኣብሄር ኣምላኸይ፡ ርድኣኒ፡ እዚ ኢድካ ምዃኑ፡ ንስኻ ኸም ዝገበርካዮ ኺፈልጡስ፡ ዎ እግዚኣብሄር፡ ብመጠን ጸጋኻ ኣናግፈኒ።

28ንሳቶም ይረግሙ፡ ንስኻ ግና መርቕ፡ እንተ ተንስኡ፡ ኪሐፍሩ እዮም። ባርያኻ ግና ኪሕጐስ እዩ።

29ተጻረርተይ ውርደት ይከደኑ፡ ንነውሮም ከኣ ከም ነጸላ ይወንዘፍዎ።

30ካብቶም ንነፍሱ ዚዂንንዋ ኼድሕኖስ፡ ኣብ የማን እቲ ድኻ ቈይሙ ኣሎ እሞ፡ ንእግዚኣብሄር ብኣፈይ ኣዝየ ኸመስግኖ፡ ኣብ ማእከል ብዙሓትውን ክውድሶ እየ።

← Chapter 108 Jump to: Chapter 110 →