bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Aymara
/
Aymara 1997
/
Zechariah 1
Zechariah 1
Aymara 1997
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 2 →
1
Kimsaqallqür phaxsina, kunapachatix Darío reyix Persia marka pä mara apnaqkäna ukkhaw Tatitux aka arunak Zacarías profetar parläna, Zacariasax Berequías chachan yuqapänwa, Idó chachan allchhiparaki. Juparusti Tatitux akham säna:
2
“Naya, Tatitux jumanakan nayra awkinakamatakix wali q'apisitäyätwa.
3
Ukhamasti, jichhax markankirinakar sam: Taqi ch'aman Tatitux siwa: ‘Nayaru makhatxapxita, nayasti jumanakarux uywthapisxapxämawa. Naya, Tatituw arsta.
4
Jan jumanakax nayra awkinakamjam lurapxamti, jupanakarusti nayra profetanakax parlapxirïnwa, jan wali sarnaqäwinakapa, jan wali luräwinakap jaytxapxañapataki, ukampis jupanakax janiw ist'añsa, jaysañsa munapkänti. Naya, Tatituw arsta.
5
Jichhasti, nayan arunakax parliri nayra profetanakax jiwaratäxapxiwa, jumanakan nayra awkinakamas jiwaratäxarakiwa.
6
Jupanakarusti nayax juchanakapat mutuyta, kunjämtix profetanakaxax jupanakar yatiykatayna ukhamarjama. Jupanakasti wasitat amuyt'asisin nayar jaysxapxitu, naya taqi ch'amani Tatitun jupanakan sarnaqäwiparjama, luräwiparjama uñjañaxax wakisitap uñt'asa.’ ”
7
Tatitux wasitat naya Zacarías profetar mä samkan aka arunak parlxayitu, Sebat sat phaxsin pä tunka pusini uru saraqataru, kunapachatix Darío reyix pä mara marka apnaqaskäna uka pachpa maranaraki.
8
Uka arumasti akham unañchäwi uñjta: Mä jaqir wila caballor lat'xatata uñjta. Uka jaqisti mä qhirwan mirtos sat ch'uxña alinak taypin sayt'atäskänwa, qhipäxapansti yaqha jaqinakarakiw utjäna, ukanakasti wila, ch'umphi, janq'u caballonakar lat'xatatarakïnwa.
9
Uka samkaxansti mä angelaw nayamp parlaskäna, ukat jupar jiskt'asta: “Tata, ¿khitinakas uka jaqinakaxa?” sasa. Angelasti situwa: “Nayaw khitinakäkitix uk uñacht'ayäma” sasa.
10
Ukampis janïra jupax nayar siskipan ukkhaw ch'uxña alinak taypinkkän uka caballor lat'xatat jaqix säna: “Tatituw aka jaqinakarux khithani, taqi uraqpach muytanipxañapataki” sasa.
11
Tatitun angelapasti, mirtos sat ch'uxña alinak taypin sayt'atäskänwa. Ukkhaw caballxat sarir jaqinakax jupar yatiyapxarakïna: “Taqi uraqpach muytanipxta, ukansti taqi kunas ch'üjtataki, suman jakasiñarak jikxatapxta” sasa.
12
Tatitun angelapasti sänwa: “Taqi ch'amani Tatay, paqallq tunka maraw Jerusalenampitaki, Judá markanakampitakix q'apisitäxtaxa, ¿kunapachas jupanakat khuyapt'ayasxäta?” sasa.
13
Tatitusti nayamp parlkäna uka angelarux munasiña, khuyapayasiñ arunakampiw parlxayäna,
14
ukatsti angelax yatiyañaxatakiw nayar sarakitu: “Taqi ch'aman Tatitux akham siwa: ‘Nayax Jerusalén markampiru Sión qullumpirux walpun munasta.
15
Ukat q'apisiñaxax ninjam aqti, uka jan yäqasir markanakataki, kunapachatix q'apisiñaxax juk'akïkän ukkhaxa, jupanakax ñanqha lurañanak juk'amp lurapxäna.
16
Ukat naya, Tatitux sista: Jichhax Jerusalén markarux khuyapayasiñampiw uñjä; markaxsa, utaxsa wasitat lurayxä. ¡Jupar wali munasitax uñacht'ayarakï!’ ” sasa.
17
Angelax ukxarux saskakituwa: “Aka arunak yatiyarakim: ‘Taqi ch'aman Tatitux siwa: Markanakaxan wasitat nayraqatar sartañap munta; ukatsti machaqat Sión qullurux ch'am churä, machaqatarak qhanañchä Jerusalén markax nayan ajllit markaxätapa’ ” sasa.
18
Yaqha unañchäwimp uñjarakta, ukansti pusi waxranak uñstanir uñjta.
19
Nayampi parlkäna uka angelaruw jiskt'arakta: “¿Kamsañarak muni uka waxranakasti?” sasa. Jupasti situwa: “Uka waxranakax jach'a ch'aman apnaqäwinakaruw uñtasi, kawkïrinaktix ch'amapampi Judá markankirinakaru, Israel markankirinakaru, Jerusalén markankirinakar taqi chiqar ananukupki ukanakawa” sasa.
20
Ukxarusti Tatitux pusi herreronakaruw uñjayarakitu.
21
Nayasti jupar jiskt'twa: “¿Kunarus aka herreronakax jutapxi?” sasa. Jupasti sarakituwa: “Kunjämatix uka pusi waxranakax ch'amapampi Judá markankirinakar taqi chiqaru ananukupkäna, kutkatasiñatakis jan ch'amani tukuyasa ukaru uñtasixa, aka herreronakasti uka jach'a munañan markanakar sustjas khathatiyiriw jutapxi, uka markanakan munañanïñ waxranakap p'akthapiri, khitinakatix Judá markar waxrantasa markachirinakapar taqi chiqaru ananukupkän ukanakaru axsarayiri” sasa.
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 2 →
All chapters:
1
2
3
4
5
6
7
8
9
10
11
12
13
14
Recommended Reading
Commentary
Zechariah Commentaries
→
Devotional
Zechariah Devotional Guide
→
Get This Bible
Aymara Study Bible
→