Zechariah 4

Aymara 1997

← Chapter 3 Jump to: Chapter 5 →

1Ukatsti nayamp parlkäna uka angelax wasitampiw kutt'anïna, ukat p'arxtayitu, kamisatix maynix ikiskir jaqir sartayki ukhama. Ukat jiskt'arakitu:

2“¿Kuns uñjta?” sasa. Nayasti juparux saraktwa: “Qurit lurat mä candelero uñjta, uka patxansti aceite uchañampi apxatata. Alay chiqansti paqallqu lamparanakaw utjaraki, ukanakarusti aceitex paqallqu tubonak chiqaw puri.

3Candelero jak'ansti pä olivo quqaw utji, mayax kupïxana, mayasti ch'iqäxana” sasa.

4Nayamp parlkäna uka angelar jiskt'araktwa: “Tata, ¿kunarak akasti?” sasa.

5Angelasti sarakituwa: “¿Janit ukan kunätap yatktasti?” sasa. Nayasti saraktwa: “Janiw yatkti, Tata” sasa.

6Jupasti saskakïnwa: “Tatitux Zorobabel chacharuw yatiyäwi apayaski akham sasa: ‘Zorobabel, janiw jach'a chamanïñamax wakiskiti, janirakiw jach'a ejercitonïñamas munaskiti; jan ukasti ajayuxampikiw atipt'asma, siw taqi ch'aman Tatituxa.

7¿Khitïtas jumax jach'a qullu? ¡Zorobabelan nayraqatapan pampar tukutaw uñjasïta! Jupaw qallta qalxa uchantani, nayan utax wasitat lurañataki, markaxax kusisiñat arnaqasini: ‘¡Kunja sumas akaxa! ¡Kunja sumasa!’ ” sasa.

8Ukxarusti Tatitux yaqha yatiyäwi churarakitu:

9“Zorobabel chachaw Tatitun utapan qallta qalap uchantawayi, jupa kipkarakiw tukuyani” sasa. Ukat jumanakax uñt'apxäta, taqi ch'amani Tatitun nayar khithanitapa.

10“Tatitun utap lurañ qalltaskäna uk jan yäqirinakaxa, jichhax Zorobabel chachar uka luräwinak tukuyaskir uñjasax kusisipxaniwa” sasa. Uka qhipatsti angelax aka arunakampiw yapt'arakïna: “Aka paqallqu lamparanakax Tatitun nayranakapawa, ukasti taqi akapacharuw uñch'ukiskaraki” sasa.

11Nayasti jiskt'araktwa: “Candeleron thiyapan uchatäki uka pä olivonakasti ¿kunarakisti?”

12Ukxarux jiskt'araktwa: “¿Uka pä olivo layminakasti, quri tubonak chikt'atäki, uka chiqanjam aceites lamparanakar purki ukanakax, kamsañsa muni?” sasa.

13Angelasti situwa: “¿Janit ukanakan kunätapsa yatktasti?” sasa. Nayasti saraktwa: “Janiw yatkti, Tata” sasa.

14Jupasti sarakituwa: “Uka pä olivox Zorobabelampi, Josué chachampiwa. Taqi aka uraqini Tatituw jupar luqtiritak jupanakar ajllisi” sasa.

← Chapter 3 Jump to: Chapter 5 →