Zechariah 11

Aymara 1997

← Chapter 10 Jump to: Chapter 12 →

1¡Líbano qullunaka, punkunakam jist'arasim, cedro quqanakamxa nina nakhantpan!

2¡Pino quqa, jachamaya, cedro quqan liwisitapata, khä suma quqanakan q'ala tukjatätapata! ¡Jumanaka, Basán uraqinkir roble quqanaka, jachapxam uka jach'a ch'uminakan tukjatätapata!

3Awatirinakax jach'at wararipxi ukkha suma ch'uxña chhuxllanakan q'ala tukjatätapata. Leonanakan wararitapas ist'asiwa, Jordán jawir thiyan suma ch'uxña pampanakan tukjat uñjasitapata.

4Aksti Tatitu Diosaxaw sarakitu: “Khariñatak yaqhachatäki uka ovejanak uñjam.

5Alasirinakax jan khuyapt'ayasisaw kharirapxi, aljirinakasti sapxiwa: ‘¡Tatitux yuspagaratäpan, nayax qamirïxtwa!’ sasa. Pachpa awatirinakapas janikiw ovejanakapat khuyapt'ayasipkiti.

6Nayax ukhamarak lurä: ¡Aka markankir jaqinakat janiw khuyapayaskäti! Jan ukasti, aka jak'an utjir markanakan amparaparuw katxaruyä, reyipan apnaqatarakïniwa. Markapas q'ala tukjatäskani ukkhasa, janiw jupanakar yanapt'ir sarkäti. Naya, taqi ch'aman Tatituw uk arsta.”

7Nayasti khariñatak yaqhachatäki uka ovejanak uñjañaruw uchasta, sinti t'ukha ovejanakaruw jilpach uñjarakta. Ukatsti pä thujrunak aytasta: mayarux “Walikïskaña” sasaw sutichta, mayarusti “Mayakïña” sasaw suticharakta.

8Mä phaxsinak kimsa awatirinakar alisnukta, jupanakatak munasiñaxan pist'atapata, ukhamarak nayar uñisipxatapata.

9Ovejanakarusti saraktwa: “¡Janiw mayampsa jumanakan awatirimäkxiristti! ¡Yaqhipatix jiwanixa, jiwaskpan! ¡Yaqhiparutix jiwayapxanixa, jiwayasipkakpan! ¡Jilt'irinakasti jupanak pura manq'antasisipkpan!” sasa.

10Ukatsti “Walikïskaña” satäkis uka thujru katusasti p'akjaraktwa, Diosax taqi markanakampi mä arust'äwi lurkatayna ukax ukkhar tukusxatap uñacht'ayañataki.

11Ukürpachaw uka arust'äwix t'unjat uñjasïna, uñch'ukisipkitäna uka oveja alakipanakasti, kuntix nayax lurkäyäta uka tuqi Tatitun parlaskatap amuyapxäna.

12Ukatsti jupanakarux saraktwa: “Walïchi ukax oveja awatitaxat qullqimp phuqxapxita; jan munapksta ukax, ukhamäskpan” sasa. Ukatsti jupanakax kimsa tunka qullqimpiw phuqhapxitu.

13Tatitusti situwa: “¡Uka qullqinak katum, ukatsti Tatitun utapan qullqi uchañaru uchanim, ukkha sum nayar chaniñchapxitu!” sasa. Nayasti uka kimsa tunka qullqi katusaxa, Tatitun utapan qullqi uchañaruw uchanta.

14Ukatsti “Mayakïña” satäki uka payïri thujru p'akjarakta, ukhamaw Judá markampi Israel markampi mä jilakïñax t'unjat uñjasiraki.

15Tatitux sarakituwa: “Jichhasti jan amuyt'asir awatirir tukum.

16Nayasti aka markatakix mä awatir uchä, uka awatiristi jalanukuta ovejanakat jan yäqasirïniwa, chhaqhat ovejanak jan thaqhiri, chhuxriñchjatanak jan qullt'iri, t'ukhanakar jan manq'ayiri, jan ukasti suma lik'i ovejanakan aychapak chhuchhullinakamppach jan jilt'ayas manq'antani.

17¡Ay, kunakïkani oveja tama ananukuri jan wali awatiritxa! ¡Walïspaw mä espadampi amparap khuchhuqañaxa, mä cuchillompi kupi nayrap k'ilsuñaxa! ¡Amparapax taqpach pharspan, nayrapasti q'ala juykhuptarakpan!”

← Chapter 10 Jump to: Chapter 12 →