Zechariah 3

Aymara 1997

← Chapter 2 Jump to: Chapter 4 →

1Ukxarusti Tatitux mä unañchäwin Josué jilïr sacerdoteruw uñacht'ayitu, jupasti Tatitun angelap nayraqatan sayt'atäskänwa. Josué sacerdoten kupïxapansti supayaw sayt'atäskäna jupar juchañchañataki.

2Ukatsti Tatitun angelapax supayarux sänwa: “¡Tatitu jumar juchañchpan! ¡Jerusalén markar muniri Tatitux jumar juchañchpan! Aka jaqisti nina sank'at apsut mä aqkir k'illimäkaspas ukhamawa” sasa.

3Josué chachasti, wali q'añu isini isintataw Tatitun angelap nayraqatan sayaskakïna.

4Ukat angelax yanapirinakapar mayïna, Josué chachar q'añu isinakap apsupxañapataki. Josué chacharusti sarakïnwa: “Uñjam, ukax juchanakam pampachxsma sañ muni. ¡Jichhasti q'uma isinakampiw isthapiyxäma!” sasa.

5Ukspachaw yanapirinakaparux Josué chachan p'iqipar q'uma isimpi ch'uqt'añapatak mayirakïna. Jupanakasti ch'uqxatapxiwa, ukatsti q'uma isinakampiw isthapiyapxaraki. Ukchañkamasti, angelax sayaskakïnwa.

6Ukatsti Tatitun angelapax Josué chacharux sarakïnwa:

7“Taqi ch'aman Tatitux akham siwa: ‘Thakhinakaxanjam sarnaqam, jumar churat luräwinak taq phuqharakim. Ukhamtix lurätaxa, nayan utax apnaqäta. Utaxsti, uta anqanakamppach uñjarakïta, nayasti, nayar luqtir angelanak taypin mä luräwi churäma.

8Josué, sum ist'ita, jumax jilïr sacerdotëtawa, sacerdote masinakamasti ist'apxarakpan, jumanakax Tatitun arunakap mayninakar yatiyir chimpüpxtawa: Nayax luqtirixaruw khithanï, jupax ‘Machaq Külli’ satawa.

9Nayasti Josué chachan nayraqataparux paqallqu k'achinakan mä qala uchta, naya pachparakiw uka qalarux mä aru qillqä. Ukatsti, mä urunak aka markan juchanakap apaqarakï.

10Uka urux purinkani ukapachasti, jumanakax maynit maynikamaw jawsayasipxäta, uva alinakana, higo quqanakan ch'iwipan suman qamart'añataki. Naya, taqi ch'aman Tatituw arsta.’ ”

← Chapter 2 Jump to: Chapter 4 →