Zechariah 14

Aymara 1997

← Chapter 13 Jump to:

1Jerusalén marka, Tatitun urupax jutaskiwa, kunapachatix juma taypina, yänakam aparasax lakirpayatäkani uka uru.

2Uka uruw Tatitux taqi markanakar tantachthapini, Jerusalenampi nuwasipxañapataki. Markaru katuntasasti, utanakapat yänakap lunthatsupxani, warminakaparus warmisipxaniwa, chikatpach jaqinakaparux katuntat apapxarakini. Jilt'irinakakiw ukan qhiparani.

3Ukatsti Tatituw uka markanakamp nuwasir misturakini, kunjämatix nuwasïwi urun nuwaski ukhama.

4Uka urusti Tatitux Olivos qullu patxaruw utjnuqasini, Jerusalén marka uñkatasina, inti jalsu tuqina. Olivos qullurux payaruw jaljtayani, mä chikat qullux amsta tuqiruw jitt'ani, mä chikatasti aynach tuqiruw jitt'arakini, uka taypix mä jach'a qhirwaruw tukuni inti jalsuta inti jalantkama,

5jumanakasti uka pä qullu taypin utjkani uka qhirwanjam jaltxapxäta, uka qhirwasti maysäxankir Asal uraqkamaw purini. Jumanakax jaltxapxätawa kunjämatix Ozías reyin Judá marka apnaqäwipan nayra awkinakamax, uraqi khathati sartipan jaltxapxänxa ukhama. Tatitu Diosaxasti taqpach aski jaqinakapampiw jutani.

6Uka urux janiw thayasa juyphisa utjkaniti.

7Uka mä sapa urutsti Tatitu sapakiw yati. Uka urunsti janiw amuyaskaniti urütapasa arumätapasa, arumäkanisa qhanakïskaniwa.

8Ukkhasti Jerusalén uraqitxa suma q'uma umaw jalsuni, uka umax juyphi pachasa junt'u pachasa jalaskakiniwa, mä chikat umax Mar Muerto sat qutakamaw jalani, mä chikatasti Mediterráneo sat jach'a qutakamaw jalarakini.

9Uka uruw Tatitux taqi akapach apnaqani. Jupa sapakiw Tatitünixa, sutipasti mä sapakirakïniwa.

10Taqpach markax pamparuw tukuni, Jerusalén markat aynach tuqinkir Gueba chiqat qalltasa, Rimón chiqakama. Jerusalén markasti alay qullupankaniwa, ukanarak suman jakasipxani. Benjaminan Punkupata, Ángulo sat Punkukama, ukhamaraki Hananelan pukarapata reyin aceitep ch'irwañäki ukkhakama.

11Jïsa, Jerusalén markanxa walja jaqinakaw utjantani, janiw mayampis t'unjatäkxaniti. Jaqinakapax jan kunan kamachkañaw jakasipxarakini.

12Ukampis Jerusalenampi nuwasiri markanakarux, Tatitux walpun mutuyani: jaqinakapan janchipas jakkirpacharuw ñusantani, nayranakapasa, laxranakapas pachparuw wañsurakini.

13Uka urun Tatitux jupanakar axsarañ phuqhantani. Sapa mayniw jak'apankiriru amparat katuntani, ukatsti jupanakkamaw nuwantasipxani.

14Judá markankirinakasti Jerusalenaruw jutapxani, uka markanakamp nuwasiri, jupanakarusti waljpun yänakapsa, qullqipsa, quripsa, isinakapsa aparapxani.

15Kuna mutuyäwitix jaqinakxar purkani, uka mutuyäwirakiw uñisirinakan utjäwipan utjir caballonakxaru, mulanakxaru, camellonakxaru, asnonakxaru, taqi uywanakxarus purirakini.

16Uka qhipatsti, Jerusalenampi nuwasipkän uka markanakat jilt'iri jaqinakaxa, sapa maraw Reyiru, taqi ch'amani Tatitur yupaychir sarapxani, ukhamaraki Chhujllanak lurañ phunchhäwi uruyañataki.

17Ukampisa, aka uraqinkir kawkïr markanakatix Jerusalén markar taqi ch'aman Tatit Reyiru yupaychiri jan sarkani ukaxa, ukanakan uraqinakapxarux janiw jallux purxatkaniti.

18Egiptonkir jaqinakatix jan sarapkani ukaxa, Tatitux jupanakar mutuyaniwa, uka kipkaraki kawkïr markatix Chhujllanak lurañ phunchhäwi uruyir jan sarkani ukanakarusa.

19Ukäniw Egipto markataki, taqi markanakataki, Chhujllanak lurañ phunchhäwi uruyiri jan saririnakan mutuyäwipaxa.

20Uka uruxa, caballonakan chhullu chhullunakapasa “Tatitur Luqtata” sas qillqatkamakïniwa. Tatitun utapan utjir phukhunakasa, altar nayraqatankir jach'a qirunakasa, qullanäniwa.

21Jerusalén markampina, Judá markampin utjir taqpach phukhunakasa taqi ch'amani Tatitur luqtatäniwa. Khitinakatix Tatitun utapar wilañcha luqtasir sarapkani ukanakasti, uka phukhunakaruw luqtat uywanakan aychap qhatiyapxani. Uka urux taqi ch'amani Tatitun utapan janiw alakip lurir jaqinakax utjkxaniti.

← Chapter 13 Jump to: