2 Kings 19

Edo ((E Baibol Ẹdo) Version 1996)

← Chapter 18 Jump to: Chapter 20 →

1E Hẹzekaia ne ọba ghi wa họn iyẹn ne iran naẹn, ọ keghi ye akhiẹ sọ ukpọn irẹn uan, ọ keghi yọ ukpọn akhiẹ, ọ na gha rrie Ọgua Osa e Nọyaẹnmwa.

2Ọ keghi gie Eliaikim ne ọkaẹguae, e Siebna ne ọgbenbe iko kevbe ohẹn ne ọdiọn bu Aizaia ne ovbi Amọz. Iran keghi yọ ukpọn akhiẹ.

3Uhunmwu ne ọ gie iran re gie Aizaia ọ re ọ na khin wẹẹ, “Ẹdẹ nẹrẹ na, ẹdẹ irrioya nọ, te a rri ima oya na, a vbe fa ima an. Ma ye vbe okhuo ne emwi ubiẹmwẹ ru ne ọ ma sẹtin biẹ.

4Ọgbaisi ọghe Asiria gie avbe irriegie ẹre ne iran do kpa unu ghe Nọyaẹnmwa ne ọ rrọọ. Te Nọyaẹnmwa ne Osanobua ruẹ gha họn ẹmwẹ na ne ọ rri iran ni ta ẹe oya. Rhunmwuda ọnii, na erhunmwu ne emwa ima ne iran miẹn uhunmwu.”

5Aizaia ghi họn uhunmwu ne Hẹzekaia gie.

6Ọ keghi rhie ewanniẹn werriegbe gie ẹe wẹẹ, “E Nọyaẹnmwa tama ruẹn wẹ ghẹ gie ivbi Asiria ya ohan mu uẹn vbene iran gha na gha kha wẹ rẹn i ra sẹtin miẹn ruẹn fan.

7E Nọyaẹnmwa gha ru ẹe ne Ọgbaisi họn ẹmwẹ ne a ta khian ne ọ gha ya ẹe werriegbe gha rrie ẹvbo ẹre, e Nọyaẹnmwa ghi ru ẹe ne iran gbe ẹe rua vbe odọ nii.”

8Avbe ọkaokuo Asiria keghi họn wẹ ọba kpao vbe Lakis rre nẹ, kevbe wẹ ọ gha gu Libna ne ẹvbo ne ọ diake evba khọn, ọ re irẹn na bu ẹre gha rrie odọ ne ọ ya nọ vbene iran gha ru hẹ.

9Ivbi Asiria keghi họn wẹ e Tihaka ne ọba e Sudan viọ ivbi Igipt dee do gu iran gbinna. Ugbẹn vbe Ọgbaisi ghi họn ẹmwẹ na, ọ keghi gbẹn ebe gie Hẹzekaia ne ọba e Juda.

10Ne ọ ya tama rẹn wẹẹ, “Osanobua ne u mu ẹtin yan tama ruẹn nẹ wẹ obọ mwẹ i ra gba ruẹ, ghẹ gie ẹmwẹ na rẹrẹ uẹ o o.

11U họn ẹn vbene Ọgbaisi ọghe Asiria ru ẹvbo ne ọ rhirhi wẹ rẹn ra fuan hẹ. Te uwẹ wẹ u gha sẹtin lẹ ọre fe ra?

12Avbe erha mwẹ odede ọ re ọ dunmwu avbe ẹvbo ne a tie ẹre Gozan, Haran kevbe Rezẹf sẹ otọ, ọ kevbe gbele emwa ni rre Bẹtẹdẹn, ni rre Telasa, ẹbọ iran ne ọ sẹtin miẹn iran fan i rrọọ.

13Avbe ọba ẹvbo ne a tie ẹre Hamat, Apad, Sefavim, Hena kevbe Iva vbo?”

14E Hẹzekaia keghi miẹn emwa ne a gie ẹre uhunmwu ebe nii, ọ na tie ẹre. Ọ na gha rrie Ọgua Osa, ọ na rhie ebe nii ye evba vbe odaro e Nọyaẹnmwa.

15Ọ keghi na erhunmwu wẹẹ, “E Nọyaẹnmwa ne Osanobua Izrẹl, ne ọ tota ye ẹkete ẹre vbe odukhunmwu emwi ni zẹ ifuẹn nii, wẹ ọkpa kẹkan ọrọre Osanobua, wẹ ọ re ọ vbe khaemwisẹ yan arriọba otọ agbọn hia. Wẹ ọ re ọ yi otọ kevbe iso.

16Wanwanna nian, e Nọyaẹnmwa ghe emwi ne ọ sunu vbe egbe ima. Gha họn ẹmwẹ ne Senakẹrib ta ya kpa unu ghe uwẹ ne Osanobua ne Udazi.

17E Nọyaẹnmwa, ma hia rẹnrẹn wẹ ẹvbo ni bun ọ re Ọgbaisi Asiria he dunmwu an, ọ kevbe ye ẹvbo iran dihoi rua,

18ọ na giẹn ẹbọ iran an, ẹbọ ne ẹ i re ẹbọ hiehie gberra avbe amazẹ erhan kevbe okuta ne emwa ne agbọn ye obọ ru.

19Banbanna nian, e Nọyaẹnmwa ne Osanobua mwa, miẹn ima fan hin obọ ivbi Asiria rre. Ne uhunmwu otọ agbọn hia miẹn ehe na rẹn ighẹ wẹ okpa, e Nọyaẹnmwa ọ re ọ gele re Osanobua.”

20Ẹre Aizaia na gie ne a khama ọba wẹẹ, “Vbe erhunmwu ne u naẹn, vbene Nọyaẹnmwa tae ọ re ọna khin.

21Adesẹ ore Jerusalẹm gha giẹ ọ, e Senakẹrib, ọ vbe ya uwẹ gbe ogie.

22De ọmwa ne uwẹ ro ighẹ u kpa unu ghe usin ne u na vbe ya ẹe gbe ogie yi? U ma ya ọghọ mẹ, mẹ ne Osanobua ne ọ huanrẹn ọghe Izrẹl.

23U gie emwa uhunmwu ne iran do rhuọ ma mwẹ wẹẹ, ‘Ikẹkẹ okuo ruẹ ọ re u ya khọn ehe ne ọ yo sẹ vbe uhunmwu oke Lebanọn muotọ. U vbe rhuọ wẹ te u tọnnọ erhan isida ni ghi tan sẹ kevbe uvbiakhẹ ni maa sẹ gbe otọ, kevbe wẹ te u niẹn obọ sẹ ehe ne ọ ghi dinmwi sẹ vbe uwu ẹgbo hia.

24U rhuọ wẹ u fian uhae vbe ẹvbo ẹrrẹe, u na wọn amẹ ọnrẹn kevbe wẹ, te ivbi iyokuo ruẹ ye owẹ rrilo Nail ka.

25Wẹ ma he ka họn ighẹ ọ kpẹre ne I ghi mwamwa avbe emwi na ye otọ gha dee, ighẹ te I ghi do mu ẹẹn sẹ na? I rhie ẹtin ne uẹn ne u ya ye avbe ẹvbo ne a gbe odin gaa khian otiku emwi ni rẹnkhẹn uan.

26Emwa ni rre evba ma miẹn emwi ru, ohan mu iran, iran keghi zeze. Iran ye vbe irunmwu ne ọ zọ vbe ọgbẹlẹzẹ ra irunmwu ne ọ zọ ye okuta ne ẹhoho ọlarre owẹn ne ọ tọn bọnmwẹ uan.’

27“Sokpan te I rẹn ruẹn ọrẹnfo, emwi ne u ru kevbe ehe ne u yo. I rẹn vbene u yan ma mwẹ hẹ.

28A tama mwẹ nẹ ighẹ vbe ne u rhuọ kevbe vbene u yanma hẹẹ, banbanna nian, te I ra ha ẹghọ ye uẹ ihue ne I vbe gbe ukhu ye uẹ akọn ne I vbe rhie ruẹ la odẹ ne u la rre werriegbe gha rrie.”

29Ẹre Aizaia na tama e Hẹzekaia ne ọba wẹẹ, “Ama emwi ne ọ ra sunu ọ re ọ na khin. Ukpo na kevbe ukpo ne ọ dee, ọka ne ọ de zọ ọ re uwa ra re sokpan, ukpo ne ọ ghi lele ẹe, wa gha sẹtin kọ ọka obọ rua, wa ghi vbe rhọ ẹre. Wa gha kọ azara kevbe alimo ayọn.

30Iran ni miẹn uhunmwu vbe Juda gha wa gha maa zẹ vbe erhan ne ọ kakabọ rhie inian la uwu otọ, ọ na vbe mọ.

31A gha miẹn emwa ni gha miẹn uhunmwu vbe Jerusalẹm kevbe oke Zaiọn rhunmwuda e Nọyaẹnmwa ta ẹe nẹ ighẹ rẹn gha ru ẹe.

32Emwi ne Nọyaẹnmwa ta ẹe vbe ekpa Ọgbaisi ọ ghe Asiria ọ re ọ na khin wẹẹ, ‘Ẹ i ra la ore ẹvbo na, a ma wẹ ne ọ fi ifẹnmwẹ ọkpa kẹkan fiọ, ovbiyokuo ne ọ mu asa mwẹ ne ọ gha sikẹ ore ẹvbo nii, ẹ i rrọọ, ra ne a ma ekẹn ne a ya khọn ẹvbo lẹga ẹre.

33Ehe ne ọ la rre ọre ọ vbe la rrie. Vbe ne ẹ i na fi owẹ la ore ẹvbo. Mẹ ne Nọyaẹnmwa guan nẹ.

34I gha gbinna ne ẹvbo na, I ghi vbe tan obọ guẹ ẹre rhunmwuda ekpẹn ne egbe mwẹ kevbe eyan ne I yan ma e Devid ne ọguọmwadia mwẹ.’ ”

35Ọ ghi sẹ akọn nii, odibo e Nọyaẹnmwa keghi la agọ ivbi e Siria, ọ na gbele ivbi iyokuo arriaisẹn isẹn yan iyihinrin (185,000). Ẹdẹ ghi gbe vbe ẹdẹ ne ọ lele ẹe, ehia keghi khian orinmwi.

36Ẹre Senakẹrib ne Ọgbaisi ọghe Asiria na kun kpao, ọ na werriegbe gha rrie Ninevi.

37Ọ ghi sẹ ẹdẹ ọkpa, ọ na gha gho e Nisrọk ne ẹbọ ẹre. Eva vbe uwu ivbi ẹre, a tie ọkpa vbọ Adramẹlẹk, a vbe tie nọkpa Siarezẹ, keghi ye umozo gbe ẹe rua iran na lẹ gha rrie otọ Ararat. Ọkpa vbe uwu ivbi ẹre ne a tie ẹre Esahadọn keghi la ukpo Ọgbaisi lele ẹe.

← Chapter 18 Jump to: Chapter 20 →