2 Kings 25

Edo ((E Baibol Ẹdo) Version 1996)

← Chapter 24 Jump to:

1E Zedekaia keghi sọtẹ e Nebukiadneza ne ọba e Babilọn, ẹre Nebukiadneza ne ọba e Babilọn, na viọ ivbiyokuo ẹre hia gha de, ọ mu okuo la e Jerusalẹm vbe ikpẹdẹ ne ogigbe ọghe uki ne ogigbe vbe ọ rre ukpo ne ogihinrin ne Zedekaia rriọba. Iran keghi bu agọ ye vbe a ma he sẹ ore ẹvbo nii fo, iran gbe odin lẹga ẹre.

2Iran kegha gbinna vbe evba ya sẹ ukpo ne ogiowọrọ ọghe Zedekaia.

3Ọ ghi sẹ ikpẹdẹ ne ogihinrin ọghe uki ne ogienẹ ọghe ukpo nii, vbe ohanmwẹ ghi tua sẹrriọ wẹ emwa nii i ghi miẹn evbare re.

4Iran keghi guọghọ ihe eso vbe ekẹn ne a gbe lẹga ẹvbo nii. A gha rhe miẹn wẹ te ivbi e Babilọn wa tan obọ khinkhian ẹvbo nii, avbe ivbi iyokuo ni rrọọ hia lẹkua vbe asọn. Iran keghi la odẹ ogba ọghe ọba ladian, iran keghi la onurho ne ọ rre ehe ne ekẹn eva na miẹn egbe, iran le le odẹ ne ọ rrie Iya e Jọdan.

5Sokpan, ivbi iyokuo e Babilọn keghi khu e Zedekaia iran na mu ẹẹn vbe otọe ne ọ rriẹe ne ọ rre ọkpẹn e Jẹriko, ivbi iyokuo ẹre hia keghi lẹ sẹ ọe rae.

6Iran keghi mu e Zedekaia bu e Nebukiadneza, vbe ehe ne ọ ye vbe Ribla, evba ọ re Nebukiadneza na bu ohiẹn ọnrẹn.

7Vbe Sirra e Zedekaia, a keghi gbele ivbi ẹre ne ikpia a, e Nebukiadneza na wẹ ne iran wọlọ e Zedekaia aro hẹ kua, a keghi ya ọgiọrọ rrọ ẹre mu gha rrie e Babilọn.

8Ọ ghi sẹ ikpẹdẹ ne ogihinrọn ọghe ukpo ne ọ ya gba vbe ọkpa irrọ vbugie ọghe Nebukiadneza e Babilọn, e Nebuzaradan ne ọ gu ọba zẹ iro ne ọ vbe re ne ọ kha yan ivbi iyokuo ẹre, keghi la ore Jerusalẹm.

9Ọ keghi giẹn Ọgua Osa a, kevbe ẹguae, kevbe owa emwa ni hin usi hia ni rre Jerusalẹm.

10Avbe ivbi iyokuo ẹre keghi guọghọ ekẹn ne a gbe ga ẹvbo ni sẹ otọ.

11Ẹre Nebukiadneza na viọ emwi nii ghi dekẹe vbe ẹvbo ni gha rrie Babilọn, emwa ni guẹ ona ni ghi dekẹe, deba iran ni lẹ bu ivbi e Babilọn gha khian.

12Sokpan ọ keghi sẹ eso vbe usun iran ni ru ivbiogue sẹ, iran ne ẹ i mwẹ emwi rhọkpa rae, ọ na ye iran gha winna vbe ogba azara kevbe ugbo.

13Ivbi e Babilọn keghi guọghọ ẹe sẹ otọ ighẹ avbe orre oze, kevbe avbe okhuae ni rre Ọgua Osa, deba ẹgbẹdin amẹ ọghe oze, iran na viọ nene oze gha rre Babilọn.

14Iran kevbe viọ avbe ovbẹvbẹ kevbe emwi ne a ya họ emuẹn ne a ya khiẹn iruẹn hin Ogiukpo rre, avbe emwi ne a ya dọlọ ukpa yi, uzokpo ne a da esagiẹn emwi ne a ya zọ ese yi, ọkpan ne a ya giẹn eturari, deba avbe emwi oze ọvbehe hia ne a ghi ya ru emwi vbe Ọgua Osa.

15Iran keghi viọ emwikemwi ne a ghi ya igoru ra esiliva ru, ya sẹ egbe ọkpan ne giẹrẹ, kevbe ivbi uyẹngbe ne a ya wan erhẹn vbe Ọgua Osa.

16Emwi ne a ya ru emwi ne Solomọn ye oze ru ye Ọgua Osa, avbe orre eva nii, ikẹkẹ okhuae ke ẹe kevbe ẹgbẹdin ne a i sẹtin mwa rhunmwuda ighẹ iran khua gbe.

17Orrẹ eva nii, ọkpa iran wa khin, ọkpọkpa vbọ kegha re ibata eha irrọvbọgban vbe uyomwẹ, a na vbe mu egbaha oze yan rẹn, onii kevbe ye ekherhe sẹẹ ibata enẹ vbe ukhiọnmwẹ vbe uyomwẹ. A kevbe ya oze do ọga lẹga ọkpọkpa vbe nene orrẹ ne a vbe ya ikpẹrọnmwọ ne a ya oze ru zẹ ose yi.

18Usun emwa ne Nebuzaradan vbe munọ ẹre oghunmwu ba ẹre kegha re Seraia ne Ogie Ohẹn, e Zẹfanaia ne ohẹn ne ọ zẹ diake ẹe, deba arhin eha kpataki ni rre ukpo vbe Ọgua Osa.

19Ọ kevbe viọ avbe emwa na hin ẹvbo rre, Ọka okuo ne ọ kha yan ivbi iyokuo nii, isẹn vbe uwu avbe iguọba zẹ iro ni ye gha rre ore ẹvbo nii, ne ọ zẹ diake ọkaokuo nọkhua ne ọ re ne ọ sin ẹmwẹ okuo ẹro, kevbe emwa kpataki iyeha ọvbehe.

20E Nebuzaradan keghi viọ iran gie ọba e Babilọn ne ọ gha rre ẹvbo ne a tie ẹre Ribla.

21Vbe otọe Hamat. Evba ọba na wẹ ne a viọ ivbi e Juda hin ẹvbo iran rre gha rrie iwe.

22E Nebukiadneza ne ọba e Babilọn keghi ya Gedalaia ne ovbi Ahikam kevbe eyẹ e Siafan ru enọ khaemwisẹ yan e Juda, ọ na viọ iran ne a ma viọ gha rrie e Babilọn hia ye ototọ ẹre.

23Ugbẹn vbe ivbi iyokuo e Juda ni ma viọ egbe iran yan iran obọ, kevbe avbe ọkaokuo ghi họn, iran keghi ya deba e Gedalaia vbe Mizpa iran na kegha re Ismaẹl ne ovbi e Nẹtanaia, Johanam ne ovbi e Karea, Seraia ne ovbi e Tanhumet ne ovbi ẹvbo ne a tie ẹre Nẹtofa, kevbe Jezenia ne ọ ke Maaka rre.

24E Gedalaia keghi tama iran wẹẹ, “I wa ye amuẹtinyan ta ẹe ma uwa wẹ ne uwa ghẹ fian afianma avbe ọkaokuo e Babilọn hiehiere. Wa hẹko gbe ẹkun sẹ otọ yin ẹvbo na, wa gha ga ọba e Babilọn, emwi hia gha wa gha ma uwa egbe.”

25Sokpan, ọ ghi sẹ uki ne ogihinrọn ọghe ukpo nii, Ismaẹl ne ovbi e Nẹtanaia kevbe eyẹ Elisiama ne ọ vbe re usun ivbi ọba, keghi viọ arhin igbe mwẹ obọ gha rrie Mizpa, iran keghi dekun e Gedalaia, iran na gbe ẹe rua. Ọ kevbe gbele ivbi Izrẹl kevbe ivbi e Babilọn ni gu ẹe gha rre evba.

26Ẹre ivbi Izrẹl kevbe ni fe kevbe ivbiogue, deba avbe ekaokuo, na kpao, iran na gha rrie Igipt, rhunmwuda afianma ivbi e Babilọn kegha fian iran.

27Ukpo ne Ivomẹrodak rri ọba e Babilọn, ọ keghi tohan Jehoiakin ne ọba ọghe e Juda, ọ na fan ẹn hin ẹwẹdọ rre. Ikpẹdẹ eha irrọvbọgban ọghe ukpo ne ogiweva ọghe ukpo ne ọ ya gba vbe ukpo eha irrọvbiyeva ne a mu e Jehoiakin oghunmwu.

28Iyomẹrodak keghi ye obọ esi mu ẹẹn. Ọ keghi rhie ukpo ne ọ yo sẹ ọghe avbe ọba nekpa ni vbe rre iwe vbe ehe ne ọ ye ne ẹẹn vbe Babilọn.

29A keghi vbe kue ne Jehoiakin fi ẹwu oghunmwu ẹnrẹn werriẹ, kevbe ne ọ vbe ya gha rri evbare vbe e tebul ọba vbe ẹdẹ agbọn rẹn ni ghi dekẹe.

30Vbe ikpẹdẹ ne ọ ghi ya vbe agbọn hia, ẹdẹgbegbe, ọre a ghi ya gha rhie igho ne ọ gha sẹ e lo vbe ẹdẹ nẹdẹrriọ ne ẹẹn.

← Chapter 24 Jump to: