2 Kings 20

Edo ((E Baibol Ẹdo) Version 1996)

← Chapter 19 Jump to: Chapter 21 →

1Ọ ghi sẹ ẹghẹ ne a kha na, e Hẹzekaia kegha khuọnmwi, ọ kẹ ekherhe ne ọ wu. Aizaia ne akhasẹ ne ovbi Amọz keghi ya miẹn ọẹn, ọ tama rẹn wẹẹ, “E Nọyaẹnmwa wẹ ne u dọlọ emwi hia yi rhunmwuda u i ra fe. Mu egbe ne u gha ya wu.”

2E Hẹzekaia keghi mu aro da ekẹn, ọ na erhunmwu wẹẹ,

3“E Nọyaẹnmwa, yerre, ekhọekekhọe mwẹ ọ re I ya ye ẹkoata gha gaa kevbe wẹ, ẹghẹ hia ọ re I ya gha hia ne I ru emwi ne u rhirhi a wẹ ne I ru.” Ọ keghi suẹn gha viẹ eve orriara.

4Aizaia keghi kpao sẹ ọba rae, sokpan, vbe ọ ghi te sẹ ikun ne adesẹ vbe ẹguae, e Nọyaẹnmwa keghi tama rẹn

5wẹ ne ọ werriegbe bu e Hẹzekaia gha khian ya khama rẹn wẹẹ, “Mẹ ne Nọyaẹnmwa, Osanobua ọghe Devid ne erha a odede họn erhunmwu ruẹn, I vbe miẹn ameve ruẹ. I gha mu uẹn egbe rran, u gha yo Ọgua Osa irakhuẹ.

6I gha rhie ukpo ekesugie ba ẹdẹ agbọn ruẹn. I gha miẹn uwẹ kevbe ẹvbo na fan vbe obọ ọha nọkhua ọghe Asiria rhunmwuda ekpẹn ne egbe mwẹ kevbe rhunmwuda eyan ne I yan ne Devid ne ọguọmwadia mwẹ.”

7Ẹre Aizaia na wẹ ne eguọmwadia ọba ne iran wiẹn ebe ohọ mama ye uruvba ne ọ mu ẹẹn, ne egbe do rran rẹn.

8E Hẹzekaia ne ọba keghi nọ wẹẹ, “De ama ne I gha ya rẹn wẹ e Nọyaẹnmwa gha gele mu mwẹ egbe rran kevbe wẹ I gha ye Ọgua Osa vbe ẹdẹ ne irakhuẹ?”

9Aizaia keghi wanniẹn wẹẹ, “E Nọyaẹnmwa gha rhie ama ne uẹn ne ọ ya rhie ma ruẹn wẹ rẹn gha mu eyan irẹn sẹ. De ne u ho vbọ, ne aghọnghọn ne ọ rre ikpawẹ na ya ibata igbe tan sayọ ra ne ọ ye ibata igbe kanmwa sayọ?”

10E Hẹzekaia keghi wanniẹn wẹẹ, “Ẹ i lọghọ ne aghọnghọn ye ibata igbe tan sayọ, wẹ ne ọ ye ibata igbe kanmwa sayọ.”

11Aizaia keghi na erhunmwu ghe Nọyaẹnmwa, rẹn keghi ruẹe ne aghọnghọn ni ye ibata igbe kanmwa sẹ ayọ vbe ikpawẹ Ehaz ne ọba.

12Vbe uwu ẹghẹ ne a kha na, e Merodak Baladan ne ovbi e Baladan keghi họn wẹ egbe ma rran e Hẹzekaia, ọ keghi gbẹn ebe, ọ na vbe ha oko gie ẹe.

13E Hẹzekaia keghi miẹn iran yi, ọ na vbe ma iran ẹfe irẹn hia, esiliva ẹre, igoru ẹre oziza kevbe ori ni winhin ne ọ mwẹ, kevbe emwi ne ivbi iyokuo ẹre ya gbinna. Emwi ọkpa i vbe rre aza ẹre ra otọe arriọba ẹre ne ọ ma ma iran ẹre.

14Ẹre Aizaia ne akhasẹ na bu e Hẹzekaia ne ọba gha khian, ọ nọ rẹn wẹẹ, “De ehe ne avbe emwa na ke rre, vbe iran tama ruẹn?” E Hẹzekaia keghi wanniẹn “Ehe ne ọ rrei ẹsẹse ọ re iran ke rre, e Babilọn ọ re iran kegha dee.”

15“De emwi ne iran miẹn vbe ẹguae?” Iran wa miẹn emwi hia, emwi ọkpa i vbe rre aza ne I ma rhie ma iran.

16Aizaia keghi tama ọba wẹẹ, “E Nọyaẹnmwa ne Osanobua khare wẹ,

17ẹghẹ dee ne a gha na miẹn ruẹn emwi hia ni rre ẹguae ruẹ, okhuan ne avbe erha a odede he khuan ye otọ do sẹ ẹdẹnẹrẹ na, iran gha viọ ehia gha rrie Babilọn. Emwi ọkpa ivbe ke ẹe.

18A gha munọ eso vbe uwu emọ iwu ruẹ kpao, a ghi ya ya iran khian ọghẹrriẹnoguan ne iran ya gha taemwi vbe ẹguae ọba e Babilọn.”

19Vbene Hẹzekaia rẹn otọ ẹmwẹ na yi keghi re wẹ ọfumwegbe kevbe ẹkun sẹ otọ gha rrọọ vbe ẹghẹ irẹn, ọ keghi wanniẹn wẹẹ, “Uhunmwu ne Nọyaẹnmwa gie do khama mwẹ wa maa.”

20Avbe emwi ọvbehe hia ne Hẹzekaia ru, iwinna udinmwẹ ọnrẹn, iyẹn vbene ọ bọ owa amẹ hẹ, kevbe ne ọ fian uroramẹ ne ọ miẹn ehe na si amẹ sẹ ore ẹvbo hẹ, a gbẹnnẹ ehia ye Ebe Okha Avbe Ọba Juda.

21E Hẹzekaia keghi wu, ovbi ẹre ighẹ Manasẹ keghi rriọba lele ẹe.

← Chapter 19 Jump to: Chapter 21 →