Luke 12 — Edo ((E Baibol Ẹdo) Version 1996)

1Ugbẹn vbe emwa ghi wa gbe ẹbu sẹrriọ ne iran gha ye igiawẹ rilo egbe ginna otọ, Jesu keghi ka zẹgiẹ tama avbe erhuanegbe ẹre wẹẹ, “Wa gha begbe vbe egbe ihueka avbe Farisi! Ẹkẹ vbe iwẹnwẹn iran ọre I kha.

2Emwi hia ne a gue ginna otọ, a gha we ẹre rua, emwi ẹkhokho hia gha dinna azagba.

3Rhunmwuda ọnii, ẹmwẹ ne uwa tae vbe asọn, a gha họn ẹn vbe ogiavan ogioghogho, ẹmwẹ ne uwa khui urho mu unu ye ehọ tama ọmwa, a gha mu ẹn go vbe ẹrhunrhun owa.

4“I tama uwa, wa ne ọse mwẹ, wa ghẹ mu ohan ọmwa ne ọ gha gbe ikinnegbe nẹ, ẹ i ghi miẹn emwi ọvbehe ru gberra ọnii.

5I gha ta ọmwa ne uwa gha a mu ohan rẹn ma uwa. Wa mu ohan Osanobua na a miẹn wẹ ọ gha gbe nẹ, ọ yevbe mwẹ ẹtin ne ọ ya mu orhiọn fi ẹrinmwi ne ehianmwẹ ivin. I tama uwa, wa mu ohan rẹn!

6“Ẹ i re ogbodu isẹn ọre a khiẹn ọre ikọbọ eva? Sẹ vberriọ, Osanobua ma mianmian ọkpa kẹkan vbe uwu iran.

7Ya sẹ egbe eto ne uhunmwu uwa, te a ka ehia gba tototo. Rhunmwuda ọnii wa ghẹ fian afianma, ive ne ọ re uwa uhunmwu sẹ ọghe ogbodu ni bun!

8“Ne I tama uwa, ọmwaikọmwa ne ọ ladian azagba tae ighe ọghomwẹ rẹn ikhin. Ovbi Ọmwa gha vbe ru vberriọ ne irẹn vbe odaro avbe odibo Osanobua.

9Sokpan ọmwaikọmwa ne ọ vbe kha vbe azagba ighe irẹn i re ọghomwẹ, Ovbi Ọmwa gha vbe siẹn ọẹn vbe odaro avbe odibo Osanobua.

10“Ọmwaikọmwa ne ọ ye ukpẹ sakan Ovbi Ọmwa, a gha ya bọe, sokpan ọmwa ne ọ rhirhi ya ukpẹ sakan Orhiọn Ne ọ huanrẹn, a i ra ya bọe.

11“A gha mu ẹn gha rrie Ọgua ediọn, odaro ne ọ khaemwisẹ ra odaro enogie ne a ya gu ẹe gui, ghẹ si osi ba ẹmwẹ vbene u gha gui hẹẹ ra ẹmwẹ ne u gha ta.

12Rhunmwuda, Orhiọn Ne Ọ Huanrẹn gha ma ruẹ ẹmwẹ ne u gha ta vbe ẹghẹ nii.”

13Ọkpa vbe uwu emwa ni rre evba keghi tama rẹn wẹẹ, “Ọmamwaemwi, tama ọtẹn mwẹ ne ọ ghae mẹ vbe ukhu ne erha ima wu fi ye ima otọ.”

14Jesu wanniẹn wẹẹ, “Ọkpia na, gha ọ rhie asẹ mẹ ne I ya gha bu ohiẹn ra ne I ya gha gha ukhu ne uwa yi?”

15Rẹn keghi tama iran hia wẹẹ, “Wa mwẹ ẹwaẹn ne uwa vbe gha ba egbe vbe egbe arovbẹmwẹ. Rhunmwuda, vbene ọmwa arhirhi yan fe sẹ, ẹ i re emwi ne ọ mwẹ ọrọre Orhiọn rẹn.”

16Jesu keghi kpa itan na ma iran wẹẹ, “Okpia ọkpa ne ọ fe keghi mwẹ otọ ne emwiokọ na maa nẹẹn ẹsẹse.

17Ọ kegha gu egbe ẹre zẹ iro wẹẹ, ‘I i mwẹ ehe ne I gha viọ emwiorhọ mwẹ hia yi, vbe I a gha ruẹe hẹẹ?’

18Ọ tama egbe ẹre wẹẹ, ‘Enian I gha ruẹe. I gha guọghọ avbe aza mwẹ, I ghi bọlọ ni kọnkọn sẹ enii, ne I viọ ọka kevbe emwi ewe mwẹ hia yọọ.

19I ghi tama egbe mwẹ wẹẹ, Uhunmwu ne ọ maa! Emwi esi ne ọ gha tọ la ukpo ni bun rre uẹ otọ nẹ nian, si orhiọn koko, gha re, gha da ne u gha zọmọ!’

20Sokpan Osanobua tama rẹn wẹẹ, ‘Wẹ ne akpa! Asọn na, a gha miẹn ruẹn orhiọn ruẹn. De ọmwa ne ọ ghẹ ghi yan ekhuan ne u khuan ye otọ ne egbe uẹ na.’ ”

21Jesu keghi rhie ugue yọ wẹẹ, “Erriọ zẹẹ ọ gha ye ne iran ni silo ẹfe gboo ne egbe iran, ne ẹ i mwẹ emwi rhọkpa vbe odaro Osanobua.”

22Jesu tama avbe erhuanegbe wẹẹ, “Ọnii ọre ọ zẹe ne I na tama uwa wẹẹ, wa ghẹ si osi ye emwi ne uwa gha re ya da orhiọn yi, ra rhunmwuda ukpọn ne uwa gha rhie ye egbe.

23Rhunmwuda orhiọn sẹ evbare ẹsẹse, egbe vbe mwẹ uyi sẹ ukpọn ẹsẹse.

24Wa ghe avbe ogbodu, iran i kọ emwi okọ, iran i rhọ emwi orhọ, iran i mwẹ aza ra erru, Osanobua ọre ọ koko iran. Wa ya ọrhẹnrhẹn maa sẹ avbe ahianmwẹ.

25Gha nọ vbe uwu uwa, ne ọ gha sẹtin la ekpa ohawa fian ukpo eso ba utọmwẹ ọnrẹn.

26Deghẹ obọ uwa ma gba emwi ne tuẹin vberriọ, vbe uwa ghi kpokpo egbe ye ẹmwẹ eni dekẹe baa?

27Wa ghe vbene avbe irunmwu ni rre oha wan hẹẹ. Iran i winna, iran i do ukpọn ne egbe iran. Sokpan I tama uwa wẹ vbene Solomọn fe sẹ, ọ ma gha mwẹ ukpọn ne ọ mose vba ọkpa vbe avbe obobo na.

28Osanobua ọre ọ rhuan avbe irunmwu na ukpọn, irunmwu ne a gha miẹn ẹre na, akhuẹ, ẹ i ghi rre evba, a kpolo ẹe hẹ ku uwu erhẹn nẹ. Wa ma ghi la evba rẹn ighe ẹ i mwẹ ọ ma rhuan uwa ukpọn. Iyayi rua kanmwa gbe.

29“Rhunmwuda ọnii, wa ghẹ gie iro emwi ne uwa gha re ra emwi ne uwa gha da han uwa.

30Rhunmwuda, avbe emwi na hia ọre iran ni ma yayi fie ho khian. Erha uwa rẹnrẹn ighe wa lo avbe emwi na hia.

31Sokpan wa mu ẹmwẹ Arriọba ẹre ke odaro vbe ẹdẹ agbọn uwa, ọ gha viọ avbe emwi na hia gie uwa.

32“Wa ghẹ fian afianma, oghẹn kherhe. Rhunmwuda, ọ re ekhọe Erha uwa nẹ ne ọ rhie Arriọba ni ne uwa.

33Khiẹn emwi ne u mwẹ hia ne u gha igho ẹre ne avbe ivbiogue. Wa gualọ ẹsiso ne ẹ i khian ọmaẹn, ne uwa si emwi ewe uwa koko ye ẹrinmwi, ehe ne ẹ i na dibu, rhunmwuda oyi i sẹ evba, arriukpa ẹ i rhia ẹe rua.

34Rhunmwuda ehe ne emwi ewe uwa ye ọre ekhọe uwa gha vbe gha ye ẹghẹ hia.

35“Wa rra ukpọn mu ẹkun, wa gie ukpa uwa gha baa, ne uwa mu egbe ye otọ khẹ emwi ne ọrhirhi a gha khin.

36Wa gha ye vbe avbe eguọmwadia ni mudia khẹ arowa iran ne ọ ke ehe irhiọha rre. Ugbẹn vbe ọ gha rre, ọ na sobọ, ne iran kie urho nẹẹn vbe ọwarọkpa.

37Ọ gha ma ne avbe eguọmwadia ni gbe vbe arowa iran aa do vba ighe iran ma vbiẹ, ighe iran re ọkhẹ. Ne I tama uwa, rẹn gha gba ukugba, ọ ghi wẹ ne iran tota, ọ ghi gho iran.

38Ọ gha ma ne iran gbe a deghẹ ọ rre vbe ogiasọn ra oghidian ọ na do vba ighe iran rre ọkhẹ.

39Wa ye rre o, akpawẹ ọdafẹn ne ọ yan owa rẹn ẹghẹ ne oyi gha ya rre, ẹ i ghẹ gie avbe oyi gbe urho la irẹn owa.

40Erriọ nọ, wa khẹ ye egbe rhunmwuda Ovbi Ọmwa gha rre vbe ẹghẹ ne uwa ma ro wa ma kọọ.”

41Pita wanniẹn tama rẹn wẹẹ, “Nọyaẹnmwa, ma ọre u kpa itan na na ra ọghe agbọn hia nọ?”

42Nọyaẹnmwa wanniẹn wẹ, “Gha ọre ọguọmwadia ne ekhọe esi kevbe ne ọ waan? Rẹn ọrọre ọmwa ni ne arowa ẹre mu owa nẹẹn gha su, ne ovbe gha ghae evbare ne eguọmwadia ne kpa vbe ẹghẹ a sẹ.

43Ọ gha maa ne ọguọmwadia ni gbe ugbẹn vbe arowa ẹre a rre, ọ na do vba ighe ọ ru vberriọ zẹẹ.

44Ne I wa ta ẹmwata ma uwa wẹẹ, arowa ẹre gha viọ emwi ẹnrẹn hia nẹẹn ne ọ gha gbe aro ghe ẹre.

45Sokpan a deghẹ ọguọmwadia nii ghi kha wẹẹ, ‘Te arowa mwẹ ghi kpẹe,’ ọ na suẹn gha gbele eguọmwadia nekpa, ke ikpia kevbe ikhuo, ọ na gha re, ọ na gha da, a da gbe egbe.

46Arowa ẹre gha rre vbe ẹdẹ ne ọ ma ro ọ ma kọ, kevbe ẹghẹ ne ọ ma rẹn. Arowa ẹre gha giagia ẹre ukhiọnmwẹ ukhiọnmwẹ, ọ ghi ru ẹre emwi ne a ru ehọ ne ẹ i họn ẹmwẹ re.

47“Ọguọmwadia ne ọ rẹn emwi ne arowa ẹre ho ne ọ ru, ne ọ ma vbe ru vbene arowa ẹre ho, a gha ye asan gbe ẹe ne obọ dae ẹsẹse.

48Sokpan ọguọmwadia ne ọ ma rẹn emwi ne arowa ẹre ho, ne ọ vbe ru emwi ne ọ kere ne a gbẹe asan yi, asan kherhe ọre a ra gbe ẹre re. Ọmwa ne a viọ ni bun na ọre a ye aro ye enibun vbe obọ ẹre, ọmwa ne a viọ ni bun sẹ na, a gha vbe ye aro ye ni bun sẹ vbe ohọ ẹre.

49“Erhẹn ọre I rre do hie ye agbọn, vbọ rrọọ akpawẹ ọ vẹn nẹ nian?

50I mwẹ isamẹ ọkpa ne I gha yegbe miẹn. U miẹn vbe egbe mannọ mwẹ hẹẹ, ọ te do fo vbe otọ!

51Te uwa te ro ighẹ ọfumwegbe mẹ rhie rrie agbọn na? Ne I tama uwa, ẹ i re ọfumwegbe, iwannegbe nọ.

52Ke ẹghẹ na kpao, arhin isẹn gha rre ẹgbẹe ọkpa, iran gha wannegbe, eha ghi mu aro da eva, eva ghi mu aro da eha.

53Erha ghi gha gu emọ ikpia khọn, emọ ikpia ghi gha gu erha iran khọn. Iye ghi gha gu emọ ikhuo khọn, emọ ikhuo ghi gu avbe iye iran khọn. Iye ọdọ ghi gha gu amwẹ ọmọ khọn amwẹ ọmọ ghi gha gu iye ọdọ khọn.”

54Jesu keghi khama emwa ni wẹẹ, “Wa gha miẹn ighẹ okuku rre odẹ ahọ, wa ghi kha wẹ, ‘Amẹ ra rhọ,’ ọ ghi gele rhọ.

55Ẹhoho odẹ ekẹn gha hoho, wa ghi wẹ, ‘Ẹdẹ gha rraa,’ ọ ghi gele gha yerriọ.

56Wa ne emwa ẹkẹ vbe iwẹnwẹn, wa sẹtin rhan otọ ama ne otọ ke iso rhie maa, vbe ọ ghi zẹ ne uwa ma na rẹn otọ vbene ẹghẹ khare na?

57“Vbọzẹ ne uwa ma na tobọ uwa rẹn emwi ne ọ kere ne uwa ru?

58Deghẹ ọmwa tie ruẹ ẹzọ, ọ na muẹn gha rrie iko, hia ne uwa dọlọ ẹmwẹ nii vbe odẹ, ne ọ ghẹ mu uẹn sẹ odaro enọbuohiẹn, ne enọbuohiẹn ghẹ rhie ruẹ ne ọgbalegbe, ne ọgbalegbe ghẹ ya mu ẹn fi eghan.

59Ne I tama ruẹn, u i ke evba ladian vbe ẹ i re te u ha ikọbọ ne igho ne a fian ruẹn re gha ya gba nẹ.”