Luke 3

Edo ((E Baibol Ẹdo) Version 1996)

← Chapter 2 Jump to: Chapter 4 →

1Ọ ghi rre ukpo ekesugie ne Ọgbaisi Taibirọs la ẹkete. Pọntiọs Pailet kegha re ne ọ khaemwisẹ vbe Judia Hẹrọd kegha re enogie vbe Galili, ọtiọnrẹn ighẹ Filip kegha gbe aro ghe isoko Ituria kevbe Trakonitis, Lisanias kegha gbe aro ghe otọ Abileni.

2Annas kevbe Kaiafan na gha re igie ohẹn. Ẹghẹ nii ọre ẹmwẹ Osanobua na bu e Jọn ne ovbi e Zẹkaraia rre vbe uwu ato.

3Rhunmwuda ọnii, e Jọn keghi lele isoko nii lẹga ẹzẹ Jọdan hia, ọ kegha kpe orhu wẹẹ, “Wa zobọ vbe orukhọ ne uwa ru, ne a samẹ ne uwa. Osanobua gha ye orukhọ uwa bọ uwa.”

4Zẹ vbene Aizaia ne akhasẹ gbẹnnẹ ọẹn ye ebe ẹre wẹẹ, “Arhunmwu ọkpa gha vannọ vbe ato: ‘Wa zẹ odẹ ye otọ khẹ Nọyaẹnmwa. Wa zẹ odẹ ne ọ diae nẹ ẹn la.

5A gha ran ugboghodo hia. A gha guọghọ oke nekhua kevbe ne giẹre hia sẹ otọ. A gha dia odẹ ni gọe hia. A ghi rriẹ urodẹ ne kpannọkpannọ hia.

6Emwa ne agbọn hia gha miẹn imiẹnfan Osanobua!’ ”

7Emwa hia kegha vẹ bu Jọn yo ne ọ samẹ ne iran. Rẹn keghi tama iran wẹẹ, “Wa ne ẹyẹn, gha ọ tama uwa yi ighẹ uwa gha miẹn uhunmwu vbe obọ izohu Osanobua ne ọ dee na?

8Wa gha ru emwi ne a gha ya rẹn ighẹ wa gele zobọ vbe orukhọ na ru. Wa ghẹ zẹdẹ mu ẹn gha ye unu gha tie, ‘Ivbi Ebraham ma khin.’ Ne I tama uwa wẹ, Osanobua gha sẹtin viọ okuta nekhua na, ya ru igiogbẹ ne Ebraham.

9Ughanmwa mu egbe nẹ ne ọ tọnnọ erhan hia la ẹzi. Erhankerhan ne ọ ma mọ ọmọ esi, a gha tọn ẹn gbe otọ, a ghi hiọrọ fi erhẹn.”

10Avbe emwa ni keghi nọ rẹn wẹ, “Vbe ua wẹ ne ima ru?”

11Rẹn wanniẹn tama iran wẹẹ, “Ọmwa ne ọ vbe mwẹ ẹwu eva, wẹ ne ọ rhie ọkpa ne ẹ i mwẹ, ọmwa ne ọ vbe mwẹ evbare, wẹ ne ọ yae ghae.”

12Avbe iran ni koko igho uhunmwu eso ni vbe rre ne a samẹ ne iran keghi vbe nọ rẹn wẹẹ, “Ọmamwaemwi, demwi ne ima gha ru?”

13Ọ tama iran wẹẹ, “Wa ghẹ koko igho gberra vbene uhi khare.”

14Ivbiyokuo eso kevbe nọ rẹn wẹẹ, “Ma vbe vbo? Demwi ne ima gha ru?” Rẹn tama iran wẹẹ, “Ghẹ ye iwo vbe egbe aro ra ẹzọ na mu kun ọmwa miẹn ọmwa rhọkpa emwi, gie igho ne a hae nuẹn su ọ ọkẹn.”

15Ọ keghi yevbe ne egbe mu emwa hia, iran kegha ye ekhọe guan kan ẹmwẹ Jọn wẹ, ughaghe rẹn ọrọre nene Mẹzaia.

16Rhunmwuda ọnii Jọn keghi tama iran hia wẹẹ, “Amẹ ọre imẹ ya samẹ ne uwa, sokpan, ọmwa ne ọ kpọlọ sẹ mwẹ ẹsẹse dee. Mẹ ma sẹ ne ọ gha ban ẹre ibata. Rẹn ọre ọ gha ye orhiọn Ne ọ huanrẹn kevbe erhẹn same ne uwa.

17Ọ rhie ahẹn ne ọ ra ya khan emwiokọ ẹre mwẹ obọ, ọ gha viọ ọka ni rrọọ la aza, ọ ghi ye erhẹn ne ẹ i dọyọ giẹ ihunhun ni rrọọ.”

18Odẹ ughughan ọre Jọn la gha dia emwa ye odẹ zẹ vbene ọ kpe orhu Iyẹn Ne Ọ Maa ma iran.

19Sokpan Jọn keghi ta ku e Hẹrọd ne Ne ọ khaemwisẹ rhunmwuda ne ọ na rhie Hẹrodias ne amwẹ ọtiọnrẹn rọnmwẹ, kevbe rhunmwuda emwi dan ọvbehe hia ne ọ ghaa ru.

20Hẹrọd ghi ra ru e ne ọ ghi wa kan sẹ, ọ na vbe mu Jọn fi ẹwẹdọ.

21A ghi samẹ ne emwa hia nẹ, a keghi vbe do samẹ ne Jesu. Ugbẹn vbe ọ ghi na erhunmwu, ẹrinmwi kie ye otọ.

22Orhiọn Ne Ọ Huanrẹn mu ikinnegbe yọ, ọ yevbe idu, ọ keghi rhuẹ yan rẹn. Urhu ọkpa keghi ke ẹrinmwi rre wẹẹ, “Wẹ ọrọre ovbi mwẹ ovbi orrọ, ọyẹnmwẹ ruẹ sẹ mwẹ.”

23Ọmọ ukpo ọgban ọre Jesu gha ye vbe ọ suẹn iwinna. Zẹ vbene emwa te ro ighe ọ khin, rẹn keghi re ovbi e Josẹf ne ovbi e Heli.

24Ne ovbi Matat, ne ovbi e Livai, ne ovbi e Mẹlki ne ovbi e Janai, ne ovbi e Josẹf.

25Ne ovbi e Matatias, ne ovbi Emọs, ne ovbi e Nahum, ne ovbi Esli, ne ovbi e Nagai.

26Ne ovbi e Maat, ne ovbi e Matatias, ne ovbi e Semẹin, ne ovbi e Josẹk, ne ovbi e Joda.

27Ne ovbi e Jonan, ne ovbi e Rhesa, ne ovbi e Zerubabẹl, ne ovbi e Sheatiẹl, ne ovbi e Neri.

28Ne ovbi e Mẹlki, ne ovbi Addi, ne ovbi e Kosam ne ovbi e Elmada, ne ovbi e Er.

29Ne ovbi e Jọsua, ne ovbi Eliaza, ne ovbi e Jorim, ne ovbi e Matat, ne ovbi e Livai.

30Ne ovbi e Simiọn, ne ovbi e Juda, ne ovbi e Josẹf ne ovbi e Jonam, ne ovbi e Eliaikim.

31Ne ovbi e Melia, ne ovbi e Mena, ne ovbi e Matata, ne ovbi e Natan, ne ovbi e Devid.

32Ne ovbi e Jese, ne ovbi e Obẹd, ne ovbi e Boaz, ne ovbi e Salmọn, ne ovbi e Nasiọn.

33Ne ovbi Aminadab, ne ovbi Admin, ne ovbi Ani ne ovbi e Nẹzrọn, ne ovbi e Pẹrẹs, ne ovbi e Juda.

34Ne ovbi e Jekọb, ne ovbi Aizik ne ovbi Ebraham ne ovbi e Tẹra, ne ovbi e Nahọ.

35Ne ovbi e Sevug, ne ovbi e Rẹu ne ovbi e Pẹlẹg ne ovbi Ebẹ ne ovbi e Sẹla.

36Ne ovbi e Kaina, ne ovbi Afaksad, ne ovbi e Siẹm, ne ovbi e Noa, ne ovbi e Lamẹk.

37Ne ovbi e Mẹtusẹla, ne ovbi Inọk, ne ovbi e Harẹd ne ovbi e Mahalale, ne ovbi e Kaina.

38Ne ovbi Ẹnọs, ne ovbi e Sẹt, ne ovbi Adam, ne ovbi e Osanobua.

← Chapter 2 Jump to: Chapter 4 →