bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Edo
/
Edo ((E Baibol Ẹdo) Version 1996)
/
Luke 16
Luke 16
Edo ((E Baibol Ẹdo) Version 1996)
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 17 →
1
Jesu keghi tama avbe erhuanegbe ẹre wẹẹ, “Okpia ne ọ fe ọkpa keghi gha mwẹ ọdia iwinna ọkpa, iran na khama rẹn ighẹ ọdia na wa rhia ẹre igho rua.
2
Rẹn keghi tie ẹre, ọ nọ rẹn wẹẹ, ‘Vbe ena khun ẹmwẹ ne I họn vbe kpa ruẹ na yi? Ya gbẹnnẹ vbe ne u mwamwa emwi mwẹ hia hẹ mu gunmwẹ, u i ghi ra gha re ọdia iwinna mwẹ ọvbehe.’
3
Rẹn keghi ye ekhọe tae wẹẹ, ‘Te arowa mwẹ ra ya mwẹ owẹ ye otọ vbe iwina na, vbe i a gha ru hẹẹ? I ma wo vbe gbe sẹ ne ọ gha mu ugbo, ekhue i gunmwẹ gha rinmwian evbare re.
4
Ẹnhẹn, I rẹn emwi ne I gha ru. Ẹghẹ nii, deghẹ iwinna ghi fe mwẹ, I gha miẹn avbe ọse ni gha rhie mwẹ la owa.’
5
Rhunmwuda ọnii, ọ keghi tie iran hia ni rri arowa ẹre osa. Ọ keghi nọ ne okaro wẹẹ, ‘Inu igho ọre u mwẹ arowa mwẹ re?’
6
Rẹn wanniẹn tama rẹn wẹ, ‘Ẹgbẹdin ofigbọn iyisẹn.’ Ọ tama rẹn wẹẹ, ‘Miẹn ebe ruẹ, tota ne u gbẹn ekigbesiyeha yọ.’
7
Ọ keghi vbe tie ọvbehe, ọ tama rẹn wẹẹ, ‘Wẹ vbe vbo, inu osa u re?’ Ọ tama rẹn wẹ, ‘Ọduẹki ọka arriaisẹn.’ Ọdia ni tama rẹn wẹẹ, ‘Miẹn ebe ruẹ, gbẹn arriaenẹ yọ.’
8
Arowa ọdia ẹkẹ vbe iwẹnwẹn na keghi tian rẹn ye ogie ẹwaẹn ne ọ wan rẹn na rhunmwuda, emwa ne agbọn ye ogiẹwaẹn ye obọ mu iwinna iran ẹse sẹ iran ne ivbi uwanmwẹ.”
9
Jesu keghi rhie te ẹe wẹẹ, “Ne I tama uwa nian, wa ye ẹfe agbọn na ne uwa mwẹ zẹ ọse ne egbe uwa, a i rẹn vbe ọ gha ghi hiẹ uwa, ne a miẹn ehe na miẹn uwa ye owa etẹbitẹ.
10
Ọmwa ne ọ ma ru ero ye emwi ne ọ kanmwa, ọre ẹ i khian vbe ru ero ye emwi ni kọnkọn, ọmwa ne ọ ru ero ye emwi ne ọ ma sẹ emwi, ọre ọ vbe ru ero ye emwi ni kọnkọn.
11
A gha miẹn ighẹ ero ọre uwẹ ru ye ẹmwẹ ẹfe agbọn na, vbe a gha na rhie ẹfe ne ẹfe nuẹn hẹẹ?
12
A deghẹ te uwẹ ru ero ye emwi ẹrrẹe, gha ọ ra rhie ọghe obọ ruẹ nuẹn?
13
“Ọguọmwadia ọkpa ne ọ gha sẹtin ga arowa eva ẹ i rrọọ, ọ gha ho ẹmwẹ ọkpa ọ ghi gha mu ohu enọkpa, ọ gha mwẹ ekhọe esi ghe ọkpa ọ ghi gha zan nọkpa. Wa i sẹtin ga Osanobua ga igho.”
14
Avbe Farisi eso ni họn avbe ẹmwẹ na kegha vin ihue ye Jesu akhọe, rhunmwuda iran ho ẹmwẹ igho ẹsẹse.
15
Jesu keghi khama iran wẹẹ, “Wa na ọre ọ rhie egbe ma emwa ne agbọn zẹ vbe emwata, sokpan Osanobua rẹn ekhọe uwa. Rhunmwuda, emwi ne emwa ne agbọn ghe gẹdẹgbẹ, ọ ma sẹ emwi rhọkpa vbe odaro Osanobua.
16
“Avbe Uhi e Mosis kevbe emwi ne avbe akhasẹ gbẹnnẹ ye otọ wa gha rre atẹ do sẹ ẹghẹ e Jọn ne Ọsamẹ. Sokpan ke ẹghẹ nii gha dee, vbe a ghi kpe orhu Iyẹn Ne ọ maa ọghe Arriọba Osanobua nẹ, ẹki udu ọre emwa hia ghi ya larọ.
17
Sokpan ne ẹrinmwi kevbe agbọn da muaan, ọre ọ fu egbe sẹ ne a khiẹn ruan ighe ne ọ ghi kanmwa sẹ vbe uwu avbe ẹmwẹ ne a ya gbe itian atẹ ye Uhi.
18
“Ọmwa ne ọ rhirhi khu amwẹ ọnrẹn, ọna vbe rhie okhuo ọvbehe, ru oghẹ, ọmwa ne ọ rhie okhuo ne a khu, ọ vbe ru oghẹ.
19
“Okpia ne ọ fe ọkpa kegha rrọọ, ogiukpọn ọre ọ ya haan vbe ẹghẹ hia, ọ ghi vbe gha lo emwi hia wọrhọwọrhọ ẹdẹgbegbe.
20
Ovbiogue ọkpa ne a tie ẹre Lazarọs keghi vbe gha rrọọ, ẹtẹ ọre ọ gba ẹre egbe hia, iran ghi do gha mu ẹn ye onurho enọfe na.
21
Nẹ ọ miẹn ehe na gha rri iku evbare ne ọ ke eteburu enọfe na kharha kua. Avbe ekita ghi vbe do gha lalọ ẹre ẹtẹ.
22
Ovbiogue nii ghi wu, avbe odibosa keghi mu ẹn ya diake Ebraham vbe ẹrinmwi. Enọfe ni keghi vbe wu, a na re ẹre.
23
Ehe ne ọ na ba suẹe vbe Ẹrinmwi erhẹn, ọ keghi tọn aro mu, ọ ya bẹghe Ebraham vbe ehe ne ọ rrei, Lazarọs keghi vbe dia kẹe.
24
Rẹn keghi datu wẹẹ, ‘Ebraham ne Evbavba! Tohan mwẹ ne u gie Lazarọs ne ọ ya fi ukpẹ ihiẹn obọ ye amẹ do nọnọ ya fu mwẹ aranmwẹ rre, rhunmwuda erhẹn na ya mwẹ rrie!’
25
Sokpan Ebraham tama rẹn wẹẹ, ‘Ovbi mwẹ, yerre wẹẹ, ẹghẹ ne uwa na rre agbọn, emwi ne ọ ghi maa sẹ hia ke wa gha re ọ wuẹ, emwi ne ọ ghi rhia sẹ hia kegha re ọghe Lazarọs, eban nian, egbe rọkhọ irẹn sokpan wẹ rre uwu obalọ.
26
Yevbe sẹ ọnii, uye gẹdẹgbẹ ọkpa rre ẹkpo ima vbe uwa, ne ọmwa ne ọ ho nọ ke edinran gha die odọọ, ghẹ sẹtin, kevbe ne ọ vbe ho ne ọ ke odọọ ọghe uwa bu ima gha dee ghẹ vbe sẹtin.’
27
Enọfe ni keghi kha wẹ, ‘Vbene ọ rhirhi gha ye hẹ, lahọ, evbavba, gie Lazarọs gha rrie owa erha mwẹ.
28
I mwẹ etẹn ikpia isẹn, ne ọ wa yan ma iran ne iran ghẹ vbe gha di uwu obalọ na.’
29
Ebraham tama rẹn wẹẹ, ‘Mosis kevbe avbe akhasẹ rre ehe ne avbe etuẹn ne ikpia ye, wẹ ne avbe etuẹn danmwehọ ude ne iran bu iran re.’
30
Enọfe nii wanniẹn wẹẹ, ‘Ẹ i re erriọ, Ebraham ne evbavba, ọmwa ne ọ rhiọkpaegbe vbe idin gha ya gu iran guan, iran gha zobọ vbe orukhọ ne a ru.’
31
Sokpan Ebraham wanniẹn wẹẹ, ‘Deghẹ iran ma rhie ẹmwẹ ne Mosis kevbe avbe akhasẹ ta, ọmwa gha rhe rhiọrre vbe orinmwi ya gu iran guan, iran i vbe rhie.’ ”
← Chapter 15
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 17 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24