Luke 9 — Edo ((E Baibol Ẹdo) Version 1996)

1Jesu keghi tie avbe erhuanegbe iweva nii, ọ na rhie asẹ kevbe ẹtin ne iran ne iran ya gha khulo avbe orhiọn esu ladian kevbe ne iran ya gha gbe emianmwẹ kemianmwẹ.

2Iyeke ọnii, ọ keghi gie iran ladian ne iran ya kpe orhu Arriọba Osanobua kevbe ne iran gha sinmwi avbe ọkhọnmwẹ.

3Ọ keghi tama iran wẹẹ, “Wa ghẹ mu egbe ye ihẹ vbe okhian na, ọre ọkpọ nọ ra ovbi ẹkpo ọvbuevbare, ra evbare ra igho, wa ghẹ kue rhie ẹwu ọvbehe gba khua.

4Ehe ne a rhirhi na miẹn uwa yi, wa di owa nii ya rhinrin wa te do kpao vbe ẹvbo ni rre.

5Deghẹ emwa ma miẹn uwa yi, wa gha ra kpao vbe ẹvbo nii, wa ghi bọnmwẹ ebubẹ ni rre uwa owẹ ye otọ zẹ vbe ama I te kha ne iran.”

6Avbe erhuanegbe kegha khian, iran na ya kpe orhu Iyẹn Ne Ọ Maa lele igue hia, iran kevbe gha sinmwi emwa vbe ehe hia.

7Hẹrọd ne ọre enogie ọghe Galili keghi họn emwi ni sunu na hia, ehia keghi zighi ye ọre aro rhunmwuda arhin eso khare wẹẹ, “E Jọn ne Ọsamẹ ọre ọ rhiọrre vbe idin!”

8Emwa eso vbe kha ighe Elaija ọre ọ ye egbe ladian, eso kevbe gha tae khian ighe ọkpa vbe uwu avbe akhasẹ nẹdẹ ọre ọ dọlegbe kpaegbe.

9Hẹrọd keghi kha wẹ, “Mẹ ọre ọ gie ya fian e Jọn uhunmwu fua, de ọmwa ne iran ghi vbe do gha ta ẹmwẹ ọnrẹn ma mwẹ na?” Ọ keghi gha ho ne irẹn miẹn Jesu.

10Avbe ukọ keghi rre, iran keghi do na iyẹn emwi ne iran ru ma Jesu. Rẹn keghi viọ iran, rẹn vbe iran ọkpa, keghi gba gha rrie ẹvbo ne a tie ẹre Bẹtsaida.

11Emwa ghi vbe họn, iran keghi vbe lele ẹe, ọ keghi rhan obọ miẹn iran, ọ ta ẹmwẹ Arriọba Osanobua ma iran, ọ na vbe sinmwi iran ne egbe ma rran vbọ.

12Ugbẹn vbe ovẹn ghi ra dero, avbe erhuanegbe iweva bu ẹre rre do tama rẹn wẹẹ, “Zẹ emwa na urrie ne iran miẹn ehe na gha rrie ore ẹvbo ra agọ ni sikẹ emwa ya gualọ evbare kevbe ehe ne iran gha vbiẹ, rhunmwuda ehe ne ọ divbiẹ ma ye na.”

13Sokpan Jesu tama iran wẹẹ, “Wa tobọ uwa rhie evbare ne iran re.” Iran wanniẹn tama rẹn wẹẹ, “Emwi ne ima mwẹ mwa ma gberra ebrẹd isẹn kevbe ehẹn eva. Te u wẹ ne ima ya dẹlẹ evbare ne avbe ẹvbo ọrhẹnrhẹn na?”

14(Ikpia ni rre evba sẹ omwa arriaisẹn isẹn.) Jesu keghi tama avbe erhuanegbe ẹre wẹẹ, “Wa viọ emwa na tota ye otu ekigbesiyeha vbe otu ọkpọkpa.”

15Avbe erhuanegbe keghi gele ru vberriọ, iran na viọ emwa nii tota.

16Jesu keghi viọ ebrẹd isẹn kevbe ehẹn eva ni, ọ tọn aro mu ghe odukhunmwu, ọ kpọnmwẹ Osanobua, ọ giagia ẹe, ọ na viọ ne avbe erhuanegbe ne iran gha ẹre ne emwa nii.

17Iran hia keghi re, ẹko vuọn iran. Avbe erhuanegbe keghi ye ne emwa re dekẹe vuọn okhuae iweva.

18Ugbẹn vbe Jesu ọkpa ghi na erhunmwu, avbe erhuanegbe bu ẹre rre. Rẹn keghi nọ iran wẹẹ, “Vbe agbọn tie mwẹ re?”

19Iran wanniẹn tama rẹn wẹẹ, “Eso tie ruẹ e Jọn ne Ọsamẹ, eso vbe tie ruẹ Elaija, eso vbe wẹ ọkpa vbe uwu avbe akhasẹ nẹdẹ ọre ọ vbe werriegbe rrie agbọn.”

20Rẹn keghi nọ iran wẹẹ, “Wa vbo, vbe uwa tie mwẹ re?” Pita wanniẹn wẹẹ, “Wẹ ọrọre Mẹzaia!”

21Jesu keghi kakabọ yan ma iran ne iran ghẹ ta ẹe ma ọmwa rhọkpa.

22Ọ keghi rhie tẹe wẹẹ, “Ovbi Ọmwa gha rri oya nibun, avbe ediọn, avbe igie ohẹn kevbe iran ni ma emwa Uhi gha kan ẹn fua. A gha gbe ẹe rua, a ghi vbe huẹn ọnrẹn kpaegbe vbe ikpẹdẹ ne ogieha.”

23Ọ keghi tama iran hia wẹẹ, “Ọmwaikọmwa ne ọ ho ne irẹn lele mwẹ, wẹ ne ọ mianmian enegbe ẹre, ne ọ mu ugbugbe ẹre ẹdẹgbegbe, ne ọ lele mwẹ.

24Rhunmwuda ọmwa ne ọ ho ne ọ da orhiọn rẹn yi gha mu ẹn fua, sokpan ọmwa ne ọ rhunmwuda mwẹ mu orhiọn rẹn rua, ọ gha miẹn ọẹn rhie.

25De ere ne ọ rrọ ne ọmwa, deghẹ agbọn na hia sẹ ọre obọ vbe ne irẹn tobọ ẹre na gu ebi ro. Ẹ i zẹdẹ mwẹ esa.

26Deghẹ ekhue mu ọmwaikọmwa ba ẹmwẹ mwẹ ra iruemwi mwẹ, ẹmwẹ ọnrẹn gha vbe mu Ovbi Ọmwa ekhue vbe ẹghẹ ne ọ gha ya rre vbe uwu uyi ẹre kevbe ọghe Erha ẹe kevbe ọghe avbe odibosa.

27Ne I tama uwa nian wẹẹ emwa eso rre emwa, ne ẹ ra wu ọ te do miẹn Arriọba Osanobua.”

28Ọ ghi rre uzọla ọkpa ne ọ ta ẹmwẹ na, Jesu keghi rhie Pita Jọn kevbe Jems ba egbe gha rrie uhunmwu oke, ya na erhunmwu.

29Zẹ vbene ọ wa na erhunmwu ni, ugbaro ẹre keghi fiwerriẹ, ukpọn rẹn kegha fuọfua nẹ i gie a ghe.

30Ikpia eva keghi wa rre vbe udomwurri do gha guee guan, iran na ọre Mosis kevbe Elaija.

31Akpa uyi ẹrinmwi keghi rre iran egbe, iran keghi gu Jesu gha ta ẹmwẹ uwu ne ọ ra wu vbe Jerusalẹm vbe ọ ma he kpẹe, ne ọ ya mu emwamwa Osanobua sẹ.

32Pita vbe ihuare keghi wa vbiẹ ua sokpan iran ghi ọrre, iran miẹn uyi Jesu kevbe ọghe ikpia eva ni mudia kẹe ni.

33Avbe emwa nii ghi ra kpao, e Pita tama Jesu wẹẹ, “Arowa, ọ kere ne ima na gha rre emwa. Ma gha bọ irhu eha, ọkpa ọghe uwẹ, ọkpa ọghe Mosis kevbe nọkpa ọghe Elaija!” (Ọ ma zẹdẹ rẹn emwi ne ọta.)

34Vbe ehe ne ọ he na wa ye guan nii, okuku keghi ladian, ọ na mu aghọnghọn rẹn gue iran, ohan keghi mu avbe erhuanegbe vbe okuku ni degue iran.

35Urhu ọkpa keghi ke uwu okuku nii ladian wẹẹ, “Ọnọna ọre Ovbi mwẹ ne I hannọ zẹ, wa miẹn ere ẹmwẹ ye ehọ.”

36Ugbẹn vbe urhu ni ghi hunwan, Jesu ọkpa ọre ọ ghi rre evba. Avbe erhuanegbe keghi wa rhie ẹmwẹ ni lẹre, iran ma ta emwi ne iran miẹn ma ọmwa rhọkpa.

37Ugbẹn vbe iran ghi tuorre vbe uhunmwu oke vbe ikpẹdẹ ne ogieva, emwa ni bun keghi vẹ bu Jesu rre.

38Okpia ọkpa keghi wa datu vbe uwu ẹbu nii wẹẹ, “Ọmamwaemwi, lahọ vbe egbe ovbi mwẹ, ukpọmọ okpia ọkpa kẹkan ne I mwẹ!

39Orhiọn gha guẹ khọn nẹ, ọ ghi gheghe datu, ọ ghi sanmwẹ ọẹn rhie gbe otọ, ọ ghi gha hu vbe unu, ọ ghi nien rẹn uan, ẹ i rherhe sẹ ọe rae.

40I te rinmwian avbe erhuanegbe ruẹ ne iran khu ẹe ladian sokpan iran ma sẹtin.”

41Jesu keghi wanniẹn wẹẹ, “U ma miẹn ighe wa i mwẹ iyayi wa ma vbe guẹ odẹ ya la! Vbe i a ghi kpẹe sẹ hẹ vbe ehe ne uwa ye? Vbe i a gha mu ẹmwẹ uwa wuo egbe kpẹe sẹ hẹ?” Ọ keghi tama okpia ni wẹ, “Rhie ne ovbi uẹ rre.”

42Ugbẹn vbe ne ọvbokhan ghi wa dee nii, nene orhiọn keghi wa vbe rhie ẹre fianmwẹ otọ, ọ na nien rẹn uan, Jesu keghi gu orhiọn dan nii guan, ọ na sinmwi ọvbokhan ni rhie ne erha ẹe.

43Unu keghi yan emwa hia ye ẹtin nọkhua ọghe Osanobua.

44Ehe ne emwa hia na yan unuan ye emwi ne Jesu ru na, ọ khama avbe erhuanegbe ẹre wẹẹ, “Wa ghẹ mianmian ẹmwẹ ne I ra tama uwa na. A ra gba Ovbi Ọmwa rhie fi emwa ne agbọn obọ!”

45Sokpan, iran ma rẹn emwi ne a yae kha. A keghi rhie ẹre lẹre ne iran ne iran ghẹ rẹn otọ ẹre. Ohan ma gie iran nọ otọ ẹmwẹ na vbe obọ ẹre.

46Avbe erhuanegbe kegha muan ẹmwẹ ye ẹmwẹ ne ọ kpọlọ sẹ vbe uwu iran hia.

47Jesu rẹn emwi ne ọ rre iran ekhọe, rhunmwuda ọnii, ọ keghi rhie ọvbokhan ọkpa, ọ keghi si ẹe kẹ egbe.

48Ọ tama iran wẹẹ, “Ọmwa ne ọ miẹn ọvbokhan na yi vbe eni mwẹ, miẹn mwẹ yi. Ọmwa ne ọ miẹn mwẹ yi, miẹn ọmwa ne ọ gie mwẹ yi. Rhunmwuda ne ọ kanmwa sẹ vbe uwu uwa hia, ọrọre ne ọ kpọlọ sẹ ehia.”

49E Jọn keghi kha wẹ, “Arowa, ma miẹn okpia ne ọ ye eni ruẹn khulo avbe orhiọn esu ladian, ma na wẹ ne ọ dobọ ẹre yi rhunmwuda ighe ẹ i rre otu ima.”

50Jesu keghi tama rẹn kevbe erhuanegbe nekpa wẹẹ, “Wa ghẹ vbe zẹdẹ gha da ẹre obọ yi rhunmwuda, ọmwa ne ọ ma gbe odan ghe uwa, otu rua ọre ọ ye.”

51Ẹghẹ ghi bu otọ nẹ ne a gha ya tọn Jesu mu dọlegbe gha rrie ẹrinmwi, rẹn keghi wa mu egbe ẹre, ọ na mu uhunmwu da Jerusalẹm.

52Rẹn keghi gie eguọmwadia eso ke odaro, eni keghi la igue ọkpa vbe Sameria ne iran ya dọlọ emwi hia yi ye otọ khẹ ọre.

53Sokpan iran ni rre evba ma miẹn rẹn yi rhunmwuda aro iran dae ighe Jerusalẹm ọre ọ rrie.

54Ugbẹn vbe Jems vbe Jọn ne erhuanegbe ẹre ghi miẹn ọna, iran wẹẹ, “Ma ghi tie erhẹn ke ẹrinmwi rre ne ọ fuẹn iran an?”

55Jesu keghi ghe iran, ọ na gu iran gui.

56Iran na ghi gha rrie igue ọvbehe.

57Ugbẹn vbe iran ghi khian vbe odẹ, okpia ọkpa khama Jesu wẹẹ, “I gha lele uẹ la ehe ne u rhirhi a la.”

58Jesu keghi tama rẹn wẹẹ, “Avbe umuọkhọkhọ mwẹ uvun, avbe ahianmwẹ vbe mwẹ oko, sokpan Ovbi Ọmwa i mwẹ ehe ne ọ na lovbiẹ kẹtin.”

59Rẹn keghi tama ọmwa ọvbehe wẹẹ, “Lele mwẹ,” Ọ ni keghi wanniẹn tama rẹn wẹẹ, “Enọwanrẹn, gunmwẹ ka ya re orinmwi erha mwẹ nẹ.”

60Jesu wanniẹn wẹẹ, “Gie iran ni wulo gha re orinmwi ọghe iran, wẹ ya gha kpe orhu Arriọba Osanobua.”

61Ọmwa ọvbehe vbe tama rẹn wẹẹ, “I gha lele uẹ Enọwanrẹn, sokpan, gunmwẹ ya gbe ọ khian ẹdẹ hia ne emwa mwẹ.”

62Jesu tama rẹn wẹẹ, “Ọmwa ne ọ gha suẹn egua ne a ya ẹmila gua nẹ, ọ na ye vbe gha ghe iyeke, ẹ i mwẹ vbe ọ gie a ya ru vbe Arriọba Osanobua.”