Luke 19

Edo ((E Baibol Ẹdo) Version 1996)

← Chapter 18 Jump to: Chapter 20 →

1Jesu keghi sẹ Jẹriko, ọ kegha lae gberra khian.

2Ọkaolotu iran ni koko igho uhunmwu ọkpa keghi rre evba, ọ mwẹ igho ẹsẹse, a keghi tie eni ẹnrẹn Zakiọs.

3Ọ kegha ho ne ọ bẹghe ọmwa ne a tie ẹre Jesu, rhunmwuda ne irẹn ma na tan nii, ọma sẹtin bẹghe Jesu vbe uwu ẹbu ẹvbo.

4Ọ keghi rhulẹ fian ke aro, ọ keghi ya mu erhan sikamọ hin ne ọ miẹn ehe na bẹghe Jesu rhunmwuda ighe evba ọ ra do la gberra.

5Ugbẹn vbe Jesu ghi sẹ evba, ọ tọn aro mu ghe odukhunmwu, ọ tama Zakiọs wẹẹ, “Zẹgiẹ tuorre Zakiọs ighe owa ruẹ ọre I ra dia ẹrẹna.”

6Zakiọs keghi tuorre, ọ keghi ye oghọghọ nọkhua miẹn rẹn yi.

7Iran ne aro ẹre se ọe hia keghi suẹn gha gui ẹzọ uwu unu wẹẹ, “Oko na ya di owa ọmwa orukhọ ya!”

8Zakiọs keghi guakpao, ọ wẹẹ, “Danmwehọ mwẹ enọwanrẹn, I gha waa emwi ne I mwẹ ye ihe eva nẹ, I gha viọ obọkpa ne avbe ivbiogue. Adeghẹ I vbe gbe ọmwaikọmwa rhu, I gha ha ẹre werriegbe nẹẹn ukhukhu enẹ.”

9Jesu tama rẹn wẹẹ, “Afiangbe la owa na ẹre na, ovbi Ebraham ọre ọmwa na vbe khin.

10Rhunmwuda iran ni wiri ọre Ovbi Ọmwa do gualọ ne ọ miẹn ehe na miẹn iran fan.”

11Jesu keghi kpa itan na ma iran ni danmwehọ ẹre, ọ wa sẹ ọkpẹn Jerusalẹm nẹ, iran hia keghi te ro ighe to Arriọba Osanobua ghi ra suẹn.

12Ọ keghi kha wẹẹ, “Adazẹ ọkpa ke do gha rrie isi ẹvbo ne ọ ya rri egie, ne ọ vbe gha di owa.

13Vbe ọ te kpao, ọ keghi tie eguọmwadia ẹre igbe, ọ na rhie igho Igoru ọkpọkpa ne iran, ọ wẹẹ, ‘Wa ya ya ẹe gha do ẹki I te rre.’

14Emwa ẹvbo ẹre i ho ẹmwẹ ọnrẹn, rhunmwuda ọnii, iran keghi zẹ ọrhẹ lelẹe ne iran ya kha wẹ, ‘Ma i ho ne okpia nii rrie egie yan ima.’

15“Iran keghi ma adazẹ na egie, ọ na gha die owa. Ọwarọkpa ọ na wẹ ne a tie avbe eguọmwadia ne ọ viọ igho na nii gie irẹn, ne irẹn miẹn ehe na ghe ere ne iran re vbe ẹki ne iran do.

16Ne odaro keghi rre, ọ wẹẹ, ‘Enọwanrẹn I ya igho ne u rhie mẹ do ẹki, I vbe rri ere igbe ọvbehe.’

17Rẹn keghi tama rẹn wẹẹ, ‘Ọbevbaru, ọguọmwadia esi ọre u khin. Vbene u ma na ru ero ye emwi nekherhe na, I gha mu ẹvbo igbe nuẹn ne u gha gbe aro ghe.’

18Ọguọmwadia ne ogieva kevbe rre, ọ wẹẹ, ‘I ya igho ne u rhie mẹ do ẹki, I vbe rri ere isẹn ọvbehe.’

19Ọ keghi tama rẹn, ọ wẹẹ, ‘I gha mu ẹvbo isẹn nuẹn gha gbe aro ghe.’

20Ọguọmwadia ọvbehe keghi vbe rre, ọ wẹẹ, ‘Enọwanrẹn, ghe igho ruẹ, abọ ukpọn ọre I hẹko rri ẹe yi.

21Ohan ruẹn ọre ọ mu mwẹ rhunmwuda ighe u wegbe aro gbe, emwi ne ẹ i re ọ wuẹ ọre u viọ, u ghi vbe gha rhọ emwi ne u ma kọ.’

22Rẹn tama rẹn wẹẹ, ‘Ọguọmwadia dan, ẹmwẹ ne unu ruẹn ọre I ra ya bu ohiẹn gbe uẹ. U rẹnrẹn ighe I wegbe aro, I ghi gha viọ emwi ne I ma yan, I ghi vbe gha rhọ emwi ne I ma kọ,

23vbọ ghi zẹ ne u ma na ya rhie igho mwẹ ye aza? A i rẹn vbe i a rre ne I miẹn ehe na ya rhie ẹre rhie igho ne ọ biẹe ba egbe?’

24Rẹn keghi tama iran ni mudia vba, ‘Wa miẹn ẹre igho nii rhie ne ọguọmwadia ne ọ mwẹ igbe.’

25Sokpan, iran tama rẹn wẹẹ, ‘Enọwanrẹn, rẹn ka mwẹ igbe nẹ!’

26Ọ keghi wanniẹn wẹẹ, ‘Ne I tama uwa, ọmwa ne ọ mwẹ, te a ra gha rhie ba ẹre re, ọmwa ne ẹ i mwẹ, uhin ekherhe ne ọ te mwẹ, a ghi vbe miẹn ẹre re.

27Ẹn hẹn, avbe iran ne eghian mwẹ nii, ni khare ne I ghẹ rrie egie yan iran, viọ iran rre ne u sirra mwẹ gbele iran uan.’ ”

28Jesu ghi guan ẹmwẹ na nẹ, ọ keghi ke odaro ne iran gha khian rrie Jerusalẹm.

29Ọ ghi sikẹ Bẹtfag kevbe Bẹtani ni rre uhunmwu oke erhan Ọliv, ọ keghi gie erhuanegbe eva ke odaro.

30Ọ tama iran wẹẹ, “Wa gha rrie igue ne ọ rre odaro uwa na, wa gha wa da la rọ, wa gha miẹn ovbi ekẹtẹkẹtẹ ne a ma he hin ẹdẹ, a de ẹre. Wa rhan rẹn mu bu mwẹ gha dee.

31Ọmwa gha nọ uwa wẹẹ, ‘Vbọzẹ ne uwa na rhan rẹn?’ Wa tama rẹn wẹẹ, ‘Nọyaẹnmwa mwẹ vbe ọ ya ẹe ru.’ ”

32Iran kegha khian, iran na miẹn emwi hia zẹ vbene Jesu gie ẹre.

33Ugbẹn vbe iran ghi wa rhan ovbi ekẹtẹkẹtẹ ni, ne ọ yan rẹn keghi tama iran wẹẹ, “Vbọzẹ ne uwa na rhan rẹn yi?”

34Iran wanniẹn wẹẹ, “Nọyaẹnmwa mwẹ vbe ọ ya ẹe ru.”

35Iran keghi mu ovbi ekẹtẹkẹtẹ nii bu Jesu gha dee. Iran kie ẹwu iran viọ yan aranmwẹ nii, iran keghi tọn Jesu mu hin ẹnrẹn.

36Ugbẹn vbe ọ ghi hin ẹnrẹn khian, iran kegha wa ẹwu iran lele odẹ.

37A ghi sẹ ọkpẹn Jerusalẹm, vbe ehe ne odẹ na la uhunmwu oke erhan Ọliv, avbe erhuanegbe ẹre ni bi lele ẹe khian keghi tọn urhu mu gha rho Osanobua, iran kegha kpọnmwẹ ọẹn ye emwi ne ọ kpọlọ ne aro iran sẹe wẹẹ,

38“Te Osanobua gha fiangbe ọba ne ọ dee vbe eni Nọyaẹnmwa! Ọfumwegbe vbe ẹrinmwi kevbe uyi ne Osanobua.”

39Eso vbe avbe Farisi ni rre uwu ẹbu nii keghi nien urhu tama Jesu wẹẹ, “Ọmamwaemwi, gbeta ye avbe erhuanegbe ruẹ unu!”

40Jesu wanniẹn wẹẹ, “Ne I tama uwa, a deghẹ iran hunwan, avbe okuta tobọ iran gha mu go.”

41Rẹn keghi sikẹ ore ẹvbo, ugbẹn vbe ọ ghi bẹghe ẹre, ọ viẹ ọe wẹẹ,

42“Vbe ọ rrọọ nian wẹ te u rẹn emwi ne u gha ru yọ ẹrẹna, ne u miẹn ehe na gha rrọọ vbe ọfumwegbe. Sokpan ọ ma guẹ rẹn.

43Ghe, ẹdẹ ne u gha vba vbe egbe dee, avbe eghian ruan gha gbe odin lẹga ruẹ, iran ghi ke uẹ ye ako, iran ghi hẹ rhu uẹ vbe igienenẹ.

44Iran gha gbe uẹ ogbefo, ke uwẹ kevbe emwa ni rre uwu odin ruẹn, okuta ọkpa ne a gha sẹ rae ye ihe ẹre ẹ i rrọọ. Rhunmwuda, u ma tie ẹre emwi ẹmwata vbe Osanobua do miẹn ruẹn fan.”

45Jesu keghi la uwu Ọgua Osa, ọ na gha khulo iran ni do ẹki ladian.

46Ọ tama iran wẹẹ, “A gbẹn ọẹn ye ebe wẹ Osanobua kha rre wẹẹ, ‘Owa erhunmwu ọre a gha tie owa mwẹ,’ sokpan wa ya ẹe khian ẹgun avbe oyi!”

47Jesu kegha ma emwa emwi vbe uwu Ọgua Osa ẹdẹgbegbe. Iran ne igie ohẹn, iran ni ma emwa Uhi, kevbe avbe iran ne olotu emwa kegha ho ne iran gbe Jesu ua.

48Sokpan iran ma rẹn vbene iran gha ruẹe hẹẹ rhunmwuda emwa hia kegha wa danmwehọ ẹre vbene iran i na ho ne ẹmwẹ ọnrẹn ọkpa kẹkan la iran iyeke ehọ de fua.

← Chapter 18 Jump to: Chapter 20 →