bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Edo
/
Edo ((E Baibol Ẹdo) Version 1996)
/
Mark 10
Mark 10
Edo ((E Baibol Ẹdo) Version 1996)
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 11 →
1
Jesu ghi kpao vbe evba rre, ọ kegha rrie isoko Judia, ọ na fian Jọdan rra. Wanwanna, emwa keghi vbe gha vẹ bu ẹre rre, ọ keghi vbe suẹn gha ma iran emwi zẹ vbene ọ ru vbe ẹghẹ hia.
2
Avbe Farisi eso keghi bu ẹre rre ne iran do gualọ ẹre ẹmwẹ ne unu. Iran nọ rẹn wẹẹ, “Uhi ima fan obọ ẹre ne okpia ne ọ gha khu amwẹ ọnrẹn ra? Tama ima.”
3
Jesu keghi nọ ọta ya rhie ewanniẹn yọ wẹẹ, “De iyi ne Mosis yi ne uwa?”
4
Iran wanniẹn wẹ, “Mosis wẹ ne a gbẹn ebe rhie nẹ ẹn wẹ a khu ẹe, ne a wẹ ne ọ gha rrie.”
5
Jesu wanniẹn tama iran wẹẹ, “Emwi ne ọ ye Mosis gbẹn uhi na ne uwa ọrọre wẹ, wa lọghọ gbe ne a ma ẹre emwi.
6
Sokpan vbe omuhẹn, ẹghẹ ne a na yi emwi hia, a ta ẹe wẹẹ, ‘Osanobua yi iran ọwẹe vbe amwẹ.
7
Ọna ọre ọ si ẹe ne okpia gha na sẹ erha ẹe kevbe iye ẹe rae, ọ ghi toba mu amwẹ ọnrẹn.
8
Iran eva ghi do khian ọkpa.’ Rhunmwuda ọnii, iran i ghi re eva sokpan ọkpa.
9
Emwi ne Osanobua ku kugbe nẹ ọmwarhọkpa ghẹ wannọ iran.”
10
Iran ghi dọlegbe sẹ owa nẹ, avbe erhuanegbe keghi nọ Jesu ẹmwẹ na.
11
Rẹn keghi tama iran wẹẹ, “Okpia gha khu amwẹ ọnrẹn fua, ọ na vbe rhie okhuo ọvbehe, ọ ru oghẹ nẹ vbe obọ amwẹ ọnrẹn.
12
Erriọ vbe nọ, okhuo ne ọ kpaa sẹ ọdọ ẹre rae, ọ na vbe ya rọnmwẹ okpia ọvbehe, ọ ru oghẹ.”
13
Emwa eso keghi viọ ibiẹka bu Jesu rre ne ọ ya obọ kan iran, sokpan avbe erhuanegbe kegha gu iran gui.
14
Ugbẹn vbe Jesu ghi miẹn ọẹn, ohu mu ẹn ọ keghi tama avbe erhuanegbe ẹre wẹẹ, “Wa gie avbe emọ nii bu mwẹ gha dee wa ghẹ da iran yi, rhunmwuda emwa vbe nian ọre ọ yan Arriọba Osanobua.
15
Ne I tama uwa, ọmwa ne ọ ma rhan obọ miẹn Arriọba Osanobua zẹ vbe ọvbokhan, ẹ i sẹtin la uwu ẹre.”
16
Ọ keghi mu nọ emọ nii ye ekuabọ ẹre, ọ viọ obọ yan iran ọkpọkpa, ọ keghi na erhunmwu ne iran.
17
Ugbẹn vbe Jesu ghi ra vbe suẹn okhian, okpia ọkpa rhulẹ bu ẹre rre, ọ diguẹ nẹ, ọ keghi nọ rẹn wẹẹ, “De emwi ne I gha ru, Ọmamwaemwi ne ọ maa, ne ẹfe ne ẹ i fo gha na sẹ mwẹ obọ?”
18
Jesu nọ rẹn wẹẹ, “Vbọzẹ ne u na tie mwẹ ne ọ maa? Ọmwa ne ọ maa rhọkpa i rrọọ gberra Osanobua.
19
Deghẹ u rẹn uhi ghẹ do izigha. Ghẹ ghẹe, ghẹ rhaa, ghẹ ta ohoghe, ghẹ do ẹki ogberhu, ye ọghọ ne erha kevbe iyuẹ.”
20
Okpia na wanniẹn tama rẹn wẹẹ, “Ọmamwaemwi, avbe uhi na hia ọre imẹ wa ya ru emwi ke ẹghẹ ọvbokhan mwẹ gha dee.”
21
Jesu keghi ghe ẹre, ọ ho ẹmwẹ ọnrẹn, ọ keghi tama rẹn wẹẹ, “Emwi ọkpa ọ ghi kẹ ruẹ yi, ya khiẹn emwi ne umwẹ hia, ghae igho ẹre ne avbe ivbiogue, ne u gha mwẹ ẹfe vbe ẹrinmwi, u ghi gha dee ne u do gha lele mwẹ khian.”
22
Ugbẹn vbe okpia nii ghi họn ẹmwẹ na, egbe keghi wa wọ ẹre ye otọ, ọ na ye owẹ gbe owẹ gha rrie, rhunmwuda, ọmwa ne ọ fe ẹsẹse rẹn khin.
23
Jesu keghi ghe avbe erhuanegbe ẹre lẹga, ọ tama iran wẹẹ, “U miẹn vbe ọ gha ba so emwa ni fe hẹ iran te do la Arriọba Osanobua!”
24
Ẹmwẹ na keghi wa kpan avbe erhuanegbe ẹre odin. Sokpan Jesu keghi ye tua unu mu ẹn wẹẹ, “Ivbi mwẹ u miẹn vbe ọlọghọ hẹ a ke sẹtin la Arriọba Osanobua!
25
Ne ọmwa ne ọ fe lao Arriọba Osanobua ọre ọ lọghọ sẹ ne a mu uhunmwu emwi vbe ẹmila la uvun olodẹ gberra.”
26
Ẹmwẹ na keghi kakabọ yan iran ne erhuanegbe ẹre unu uan, iran kegha nọ egbe wẹẹ, “De ọmwa nọ gha miẹn imiẹnfan khekherriọ?”
27
Jesu keghi ghe iran, ọ wanniẹn wẹẹ, “Emwi ne ẹ i gie a ru nọ ne emwa ne agbọn ighe ẹ i re Osanobua, a i miẹn emwi ne ẹ i gie Osanobua ru.”
28
Pita keghi kha wẹẹ, “Ghe ima nian, ma sẹ emwi hia rae, ma keghi lele uẹ.”
29
Jesu wanniẹn wẹẹ, “Ẹmwata nọ sokpan ne I tama uwa, ọmwaikọmwa ne ọ sẹ owa rae, ra etẹn ne ikpia, re etẹn ne ikhuo, ra iye, ra erha, ra emọ, ra ugbo rhunmwuda mwẹ, kevbe rhunmwuda iyẹn ne ọ maa.
30
Ọ gha miẹn inu ne ọ sẹ iran ukhukhu ne ọ khin vbe agbọn na, ọ gha miẹn ukhukhu iyisẹn ọ ghe owa, etẹn ne ikpia, etẹn ne ikhuo, iye, emọ kevbe ugbo deba ukpokpo, kevbe agbọn ne ọ dee, ẹfe ne ẹ i mwẹ ọfo.
31
Sokpan ni bun vbe iran ni re ikaro nian gha khian ikiekie, iran eso vbe uwu enikiekie gha vbe khian ikaro.”
32
Vbe ẹghẹ na, iran la odẹ nẹ vbe okhian ne iran khian rrie Jerusalẹm. Jesu keghi wa ke odaro ne avbe erhuanegbe ẹre ne afianma fian, ohan keghi vbe gha mu iran ni lele ẹre iyeke dee, Jesu keghi vbe dọlegbe viọ avbe erhuanegbe ẹre ne iweva ghe ẹfẹn ọkpa, ọ kegha tama iran emwi ne ọ gha sunu vbe egbe irẹn.
33
Ọ wẹẹ, “Banbanna nian, ma rrie Jerusalẹm. A gha rhie Ovbi Ọmwa yan avbe igie ohẹn kevbe iran ni ma emwa Uhi obọ. Iran gha bu abe uwu gbe ẹe, iran ghi rhie ẹre ne iran ne ẹ i re Ju.
34
Iran nii ghi vbe ya ẹe gbe ogiẹ, iran ghi tu asẹn yan rẹn, iran ghi gbe ẹre asan, iran ghi gbe ẹe rua. Vbe iyeke ikpẹdẹ eha, ọ gha rhiọrre vbe orinmwi.”
35
Ẹghẹ nii, Jems kevbe Jọn ne ivbi e Zẹbede keghi bu Jesu rre. Iran tama rẹn wẹẹ, “Ọmamwaemwi, ma ho ne u ru emwi ne ima a rhirhi nọ ne ima.”
36
Jesu keghi nọ iran wẹẹ, “De emwi ne uwa ho ne I ru ne uwa?”
37
Iran wanniẹn tama rẹn wẹẹ, “U gha tota vbe ẹkete vbe Arriọba uyi ruẹ, gie ima gha tota kuẹ, ọkpa vbe obọ erha ọmwa kevbe nọkpa vbe obọ iye ọmwa.”
38
Jesu wanniẹn tama iran wẹẹ, “Wa ma rẹn emwi ne uwa nọ, wa gha sẹtin ye egbe miẹn emwi ne I ra ye egbe miẹn ra, ra ne emwi ne ọ ra sunu vbe egbe mwẹ vbe sunu vbe egbe uwa?”
39
Iran wanniẹn tama Jesu wẹẹ, “Ma gha sẹtin.” Jesu tama iran wẹẹ, “Ẹmwata nọ wẹ wa gha ya egbe miẹn emwi ne imẹ ra ya egbe miẹn kevbe ne emwi ne ọ ra sunu vbe egbe mwẹ vbe sunu vbe egbe uwa.
40
Sokpan mẹ i mwẹ asẹ ne a ya zẹ ọmwa ne ọ gha tota yọmwẹ obọ erha ọmwa kevbe obọ iye ọmwa. Osanobua ọre ọ rhie ukpo na ne emwa ne ọ mwamwa ẹn khẹ.”
41
Avbe erhuanegbe igbe ni dekẹe ghi họn ẹmwẹ na, ohu Jems kevbe Jọn kegha mu iran.
42
Jesu keghi rhunmwuda ọnii tie iran hia rrie egbe, ọ tama iran wẹẹ, “Wa rẹnrẹn wẹẹ, emwa ne a ghi ka ye ni khaemwisẹ yan emwa ọvbehe nẹ, wa mwẹ asẹ vbe uhunmwu iran, kevbe wẹ avbe olotu iran wa kha yan iran ẹsẹse.
43
Sokpan ẹ i sẹtin gha yerriọ vbe ehe ne uwa ye. Deghẹ orhiọnkpa ho ne irẹn gha re ne ọ kpolo, gie ẹe gha re ọguọmwadia eni dekẹe hia.
44
Ọmwa ne ọ vbe ho ne irẹn gha re okaro, gie ẹe gha re ọviẹn eni dekẹe hia.
45
Erriọ zẹẹ, Ovbi Ọmwa ma rre ne a do ga ẹe, te ọ rre do ga emwa, kevbe ne ọ vbe ya orhiọn irẹn ru adẹwerriegbe ọghe emwa ni bun.”
46
Iran keghi do sẹ Jẹriko. Ugbẹn vbe Jesu ghi khian ke irẹn kevbe erhuanegbe ẹre kevbe emwa ni bun ẹsẹse, okpia ọkpa ne ọ rhu aro, Batimiọs ne ovbi Timiọs keghi tota vbe ọkpẹn odẹ gha vbu evbare.
47
Ugbẹn vbe ọ ghi họn ighe Jesu ovbi Nazarẹt nọ, ọ keghi suẹn gha datu wẹẹ, “Jesu Ovbi e Devid! Tohan mwẹ!”
48
Emwa ni bun keghi van okan mu ẹn wẹ ne ọ gue unu ẹnrẹn. Sokpan rẹn keghi dọlegbe datu wẹẹ, “Ovbi e Devid, Tohan mwẹ!”
49
Jesu keghi mudia, ọ na wẹ ne a tie ẹre rre. Rhunmwuda ọnii, iran bu arhuaro nii gha dee do tama rẹn wẹẹ, “Fanmwẹ egbe rua ighe ọ tie ruẹ.”
50
Rẹn keghi kie agbada ẹwu ẹre mu fua, ọ bubu kpao, ọ na bu Jesu gha dee.
51
Jesu nọ rẹn wẹẹ, “Vbe ua ho ne I ru nu ẹn?” Arhuaro nii keghi wanniẹn wẹẹ, “Ọmamwaemwi, I ho ne I sẹtin gha dẹghe.”
52
Jesu tama rẹn wẹẹ, “Gha khian iyayi ruẹ mu uẹn egbe rran nẹ.” Vbe ọwarọkpa, rẹn keghi suẹ gha bẹghe, ọ keghi lele Jesu gha khian vbe odẹ.
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 11 →
All chapters:
1
2
3
4
5
6
7
8
9
10
11
12
13
14
15
16