Mark 15

Edo ((E Baibol Ẹdo) Version 1996)

← Chapter 14 Jump to: Chapter 16 →

1Vbe owiẹ vbirrivbirri avbe igie ohẹn kevbe avbe ediọn keghi ya gu iran ni ma emwa Uhi kevbe avbe eghaẹvbo do iko ẹgiẹgiẹ, ne iran mwamwa emwi ne iran gha ru. Iran keghi rro eghan ye Jesu obọ, iran na si ẹe bu Pailet.

2Pailet keghi nọ rẹn wẹẹ, “Wẹ ọrọre ọba avbe Ju ra?” Jesu wanniẹn tama rẹn, “Erriọ u kha re.”

3Avbe igie ohẹn keghi ba Jesu ifi ẹzọ emwi ni bun ẹsẹse.

4Pailet keghi rhunmwuda ọnii dọlegbe nọ rẹn wẹẹ, “U i zẹ ene unu ruẹn ra? U ma họn ẹzọ ọrhẹnrhẹn ne iran gu ẹe gui na!”

5Jesu ma zẹdẹ guan hiehiere. Ọna keghi kpan e Pailet odin.

6Ẹghẹ Ugie Alagberra hia ọre Pailet ya fan oghunmwu ọkpa ne ọ ghi yẹ iran fua ne iran.

7Ẹghẹ na, okpia ọkpa ne a tie ẹre Barabbas kegha rre ẹwẹdọ deba avbe etẹ eso ni de izigha vbe ẹghẹ ne iran na si okhọn igbinna ẹvbo.

8Ugbẹn vbe avbe emwa ghi gbe ẹbu nẹ, iran keghi suẹn gha tama Pailet wẹ nọ ya ẹmwẹ lekhue iran vbene ọ ka ruẹe de ẹdẹ.

9Pailet keghi nọ iran wẹẹ, “Wa ho ne I fan ọba avbe Ju fua ne uwa ra?”

10Rẹn wa rẹn wẹ ikhuiwu ọre avbe igie ohẹn ya si Jesu bu irẹn gha dee.

11Sokpan avbe igie ohẹn keghi kpikpi emwa ni gbe ẹbu ye evba wẹ ne iran kha ma Pailet wẹ Barabbas iran ho ne ọ fan fua ighẹ ẹ i re Jesu.

12Pailet keghi dọlegbe gu iran guan wẹẹ, “Vbe uwa ghi wẹ ne I ru ọmwa ne uwa tie ẹre ọba avbe Ju hẹẹ?”

13Iran datu wẹẹ, “Kan rẹn mu ugbugbe.”

14Pailet keghi nọ iran wẹẹ, “De emwi dan ne ọ mobọ ru?” Iran keghi wa dọlegbe kakabọ datu wẹẹ, “Kan rẹn mu ugbugbe.”

15Pailet keghi ho ne ọ ru emwi ne ogha yẹ iran, ọ na rhunmwuda ọnii fan Barabbas fua ne iran. Ọ ghi wẹ ne iran gbe Jesu asan nẹ, ọ keghi rhie ẹre ne iran ne iran ya kan rẹn mu ugbugbe.

16Avbe ivbiyokuo keghi si Jesu gha die ore (ọ ghe Enogie), iran keghi tie iran ni dekẹe vbe uwu otu iran kugbe.

17Iran keghi mu ẹwu ododo yọ Jesu, iran keghi ya erhan igban do erhu ẹde mu rhuẹ ọre.

18Iran na suẹn gha tuẹ ọe wẹẹ, “Ọba avbe Ju gha tọ ọ kpẹre.”

19Iran ghẹ ghi ya erhan gbe emwi ye ọre uhunmwu nẹ, iran ghi tu asẹn ku ọre, iran ghi vbe diguẹ ye uhunmwu rhanmwẹ otọ nẹ ẹn.

20Iran ghi ya ẹe gbe ogie fo nẹ, iran keghi kie ẹre ẹwu ododo, iran na dọlegbe viọ ukpọn irẹn yọe. Iran keghi su ẹe ladian ne iran ya kan rẹn mu ugbugbe.

21Iran keghi do khian dekun okpia ọkpa ne a tie ẹre Saimọn vbe odẹ, igue ọ re ọ ke die adesẹ ore ẹvbo, iran keghi ya ẹtin mu ẹn ne ọ mu ugbugbe Jesu. (Ovbi e Sairin ọre Saimọn na khin, rẹn ọ re erha Alẹkzanda kevbe Rufọs.)

22Iran keghi si Jesu gha die ehe ne a tie ẹre Gọlgọta (emwi ne a ye ọnii kha ọrọre Isi Ugboloko Uhunmwu).

23Iran ghi sẹ evba, iran keghi te ra mu ayọn ne a ye ukhunmwu ne a tie ẹre maia gua nẹ ẹn da, sokpan Jesu ma da e.

24Iran keghi kan rẹn mu ugbugbe, iran keghi gba ghae ukpọn rẹn, iran na yan uta yọ ne a miẹn ehe na rẹn ne dọmwadẹ ọghọe gha rhie vbọ.

25Ihe ẹgogo ihinrin vbe owiẹ ọre irẹn ya kanrẹn mu ugbugbe.

26Iran keghi gbẹn ẹzọ ne a gu ẹe gui ye evba wẹẹ, “Ọba avbe Ju.”

27Iran keghi vbe kan izigan eva mu ugbugbe ba Jesu, ọkpa vbe obọ erha ọmwa, kevbe nọkpa vbe obọ iye ọmwa. [

28Ẹmwẹ ne ebe khare keghi sẹ wẹẹ, “A keghi kae ba avbe izigan.”]

29Avbe ilavbodẹ kegha fieghe uhunmwu, iran na gha ya ukpẹ sakan ẹn wẹẹ, “Ẹbẹe, U ma wẹ u gha dunmwu Ọgua Osa sẹ otọ ne u ya ikpẹdẹ eha mu ẹn kpa!

30Tuorre vbe ugbugbe nian ne u miẹn egbe ruẹ fan!”

31Erriọ zẹẹ ọre avbe igie ohẹn kevbe iran ni ma emwa Uhi vbe ya ẹe gbe ogie wẹẹ, “Ọ miẹn emwa ọvbehe fan, sokpan ọ ma sẹtin miẹn egbe ẹre fan.

32Deghẹ Mẹzaia ne ọba Izrẹl sẹtin tuorre vbe ugbugbe banbanna, ma gha ya ẹe yi.” Iran eva ne a vbe kan mu ugbugbe ba Jesu keghi vbe gha ya ukpẹ sakan ẹn.

33Ọ ghi sẹ ogiavan, ebiebi keghi wa so vbe ẹvbo ni hia, ọ keghi ya ẹgogo eha vbe otọ.

34Ọ ghi sẹ ihe ẹgogo eha, Jesu keghi ya urhu ne ọ la datu wẹẹ, “Ẹloi, Ẹloi, lema sabachthani?” Emwi ne a ya ọnii kha ọrọre “Osanobua mwẹ, Osanobua mwẹ, vbe ọ zẹ ne u na he mwẹ ye otọ?”

35Eso vbe uwu iran ni rre evba ghi họn, iran wẹẹ, “Wa gha họn vbe ọ tie Elaija.”

36Ọkpa vbe uwu iran ni rre evba keghi rhie ihiọn, ọ keghi ya zẹgiẹ fi ẹe ye ayọn, ọ keghi ya ọkpọ tọn ẹn mu ghe odukhunmwu, ọ na rhie ẹre ye Jesu unu, ọ wẹẹ, “Wa zin egbe, wa gie a dia gha ghe deghẹ Elaija gha do mu ẹn tuorre vbe uhunmwu ugbugbe.”

37Jesu keghi kakabọ datu, ọ na hẹwẹ fo.

38Ukpọn ne a tan ẹn ya fian ọgua Osa keghi va eva ke ukhunmwu do sẹ otọ.

39Enọwanrẹn ivbiyokuo ne ọ mudia ye odaro ugbugbe ghi miẹn vbene Jesu datu hẹ ọ ke wu, ọ wẹẹ, “Ovbi Osanobua ọre okpia na te gele khin.”

40Ikhuo eso keghi vbe mudia ye urria gha ghe ughe. Usun iran ọre ọ ye ighe Salomẹ, kevbe Meri Magdalen kevbe Meri iye Jems ne ọvbokhan kevbe Jose.

41Iran na ka gha lele Jesu khian yi, iran keghi vbe gha ru iyobọ nẹ ẹn vbe ọ he rre Galili. Ikhuo ni bun ọvbehe ni lele ẹe ke Jerusalẹm gha dee kevbe rre evba.

42Ẹdẹ ghi ya egbe rrie ota, Josẹf ne ovbi Arimatia keghi rre.

43Ọmwa kpataki wa nọ vbe uwu Iko ore ẹvbo. Rẹn keghi vbe re ọkpa vbe uwu emwa ni mudia khẹ ẹghẹ ne Arriọba Osanobua gha ya rre. Ọ kegha re ẹdẹ Imuegbe ye otọ (ọnii nọ wẹ, ẹdẹ ne ọ ke aro ne Ẹdẹ Ikẹtin); Josẹf keghi bu Pailet gha khian, ọ nọ rẹn wẹ ne ọ mu ikun Jesu ne irẹn.

44Ọ keghi yan Pailet unu an vbe ọ họn ẹn ighe Jesu wu nẹ. Ọ keghi datie enọwanrẹn ivbiyokuo ọkpa, ọ keghi nọ rẹn deghẹ ọ kpẹre ne Jesu ghi wu.

45Enọwanrẹn ivbiyokuo ni ghi na iyẹn ma rẹn nẹ, Pailet na wẹ ne Josẹf ya mu ikun ẹnrẹn.

46Josẹf keghi dẹ ogbọnmwọkpa eto ovbiohuẹ, ọ ghi mu ikun ẹnrẹn sẹ otọ nẹ, ọ na ye ogbọnmwọkpa ni vbuẹ ọre, ọ keghi wa ẹre ye idin ne a fian ye uwu okuta, ọ keghi werriẹ okuta ne ọ kpọlọ rhu uvun ne a la la idin ni.

47Meri Magdalen kevbe Meri ne iye Jose kegha ghe iran, iran keghi bẹghe ehe ne a mu Jesu yi.

← Chapter 14 Jump to: Chapter 16 →