Mark 12 — Edo ((E Baibol Ẹdo) Version 1996)

1Jesu keghi suẹn gha ya itan gu iran guan, ọ wẹẹ, “Okpia ọkpa keghi do mu ugbo emwiokọ, ọ gba ogba lẹga ẹre, ọ keghi fian okọ ne a na ru ẹdin yọ, ọ keghi vbe bọ owa ọbodẹ yọ. Ọ Keghi mu ne emwa eso gha gbe aro ghe ẹre vbe agbeghae, rẹn keghi kpao gha rrie ehe.

2Ugbẹn vbe ọ ghi sẹ ẹghẹ ne a ya rhọ emwiokọ nii, rẹn keghi gie ọviẹn ọnrẹn bu avbe emwa ni gbe aro ghe ugbo nii, ne iran ya miẹn iran emwi ne ọ sẹ irẹn egbe vbọ viọ gie irẹn.

3Iran ni gbe aro ghe ugbo ni keghi wa guae rhie, iran mama ẹn, iran keghi giee fi abọ gha rrie.

4Ne ọ yan ugbo nii keghi vbe gie ọviẹn ọvbehe, iran ni gbe aro ghe ugbo nii, keghi guọguọ ẹre uhunmwu, iran keghi rri ọre oya ẹsẹse.

5Ne ọ yan ugbo keghi vbe gie ọviẹn ọvbehe, iran keghi wa gbe ẹe rua. Erriọ iran wa ru ni dekẹe hia fẹẹrẹ, iran gbele eso ua, iran mama eso.

6Ọmwa ọkpa ne ọ ma ghi he gie keghi re ovbi ẹre ukpọmọkpa. Vbe okiekie, ọ keghi gie ovbi ẹre ukpọmọkpa ni bu iran ni gbe aro ghe ugbo ni agbeghae, ọ wẹẹ, ‘Mẹ yayi ighẹ iran gha lohan ovbi mwẹ.’

7Sokpan iran ni gbe aro ghe ugbo ni keghi kha wẹẹ, ‘Wa ghe ovbi ne ọ yan ugbo, wa gia gbe ẹe rua ne ugbo khian ọghomwa.’

8Rhunmwuda ọnii, iran mu ọmọ nii, iran keghi gbe ẹe rua. Iran keghi mu ikun ẹnrẹn lahin ugbo rre, iran na ya mu fua.”

9Jesu keghi nọ iran wẹẹ, “De emwi ne uwa yayi ighẹ ne ọ yan ugbo ni gha ghi ru? Ọ gha do gbele avbe emwa nii, ọ ghi mu ugbo nii ne emwa ọvbehe gha gbe aro ghe.

10Mẹ yayi ighẹ wa tie ebe na nẹ, ne ọ khare wẹẹ: “ ‘Okuta ne eni bọ ọwa he wẹ ẹ i maa, ọre ọ ghi do khian a ma miẹn a i ru,

11Nọyaẹnmwa ọre ọ ru emwi na, ọyunnuan nọ vbe aro mwa.’ ”

12Avbe ọkaolotu e Ju keghi te ho ne iran mu Jesu rhunmwuda iran rẹnrẹn ighẹ rhunmwuda iran ọre ọ na kpa itan na. Sokpan ohan emwa kegha mu iran, iran na rhunmwuda ọnii sọ rae, iran na gha rrie.

13Iran keghi gie avbe Farisi eso, kevbe eso vbe uwu ekpayẹ Hẹrọd ne iran ya gualọ Jesu ẹmwẹ ne unu.

14Iran keghi bu ẹre gha dee, iran tama rẹn wẹẹ, “Ọmamwaemwi, ọmwa ne ọ ta ẹmwata ma rẹn ruẹn yi, wẹ i lele ne agbọn khare, rhunmwuda osi ẹrrẹe i siọ, sokpan, ẹmwata ne ọ rre vbene Osanobua mu ẹmwẹ edẹ agbọn emwa yi ọre u ma emwa re. Tama ima, ọ kere vbe ọmwa a ha igho uhunmwu gie Ọgbaisi e Rom ra ọ ma ke? Ne ima ha ẹre ra ne a ghẹ hae?”

15Sokpan Jesu rẹn ehe ne iran ghae yi nẹ, ọ keghi wanniẹn wẹẹ, “Vbọzẹ ne uwa na gualọ mwẹ ẹmwẹ ne unu? Wa rhie agiẹghẹ igho ẹrọnmwọ ọkpa mẹ ghe vbe vba.”

16Iran keghi rhie ọkpa gie ẹe, rẹn keghi nọ iran wẹẹ, “De ama ugbaro kevbe eni ọmwa ne ọ rrọọ na?” Iran wanniẹn wẹẹ, “Ọghe Nọgbaisi nọ.”

17Jesu wanniẹn tama iran wẹẹ, “Rhunmwuda ọnii, wa rhie emwi ne ọ re ọghe Nọgbaisi nẹ ẹn, ne uwa vbe rhie ne ọ re ọghe Osanobua ne Osanobua!” Ẹmwẹ ọnrẹn keghi wa yan iran unu uan.

18Eso vbe uwu avbe Sadusi keghi bu Jesu gha dee, iran na ọre ọ ta ẹe ighẹ arhiọkpaegbe vbe orinmwi i rrọọ.

19Iran nọ rẹn wẹẹ, “Ọmamwaemwi, Mosis ọre ọ mu uhi na gbọọ ne ima wẹẹ, ‘Orhiọnkpa gha wu sẹ amwẹ ọnrẹn rae vbe ọ ma he biẹ nẹ ẹn, ọtiọnrẹn ne okpia ghi si okhuo ni ẹghẹ ne iran miẹn ehe na biẹ ne okpia ne ọ wu ni!’

20Etẹn ikpia ihinrọn keghi do gha rrọọ. Ne ọdiọn ne ọ rrọọ keghi rhie okhuo, ọma he kẹ ọre biẹ, ọ keghi wu.

21Ne ọ zẹ diake ẹe keghi rhie okhuo nii rọnmwẹ, ọma he vbe kẹ ọre biẹ, ọ na vbe wu.

22Erriọ ọre ọ vbe rruan e nukpogieha, kevbe ni dekẹe hia. Etẹn ihinrọn na ọre ọ wa rọnmwẹ okhuo ni vbene iran ma na biẹ. Vbe okiekie ehia, nene okhuo keghi vbe wu.

23Ẹn hẹn, a ghẹ ghi huẹn emwa hia kpao vbe idin vbe ẹdẹ arhiọkpaegbe, de amwẹ ọmwa ne irẹn gha khin vbọ ugbẹn vbe a miẹn wẹẹ iran ihinrọn ni wa rọnmwẹ ọẹn gba obọ?”

24Jesu wanniẹn tama iran wẹẹ, “U ma miẹn vbe uwa ba odẹ ku hẹẹ! Emwi ne ọ si ẹe ye uwa egbe ọrọre wẹ wa ma rẹn otọ Ebe nii ra ẹtin Osanobua.

25Rhunmwuda, a gha huẹn emwa kpao vbe idin nẹ, te iran khian gha ye vbe avbe odibosa ni rre ẹrinmwi. Orọnmwẹ i ghi vbe rrọọ ne ikpia kevbe ikhuo.

26Ẹn hẹn, vbe kpae ọ ghe wẹ a huẹn emwa kpao vbe orinmwi, wa ma he tie ẹre vbe ebe Mosis ra, vbe ehe ne ọ na guan kan ẹmwẹ oha ne erhẹn na mu vẹn? Rhunmwuda, a gbẹn ọẹn ye evba wẹẹ, Osanobua khare wẹẹ, ‘Mẹ ọrọre Osanobua Ebraham, Osanobua Aizik kevbe Osanobua Jekọb.’

27Ọ ni rhie ma wẹ Osanobua ọghe emwa ni rre agbọn nọ, ẹ i re ọghe avbe orinmwi, wa ba odẹ ku gbe.”

28Ọkpa vbe uwu iran ni ma emwa Uhi ne ọ rre evba keghi họn imuan ẹmwẹ na. Ugbẹn vbe ọ ghi miẹn vbene Jesu wanniẹn avbe Sadusi ẹmwẹ ẹse hẹẹ, rẹn keghi bu ẹre gha dee do nọ rẹn wẹẹ, “De ne ọ re ne ọkpọlọ sẹ vbe uwu avbe uhi hia?”

29Jesu wanniẹn wẹẹ, “Ne ọ kpọlọ sẹ ọrọre ‘Danmwehọ Izrẹl Nọyaẹnmwa Osanobua mwa ọkpa ọrọre Nọyaẹnmwa.

30Wẹ ghi ya ekhọe ruẹ hia, orhiọn ruẹn hia, ẹko ruẹ hia, kevbe ẹtin ruẹn hia ho ẹmwẹ Nọyaẹnmwa Osanobua ruẹ.’

31Ne ọ ghi vbe zẹ diake ẹe e vbe uwu uhi ọrọre ‘Ho ẹmwẹ ogieva ruẹ zẹ vbene u ho ẹmwẹ egbe ruẹ.’ Uhi ọvbehe ne ọ ghi kpọlọ sẹ eva na, ẹ i ghi rrọọ.”

32Ne ọma emwa Uhi nii keghi wanniẹn tama Jesu wẹẹ, “Ọbevbaru Ọmamwaemwi. Ẹmwata wa nọ zẹ vbene u tae nii wẹẹ, Nọyaẹnmwa ọkpa ọrọre Osanobua kevbe wẹ Osanobua ọvbehe i ghi vbe rrọọ gberra irẹn.

33Kevbe wẹ, te ọ kere ne ọmwa gha ya ekhọe ẹre hia, ẹko ẹre hia, kevbe ẹtin ẹnrẹn hia ho ẹmwẹ Osanobua kevbe nọ ho ẹmwẹ ogieva ẹre zẹ vbe egbe ẹre. Ne a gha mu Uhi eva na sẹ ọre ọ maa sẹ ne a gha viọ aranmwẹ rre do gha giẹn vbe uhunmwu aka Ogiukpo kevbe ne a gha zọ ese ghe Osanobua.”

34Ugbẹn vbe Jesu ghi miẹn vbene ọ ye ẹwaẹn rhie ewanniẹn yọ hẹẹ, ọ tama rẹn wẹẹ, “U ma ghi khian rrei ne Arriọba Osanobua.” Ama miẹn ọmwa ne ohan ghi gie ẹe nọ Jesu ọta vbe iyeke ọnọna.

35Ugbẹn vbe Jesu ghi ma emwa emwi vbe uwu Ọgua Osa, ọ nọ ọta wẹẹ, “Vbe iran ni ma emwa Uhi na tae hẹ wẹ urho Devid ọre nene Mẹzaia ra la rre?

36Orhiọn Ne Ọ Huanrẹn rhie ẹre ye Devid unu ne ọ tae wẹẹ, “ ‘Nọyaẹnmwa khama Nọyaẹnmwa, Tota ye obọ erha ọmwa mwẹ, mẹ te do viọ avbe eghian ruẹn, ye uwẹ atataowẹ.’

37Devid tobo ẹre tie ẹre ‘Nọyaẹnmwa,’ vbe nene Mẹzaia ghi vbe ya re ovbi Devid hẹẹ?”

38Ẹko wa rhiẹnrhiẹn emwa ni gbe ẹbu ye evba gha danmwehọ ọ ghi ma iran emwi, ọ tama iran wẹẹ, “Wa rhie aro ye otọ vbe egbe iran ni ma emwa Uhi, ni hẹ yo hẹ rre ke iran kevbe agbada ne ọ sẹ otọ fo, ne emwa miẹn ehe na gha ye ọghọ kpe tuẹ iran vbe obọ eva vbe adesẹ ẹki.

39Iran ni ho ukpo ne ọ yo sẹ vbe Ọgua ediọn kevbe ehe ne a na gbe ẹbu gha rri evbare.

40Iran miẹn ehe na la avbe ẹgbẹ egbe, iran ghi khiẹn iran obọ miẹn iran owa iran, iran ghi do gha na erhunmwu ne ọ taẹn ọghe ne a ba bẹghe mwẹ. Te oya ne a ra rri iran ẹre yae khọrhiọn yọ!”

41Jesu keghi tota ke aza ọghe Ọgua Osa. Ọ na gha ghe vbene emwa viọ igho ye uwu ẹkpẹti ni hẹẹ. Emwa ni fe ni bun keghi wa gha rhurhẹ igho yọọ.

42Okhuo ẹgbẹ ọkpa ne ọ re ovbiogue keghi do viọ ekpini eva ne ọ re ikọbọ kuọ.

43Rẹn keghi tie avbe erhuanegbe si koko ọ tama iran wẹẹ, “Ne I tama uwa wẹ okhuo ẹgbẹ ne ovbiogue na ọre ọ viọ igho ne ọ bun sẹ ye uwu aza na sẹ emwa nekpa hia.

44Rhunmwuda, iran ni dekẹe hia uwu ọkpọkua ọghe ẹfe ne iran mwẹ, ọre iran na ya yo imuohan, sokpan, okhuo na, egbe ne ọ rhe ya re ovbiogue, ọ keghi wa viọ emwi hia ne ọ mwẹ yọ, emwi ne ọ mwẹ hia ọre ọ ya yo imuohan.”