Mark 8

Edo ((E Baibol Ẹdo) Version 1996)

← Chapter 7 Jump to: Chapter 9 →

1Ọma ghi kpee vbe iyeke ọnọna, emwa kevbe dọlegbe gbe ẹbu. Ugbẹn vbe evbare ghi fo, Jesu keghi tie avbe erhuanegbe rrie egbe, ọ tama iran wẹẹ,

2“Ohan emwa na wa to mwẹ, rhunmwuda ke nẹghẹdia gha dee iran kegha gunmwẹ rre emwa, evbare i ghi gue iran nian.

3I gha wẹ ne I zẹ iran urrie vbe ẹko ohanmwẹ, iran gha sahẹ vbe odẹ rhunmwuda eso vbọ ke ehe ne ọ rrei ẹsẹse rre.”

4Avbe erhuanegbe ẹre nọ rẹn wẹ, “De ehe ne ọmwa gha na miẹn evbare ne ọ gha ya koko ọkhọngborrie na vbe uwu ato na.”

5Jesu keghi nọ iran wẹẹ, “Inu ebrẹd wa mwẹ vba?” Iran tama rẹn wẹẹ, “Ihinrọn.”

6Rẹn keghi tama avbe emwa ni wẹ ne iran tota ye otọ. Ọ keghi viọ ebrẹd ihinrọn ni, ọ kpọnmwẹ Osanobua, ọ giagia ẹe hẹ ne avbe erhuanegbe ẹre ne iran ghae ẹre ne emwa nii, erhuanegbe ẹre na gele ru vberriọ.

7Iran keghi vbe mwẹ ehẹn giẹrẹ eso, Jesu keghi vbe kpọnmwẹ, ọ na we avbe erhuanegbe vbe gha ẹre ne emwa ni.

8Dọmwadẹ ọghọe keghi re ne ẹko vuọn. Emwa ni keghi re arriaisẹn enẹ.

9Avbe erhuanegbe keghi si ebrẹd ne emwa re kẹe koko, ọ keghi vuọn okhuae ihinrọn. Jesu keghi zẹ emwa ni urrie.

10Ọ keghi la okọ ọwarọkpa, deba avbe erhuanegbe ẹre, iran na gha rrie isoko Dalmanuta.

11Avbe Farisi eso keghi bu Jesu gha dee do gbe ẹre agbanmwẹ. Iran gualọ emwi ne iran gha ka ye ọre owẹ. Iran khama rẹn wẹ ne ọ winna iwinna ama ya rhie ma ighẹ Osanobua ọre ọ gele giẹe.

12Jesu keghi tu ye ẹmwẹ na ẹsẹse, ọ wẹẹ, “Vbọzẹ ne orre na na gualọ iwinna ama. Vbe ọ ke dee! A i ra rhie ama rhọkpa ma emwa na.”

13Ọ keghi kpao sẹ iran rae, ọ la okọ, ọ kegha rrie asefẹn nọkpa ọghe odighi.

14Avbe erhuanegbe ma yerre ya rhie ebrẹd ya gbe akhua. Ududu ebrẹd ọkpa kẹkan ọre ọ gue iran vbe uwu okọ.

15Jesu tama iran wẹẹ, “Wa gha begbe vbe obọ eyist avbe Farisi kevbe eyist ọghe Hẹrọd.”

16Iran keghi suẹn gha tama egbe iran wẹẹ, “Rhunmwuda ne ima ma na rhie ebrẹd mwẹ ọre ọ gu ta ẹmwẹ na.”

17Jesu wa rẹn ẹmwẹ ne iran guan, ọ keghi rhunmwuda ọnii nọ iran wẹẹ, “Vbe uwu talọ ye ẹmwẹ ebrẹd ne ẹ i gue uwa baa? Wa ma he ye rẹn, ọ ma he ye la uwa ekhọe. Erriọ ekhọe uwa gbin ra?

18Wa mwẹ aro, wa i ya ẹe dẹghe ra? Wa mwẹ ehọ, wa i ya ẹe họn ẹmwẹ ra? Wa ma ghi ye rre?

19Ẹghẹ ne I na giagia ebrẹd isẹn ne arhunmwu arriaisẹn isẹn, inu okhuae wa ya ne emwa re kẹe vuọn?” Iran wanniẹn wẹ, “Iweva.”

20“Ẹghẹ ne I na vbe giagia ebrẹd ihinrọn ne arhunmwu arriaisẹn enẹ, inu okhuae wa miẹn si koko vbe ne emwa re kẹe?” Iran wanniẹn tama rẹn wẹ, “Ihinrọn.”

21Ọ keghi nọ iran wẹẹ, “Ọma he ye la uwa ekhọe?”

22Ugbẹn vbe iran sẹ Bẹtsaida, iran rhie okpia ọkpa ne ọ rhu aro bu ẹre rre, iran rinmwian ẹn wẹ ne ọ ya obọ kan rẹn.

23Jesu keghi rhie okpia ni obọ, ọ na rhie ẹre hin adesẹ ẹvbo rre. Ọ ghi tu asẹn ye ọre aro nẹ, Jesu viọ obọ yan rẹn, ọ nọ rẹn wẹẹ, “U bẹghe emwi rhọkpa ra?”

24Okpia ni keghi tọn aro mu ọ wẹẹ, “I bẹghe emwa, sokpan iran ye vbe erhan, iran gha khian yo khian rre.”

25Jesu keghi dọlegbe rhie obọ yan okpia ni aro, okpia ni na kakabọ rhan aro rua, aro ẹre keghi rhan, ọ kegha bẹghe emwi hia vẹ ẹn.

26Jesu keghi zẹ ọre urrie, ọ tama rẹn wẹẹ, “Ghẹ dọlegbe gha rrie adesẹ ẹvbo.”

27Jesu kevbe erhuanegbe ẹre kegha rrie igue ni lẹga Sisaria Filipai. Iran ghi rre odẹ, ọ keghi nọ iran wẹẹ, “Wa tama mwẹ, de ọmwa ne emwa khare ighe imẹ khin?”

28Iran wanniẹn wẹẹ, “Eso wẹ Jọn ne Ọsamẹ, eso wẹ Elaija, eso vbe wẹ ọkpa vbe uwu avbe akhasẹ.”

29Ọ keghi dọlegbe nọ iran wẹẹ, “Wa vboo? De ọmwa ne uwa khare ighe imẹ khin?”

30Pita wanniẹn wẹẹ, “Wẹ ọrọre nene Mẹzaia.” Irẹn keghi tama iran wẹẹ, “Wa ghẹ tama ọmwa rhọkpa.”

31Ẹghẹ ni, Jesu keghi suẹn gha tama avbe erhuanegbe ẹre wẹẹ, “Ovbi Ọmwa gha rrioya ẹsẹse, avbe ediọn kevbe igie ohẹn kevbe iran ni ma emwa Uhi gha hẹee ye otọ. A gha gbe ẹe rua sokpan vbe. ikpẹdẹ nogieha, ọ gha rhiọkpaegbe.”

32Ọ keghi wa mobọ kan rẹn ye iran ehọ. Rhunmwuda ọnii Pita rhie ẹre ghe efẹn ọkpa, ọ keghi ya gha guee gui.

33Sokpan Jesu fi egbe werriẹ ọ keghi ghe avbe erhuanegbe ẹre, ọ keghi suẹn gha gu Pita gui wẹẹ, “Kpao vbe ehe ne I ye rre Setan, iziro ruẹ ọghe emwa ne agbọn nọ, ẹ i re ọghe Osanobua.”

34Ẹkpo nii Jesu ghi na tie emwa ni gbe ẹbu ye evba kevbe avbe erhuanegbe ẹre rrie egbe, ọ tama iran wẹẹ, “Deghẹ ọmwaikọmwa ho ne ọ lele mwẹ, wẹ ne ọ mianmian enegbe ẹre, ne ọ mu ugbugbe ẹre, ne ọ lele mwẹ.

35Rhunmwuda ọmwa ne ọ ho ne irẹn sinmwi ẹdẹ agbọn ẹnrẹn gha mu ẹn fua, sokpan ọmwa ne ọ rhunmwuda mwẹ kevbe rhunmwuda iyẹn ne ọ maa mu edẹ agbọn rẹn fua, gha miẹn ọẹn rhie.

36De ere ne ọ rre ọmwa re, a deghẹ agbọn na hia sẹ ọre obọ, ighe ọ mu ẹdẹ agbọn rẹn fua.

37Emwi ọkpa i rrọọ ne ọmwa gha sẹtin ya dẹ ẹdẹ agbọn rẹn werriegbe.

38Rhunmwuda ọnii, deghẹ ọmwaikọmwa mu ekhue mwẹ kevbe ekhue iyẹn ne ọ maa vbe agbọn ọrhiae ne ọ maa rẹn Osanobua na, Ovbi Ọmwa gha vbe mu ekhue ẹre vbe ọ gha rre vbe uyi ọghe Erha ẹe deba avbe odibosa ni huanrẹn.”

← Chapter 7 Jump to: Chapter 9 →